Read Ninia Yali YESAYA 25 Bible Online

YESAYA 25 - Ninia Yali bible

YESAYA 25

¹TUHAN hat de an nakni Allah welahen, an den hat leho hobaharuk kwit, hat hunuk mundoho mot-hapuk kahi. Hat en duruk kahen alere nowag elek ale neg duruk kahen ai fam; Hat en o endam en wene melaloho ferihin deg dipdoho neg duruk kwit welahen.

²Kota anyo re Haren mun lilibug deberihin, kota along wereg on anyo Haren huhul kwelabe feserihin. Raja obam istana ap bog on en wutswa on de mundoho lilibug deheik, li mundoho-mundoho etma nikangge eke wuruhup fug.

³Enenggul unuk-unuk angge enomamne wereg on omano en de Hat mot-hapuk kamuhup, Kota-kota unggul unuk domog enolok wereg kwe omano en de Hat enakol hapuk kamuhup.

⁴Aire Hat hebe ap homi enomamne eleg on hakit waharukmu aheg, enenggik eleg on mel anggoloreg on mel enakol eleg angge hakit waharuk ale fahet atihin ai fam. Hat de hol sielu watuk em herag atuk mu fahet nim, mo aeg olok en kun apma kuruk hag inim atihin. Aire ap enolok on en de o sanim[35] deg lit sielu en duruk hag nenowarik waheg,

⁵hol ahanhan on mun iringgig on enowarik waheg, duruk ai fam. Famen de Haren nit neneselei on omano enambilik lare foruk kahen, anggulog en mo ahanhan salduk anyo hag, ap enolok on en enele nggai-wai angge duruk on omano bale foruk kahen.

⁶Duk Sion fam etma TUHAN di ale su ale duk ale neg deg on anyo en enunggul unuk kwenangma wereg on abirangge fahet bobag fouk debehu. Aren de nauk angge unduk neg on mel anggur ahaik mun memereg on nim fouk debehu.

⁷Duk ai famen de enunggul unuk enenda hesildukmu sebel enusug wereg on anyo hena hagdoho oko fohu.

⁸ TUHAN Mun Along on anyo en de waratuk on anyo mundoho elehap debehu! Aren de ap homi enorohole domog fam en it inilue mundoho somag enebuhu. Ne, At omaliki o kwenangma suman sebeloho feserukmu wereg on etmano aren yarap debehu. TUHAN en duhuk ulug ele mundoho isi anggere demdoho duhu lit deg.

⁹Ai salim ap en uruk kwit, “Nit nenehap wendat-nenebukwag ulug nangno hauk kahe on anyo At neg de demdoho Allah nit nenakni. Demdoho TUHAN ebe su At ai niren nangno hauk kwit welahe on. Aren nit mundoho nenahap wendat-nenebeheikma re ketia niren nenahayeg dukohon” uruk kamuhup.

¹⁰ TUHAN en de Duk Sion anyo along baloho foroho laruhu, famen Moab de enggelangge singon hwik-esaukmu sobit-esauk hag sobit-sabat esahu.

¹¹Ap homi etma on de enenggik langdoho ap en ik sapuk lakoho duruk hag duhup. Famen de TUHAN en it enawonog atuk on ai fam en sebele fesehumu re iren duk fug ale neg aruhu.

¹²Fak lehet helep fam Moab enap en omamneroho ohoma yit-yatdoho wirig on etma TUHAN en moluluk esahureg, kwenang hwik-esahumu re welelenggendoho ul hag aruhu.