Read Ninia Yali YESAYA 26 Bible Online

YESAYA 26 - Ninia Yali bible

YESAYA 26

¹Li ai salim de o Yehuda kwenang fam etma ap homi en suni su on uruk kamuhup: “Nit nenobam kota aure mun omamnereg Allah amu en neg helep omamneroho wiri fesimu suman de nit nenahap wendareg.

²Unggul unuk dipdoho neg duruk on Unggul unuk enakni Allah enda boruk ale neg duruk on etma kwik wamagdoho re sokole humon etma husi feyek.

³TUHAN, ap enda hambuk deg on aire Hat fam enda demdoho bolug durukmu re Haren at fam enda hambukdoho akol eleg angge welamag ulug og-utuk kahen.

⁴TUHAN Allah en de hundig-hundig nit along baloho fahat nenusug anggere At obam neg henenda demdoho boruk kamek.

⁵TUHAN en de ap winik-wonog uruk on sebele feseheg, kota iren on helep fam aldap omamneroho wirig on luluhundoho kwenang inim higirap debeheg, duruk.

⁶Ne, ap enenggik eleg on mel ne anggin-fanggin hauk on mel en de sobit-sabat esahup” ulug uruk kamuhup.

⁷Ap bekitdoho neg duruk on de Hat TUHAN en at kwe lauk kwe hwale foruk kahenma re kwe bekiron fam neg lauk.

⁸TUHAN nenakni, nit de Haren wene kongdoho uruk kahen on fahet nangno heauk kahe, Hat hebe nangno heauk kahe, Hat de niren mot-habeheg, nenenda ebet habeheg, duruk on welahen.

⁹O hup anggore an nebe re Hat fahet wenggel-wenggel neg uruk kahi, ne o hubet angge re Hat nenda ebet hapuk kahi. Fobik Haren ap homi kwenangma wereg on ayo wiroho en enebuhun mu re, ap homi kwenangma on en de demdoho on ebe su ulug enoluk amuhup.

¹⁰Ap enabut kwasik on fanoroho debesouk men ohore, aren demdoho on ebe di ulug mamuluk fug alereg. Negara wene melaleg wereg ma durukmu famen ohore aren de TUHAN along wereg ale anyo fahet leho fouk fug anggere hwenaroho neg uruk kwit welam alereg.

¹¹ TUHAN nenakni, Haren de it haselei on unggum og-esamin ulug fouk deg welahen famen de, it de enapeleg angge wongdoho wereg. Haren homaliki on fahet henda hundig enepuk kahen ale etma inil halug de it enenggali en yinggil-yinggil kuruk kam alereg. Haren it unggum og-esahuk ulug foukdoho ferihin on ai fam it enebe mundoho fundoho eleg atuk kamag.

¹²TUHAN nenakni, nit nenobam fanoroho welamag ulug Haren neg nenobaharuk kahen, niren yabuk duruk kahe on etma re Haren neg nit[36] nenobahet duruk kahen.

¹³TUHAN Allah nenakni, nit nenaknisi amu on en sebel-nenusug welatswa famen de, we Hat neg nit nenakni ulug niren fag-duruk kahe!

¹⁴It enebere Haren mundoho elehap debeserihin mu waratswa, it enaheime nikangge enoluk inam fug alereg, ne it enebe enoluk am fug alereg. Haren de ebereg welam fug angge horoho embeserihin.

¹⁵TUHAN nenakni, Haren de nit homaliki on nenebe ekenim aldapdoho nenobahakeg, nit nenobam wilayah eke nim heale feheg, dirihin ai fam de Hat leho hobaharuk kahe.

¹⁶Haren nit unggum og-nesauihin mu; nit nenobam anggindoho deg lit, niren Hat nenakni TUHAN [37] hobam somban uruk kahe.

¹⁷TUHAN nenakni, homi enomalik enderukoho ouk en nenek duruk kwit ngaruruk hag, nit oho hat holohotman airoho duruk kahe.

¹⁸Niren de nenomalik wereg on hag nenahummu atlug ouk en nenek duruk kahe, famen niren eke endetuk kahe fug; niren kwenangma on fam enahap wendatuk on og-esehe fug ha alereg, ne ap homi[38] eke nim dopnoroho fehe fug ha alereg.

¹⁹Hat homaliki mundoho waratswa on de nikangge enoluk amuhup, it enebe wareg nikangge in amuhup. Ap kwenang elma sal-enepswa on de, in amuhup deg enahayeg duruk kamuhup. Lil en kwenangma sako deberuk hag, Hat Homaliki o endam waratswa on enolugap debehun.

²⁰Yaho hit an nunggul unuk on, hit henobam olma kwik watlug de sok lat dakiek. Hit airoho kwik watlug weregman neg de TUHAN olok en duruk on ai bale femisi.

²¹Ap homi kwenangma on en siag duruk fam TUHAN ebe boholma wereg ma etmano en wambik waruhureg unggum og-esahu. Ap herako watuk on etma re enam aruhu. Ap waroho heraho feseswa on etma re kwenang en herag enebuhu fug.