Read Ninia Yali YESAYA 27 Bible Online

YESAYA 27 - Ninia Yali bible

YESAYA 27

¹ Nukoho ai salim de TUHAN en enggarog omamne on aeg oho olok deg on ai oko re no Lewiatan [39] kisu emberim fam bol duruk on, mase-mase angge lahapuk ai mel, kisu menawe ik laut fam wereg on ai mel unggum og-esahu.

²Nukoho ai salim TUHAN en uruk kwit de, “An neyabuk anggur yabuk buhun on ai fahet suni iek.

³An TUHAN ebere hwalduk on wereg lit, hundig-handig ik hililduk kahi, ap en wa no ulug nukoho nim hup angge nim An den kahaleg lit welahi.

⁴Enggelangge oho alog-alog angge oho wereg famen, An den suahal ihi ha fug alereg, an den de waroho hene folug indokma mundoho yalduk karuhuk.

⁵Famen de An nomaliki enaselei on omano en An fam nenalong bal-amag ulug waharuk halug, it aire An nim seberukwag, an nim seberukwag ulug embeseiyug.” Uhu.

⁶Li fobik waruhu on fam unggul unuk Israel on de, e omanggen belabegma saha uruk kwit kwenangma abirangge saha ulug anggen yihiruk karuhu on hag deg.

⁷TUHAN en ap homi At unggul unuk on unggum og-esahu alere ap homi unggul unuk Israel nim seleireg on fam unggum og-esauk etma hagdoho fug. Aren aselei on enowatuk katsi hag At omaliki enowaruhu fug.

⁸TUHAN en omaliki unggum og-esauk alere Aren o kwenang enapeleg on fam hwik-enebik lasi ai. Aren de hol timur [40] fil en omamne on fam muko fesesi ai.

⁹Famen de ap homi Israel on enesiag elehapdoho fouk ale aire iren mezbah dewa etma al sahaloho ul hag debouk men neg de higitdoho duk alereg. Dewi Asyera ahut ilitdeg mel amben fano angge ulug yalduk on mel de mundoho luluhun esahup.

¹⁰Kota fak lehet omamneroho ohoma wereg on anyo re iliangge lei ap homi elegma hag embeseswa ma re dereng-dereng uruk. Wam uluk deg on de etma kel wat-dauk kwit e enggela etma wereg on mundoho elehap duruk kwit wereg.

¹¹Ne, e enggik sehelet etma bug atlug damulduk halug de homi en e yalduk on ulug ondol da waharuk. Unggul unuk ai on de di ale su ale fahet fureberuk fug mu re, Allah it wal-enepsi on en de it enda eseheg, enelaheg, beheg, duhu fug.

¹²Eta li em de TUHAN en omaliki unggul unuk on omano misig-misig Ik Efrat fam en de o Mesir huli etma andogdoho fesehu. Aren de ap en gandum ebe on nim erang on nim eneko foruk hag enebuhu.

¹³Nukoho ai salim de ap homi Israel on o Asyur mel Mesir mel hwik enebik lausa on etmano sombandoho wamag ulug trompet humon ele furuhu. It watlug de o Yerusalem Duk amu eneg on[41] anyo fam TUHAN apne wag wamuhup.