Read Ninia Yali YESAYA 28 Bible Online

YESAYA 28 - Ninia Yali bible

YESAYA 28

¹Kota it Israel enap siomo dulug enenda o ai fam hembisig wereg lit duruk on etma re alemat atuk kamag! O ai il buhundeg on aire owil angge it enunggulmu en halo uruk hag il siag atuk kamag. Kota donggo mun hesilig on fam wolongdoho lahabegma ap siomo habug aleroho duruk kwit enenda hembisigmu aire alemat atuk kamag.

²TUHAN en de ap omamne wereg lit along deg on eke mondorik waruhu. At ebere sielu osit lumbiag nim mangnoroho warik waharuk hag, ite osit humon ik fu lehelug di angge su angge harulug lauk on hagdoho waruhu. At olok fam de it enebe kwenangma hwik-esauk karuhu.

³It melal-enepuk on en siomo duruk kwit enenda hembisig wereg on aire kwenangma sobit-sabat esahu.

⁴Iren enobam kota bogdeg wereg on ketia il seram-seram wamburuk on aire mundoho eleg aruhu. At ambiangma hahu alere e ara anggen yuhul atuk ale li owan deg kweleg yuhul atuk mu; ap en inil halug dahan dalug nauk on hag aruhu.

⁵TUHAN di ale su ale mundoho duk alereg on aire it omaliki ando welamuhup on etan de owil angge ap kain on waharukmu enanggolobag fam bug deberuk on hagdoho aruhu.

⁶TUHAN en de ap hakim fam wene dipdoho duruk on og-eseheg, it kota ap selei on en nenowarik wam no ulug kahaleg wereg on fam enambong seap debeheg, duhu.

⁷It ap nabi mel, imam mel ohore anggur ahaik mel, arak ahaik mel humdoho nausa angge en de siomo duruk. Iren wenggelduk on nong-hong uruk en de koboke dal-dal anggeril dung-dung anggeril lauk. Ap nabi en de Allah en ena og-hauk hag fam hweag-esauk on anyo ebe di fahet ulug fureberuk fug. Imam de wene biling nesakiek ulug it enakit walug kuruk on etmano furoho kong-duk fug ale duruk.

⁸It enahan doaleg de me en neg hoporeg ma re obale buhundeg ma eke wereg fug.

⁹Iren an nobahet ngururuk kwit enele diroho uruk, “Aren de sa mel hweag-esauk kahi ulug duruk? Ebe diroho ulug de ap sa dindiloho hweag-om alereg? Aren boruk kwit nit oma re omalik fou ketia ag nauk on boruk ane?

¹⁰Yaho, aren nit indip misig-misig, ele misig-misig, siog misig-misig hweag-nesauk katmisi ai a?” uruk.

¹¹ Airoho urukmu aren uruk kwit, Hit holduk ale henerim halug de TUHAN en ap bohon ele unggut mel hit henapeleg on ne ap bohon enele fam hit hweag-hesauk kamag ulug ap bohon eke mondorik waruhu.

¹²TUHAN en de hit mundoho kel wat-daukmu fahet henenda a, henerim a ulug unug-hesauk, famen de hiren At ele holduk ale henerim deg.

¹³Ai fam de TUHAN en hit fam indip misig-misig, ele misig-misig, siog misig-misig hweag-hesauk ai. Ne, hit kwe lauk kahepma re henorohole belabeg wat-daukmu yebildoho henowatuk mu hit henebe ilag ulug sabu hetdeg on elma aik waharuk kahep.

¹⁴Hit ap homi Yerusalem fam melal-enepuk kwit bulip enepuk kahen etma TUHAN en eheik ale du holiek!

¹⁵Hiren uruk kwit de nit de waratuk on mel, ne ap waratlug laukmu etma mel nenele sali watuhuk uruk kahep. Hiren de anggin on waruhu on aire demdoho nit nenobam aik waruhu fug, boruk kwit uruk kahep. Hiren de henonggwareg along bal daul ulug de henele seiale fam duruk kahep.

¹⁶ Airoho duruk kahep ai fam de TUHAN Mun Leho wereg on anyo en diroho isi, “An den de oboule mun omamne on hambuk lele wareg on o Sion fam etma fohuk; Helep ambolowag mun along on lisu diroho baloho, ‘Ap sa en enda demdoho boruk ale hambuk deg halug de aren ik debehu fug’ ulug baloho fohu.

¹⁷Katukdoho neg duruk on aire sabu ilit duruk angge debehuk, ne bekitdoho on neg duruk on aire o wituk kwit helep anggen sabu ililoho wal-hauk angge hag debehuk” isi. Osit helep on en de hiren seiale on fahet henenda hembisig welahep on etma mun felelengdoho wahu. Ne, hit henebe herag atuk kahepma etma re ik fu en horoho wahu.

¹⁸Hiren ap homi waratlug laukmu nim henele sali wareheg, ne waratuk on nim henele misig seberoho mareheg, duruhup on etma re suhwi aruhu mu re anggin on henobam aik waharuk halug hit mundoho luluhundoho sobit hesahup.

¹⁹Hit de anggolo ale neg hundig-handig henobam aik waharukmu re, hiren nukoho hundig-hundig hubet nim, hup angge nim anggin hauk kamuhup. Ne, Allah diroho diyug ulug isi on ai hit henesanggo hol halug de hit henakol en henowag elek duruk kamuhup.

²⁰Hit de ap en nohoruk angge wirig on horog deg ma ebe ying-am ale nong-hong uruk hag, ite selimut sambunoho nohoruk on anggwereg elegma duruk hag duhup.

²¹ TUHAN en de Dom Perasim fam en disi hag in aruhu. Aren o Gibeon fanggongma en At enda besi ale dikohoma anyeroho disi hag, Aren besi ale aire ap homi nik aleroho hauk on duhu! Aren de ap homi en enobam fog uruk on duhu.

²²An den de Allah Mun Leho wereg on mel Di ale su ale duk ale neg deg on anyo en mel o kwenang abirangge mundoho elehap debehuk ulug wene kongdoho isi on ai nesanggo holdihik. Mu re an den nele hweag-hesauk kahi on oma hiren owag lahaleg ale duk fug. Airoho duruk men de mundoho anggolo ale hit lil am fug ale aruhu!

²³An nele uruk kahi on su henesanggo holiek, diroho aruhu ulug wene hweag-hesauk kahi on su furebeyek.

²⁴Ap yabuk wutuk on en de li mundoho-mundoho etma fam kwenang habuleheg, muhuloho feheg, a yatmin ulug osuk angge lileheg, neg duruk kwit welaruhu fug.

²⁵At anggwenang lahe mundoho fouk debelug halug de aren a no jintan singon mel kuron mel fole folug gandum orohole biren on eraroho yareheg, ne elan kwe re amu angge[42] a yareheg, duhu.

²⁶At Allah en yabuk duruk ale fahet mamul-itsi mu re, keroho dimin ulug aire at oluk deg.

²⁷Aren de anggen yihik loldil lauk angge jintan singon loleheg, ne no gerobak fam jintan kuron anggen luluhun deheg, duhu fug. Ai fahet de aren e fetnangge watuk angge se on fam duhu.

²⁸Aren gandum anggen balduk kwit de aren yeik watuk men neg anggen omano luluhun duhu fug. Eleg! At de fanoroho balduk ale mel, gandum anggen ebe luluhun debouk eleg angge emberim kwe gerobak lisulug lauk ale oluk deg.

²⁹At enggat deg ale aire TUHAN di ale su ale duk ale neg deg on anyo en og-itsi on. TUHAN en duhuk ale ulug wenggeloho foruk on etma re we mun enggat ale neg deg ma re ambiangma atil lahu neg.