Read Ninia Yali YESAYA 29 Bible Online

YESAYA 29 - Ninia Yali bible

YESAYA 29

¹Kota Yerusalem fahet mezbah Allah obahet yalduk angge obale wereg obam uruk on aire alemat atuk kamag! Kota Daud obam o sabo wirig latsi kota ai alemat atuk kamag! Iren de tahun eke lauk eke waharuk durukmu ebetuk kwit welamuhup,

²famen de Allah en fulu ale kota ai fam mondorik waruhu mu, ap homi etma wereg on nenek-fenek duruk kwit su keroho fahet nenepuk ulug uruk kamuhup. O kota abirangge fam etma mezbah mep en neg aro-fare deg angge hag deg laruhu.

³Allah en kota enowarik kwikoho re unggut foma-foma waling enebik waruhu.

⁴Yerusalem de mungguat en ele holukwag ulug kwenang elman ele eheg, kwenang ahe ilonggoma en eheg, duruk hag deg laruhu.

⁵Famen de, it ap bog on en enolok on etma re kwenang ahe hagdoho, ite asin ahap furoho lauk hagdoho mun fetagdoho atmisi enapeleg degman eleg amuhup.

⁶TUHAN Mun Along on anyo en de kota aire anggin on humon mel meik humon mel duruk fam wundet debehu. Aren sielu mel, indok ambulbul mel, heroho dag uruk on mondorik waruhu mu mundoho harep nahu.

⁷Ai en ap esan-esan angge bog on en o Yerusalem kota mezbah Allah obahet wiroho wereg obam anyo, bin kwik waheg, huk dik waheg, dog kwelabik kweheg, duruk on etma re ap en hup anggo ena og-hauk men folo-folo enapeleg atuk ai hag eleg amuhup.

⁸Unggul unuk unggul unuk angge en Yerusalem enowarik kul ulug lohwalduk on etma re ap en ena og-hauk kwit siburu naukmu a og-hauk famen ebe inatuk men ahummu obokdoho inatuk, ite ik obok en ik naukmu ena og-halug inatuk men enanggolobag iringgig angge deg ma inatuk hagdoho amuhup.

⁹Hundig yande fok duruk kwit ap inil bug on hag hinil hupni-dauk kamek! Siomo duruk kamuhup famen anggur ahaik nalug de fug. Ne, dal-dal angge dil lauk kamuhup famen de e arak ahalue nalug de fug.

¹⁰ TUHAN en de hit kungguk duruk kwit noho homogdoho nohoukwag ulug henebuhu. Aren de ap nabi inil hupni feseheg, inil hauk enap enorohole sale feheg, duhu.

¹¹Buku ap en limingguk no ulug eneg angge bug deg on hag de hiren hinil hauk kamuhup on etma oho re ebe di fahet ulug fureberuk kamuhup fug. Hiren buku anyo walug ap bilingguruk ale oluk on akit walug laukmu, aren hweag-hesauk kwit buku aire eneg ale limingguk no ulug wereg ma re an den dihi ha fug alereg uruk karuhu.

¹²Ne, ap lisu baleg bilingguruk ale apeleg on fam walug laukmu re aren uruk kwit an den bilinggihi fug ha alereg uruk karuhu.

¹³ TUHAN en ele uruk kwit, “Ap homi aire enenda yatdeg liren de it enele fam en neg de An mot-napuk. Agama iren on ai re ap homi en wene melale fousa on neg eberoho wauk.

¹⁴ Ai fam de it An den yeik eke nim eke nim enowatuk en youk lahup. Ap enenda wenggeleg on etma re morue on amuhup, ne it enoluk deg on etma fam de duk fug ale on aruhu” isi.

¹⁵Ap eke TUHAN fam en wene duhuk ale ulug omano heraho femin deg welatmin ulug duruk on aire alemat atuk kamag! Iren boruk kwit ap en eke nesauk fug ite niren duruk kahe on enoluk deg fug boruk kwit airoho duruk.

¹⁶ Abirangge etma iren enden-fanden hauk. Mu re ke on along deg, kwenang dangge ai a, ite at ikwag kwenang on lalduk on ai a? At wiroho lale foruk angge en ap lalduk on fam ele uruk kwit, “Haren an lal-napihin fug” uk alereg behep? Ite kwenang dangge on wirig anyo en uruk kwit, “Haren di on su on dehen ha fug alereg” uk alereg? Mun eleg.

¹⁷Ap en wene uruk kwit, “Ohwei etma we il misig fam yabuk wutuk mu aruhu, ne yabuk wutuk mu etma re ohwei aruhu” uruk.

¹⁸Eta li em de ap enesanggo dahom on en de buku baleg on misig eke bilinggurukmu holduk kamuhup, ne ap inil hupnigdoho o mum fam welamuhup on omano inil fenggenuhu mu, inil hauk kamuhup.

¹⁹Ap enenggik eleg on mel enelitno enepuk on mel de Israel on enakni Allah mun amu eneg on anyo en enahayeg howag ulug og-esauk on anyo hahup.

²⁰Aire ap homi ap amu on sebele feseheg, Allah enelitno deheg, duruk on etma fotoko amuhup lire etma. Allah en de ap siag duruk on abirangge mel,

²¹ap en it ap amu on enebug uruk ale enenda deg lit il noruk on mel, ap en ap kwasikdoho duruk on fahet unggum og-esaukmu ili og-enepuk on mel, ap bekitdoho neg duruk dipdoho debesouk no ulug wene seiale neg saharil noruk on mel, mundoho elehap debsehu.

²²Ai fahet de TUHAN, Allah Israel on en Abraham wundet debebag on en uruk kwit, “An nunggul unuk on su hit fobik eke enalitno henebuhup fug, nit henenggali en henorohole hesil amuhup fug.

²³Hiren henomaliki An den og-hesauk on etmano hinil dim esauk kwit, hiren de An Allah Israel on namu eneg welahi on anyo fahet, At nenakni ulug fag-duhup. Hiren de An nalong bolug leho nobahakeg, An fam henakoldoho welaheg, duruk kamuhup.

²⁴Ap morue on ai enggat atuk ale mamul dahup, ne ap enele mul-mul ale neg uruk on de hweag-nesowag ulug enahayeg hahup” isi.