Read Ninia Yali YESAYA 3 Bible Online

YESAYA 3 - Ninia Yali bible

YESAYA 3

¹TUHAN Along wereg on anyo en de o Yerusalem fam inim Yehuda fam inim en enasiburu nauk on mel enahaik mel dik-demdoho mundoho wahu en deg. Airoho wauk kwit de iren ap enowesi bolug enobam hembisig lit wereg on:

²it enobahet duruk men enalong atuk on mel, tentara mel, wene katukdoho bilingguruk on mel, nabi mel, enambol fam angge mel, komo-enepuk on mel,

³sehen seneg enap enowesi perwira mel, ap kaindeg mel, negara fam enunuk bogdeg wereg on mel, hwal enap mel, il biren mel, wahu neg.

⁴Airoho wahureg de TUHAN en de omalik ket sauwe on ap homi melal-enepuk kamag ulug unduhuk feseheg, duhumu re iren enenda bolug aleroho neg welal-enepuk kamuhup.

⁵Iren de enenggik along fam eke en sebele feseruk men eke en sebele feseruk men duruk kamuhup. Ap sauwe on en ap lohon sebeleg hag debeseheg, ne ap doron en de ap lohon sebele feseheg, duruk kamuhup.

⁶Eta li em ap homi en ap iron misig eke momale folug iren uruk kwit, “We hat hamu neg de hasum eberoho wandeg lahen; ma re o li anggin-fanggin deg li em eya hat nit melal-nenepuk on inamin,” ulug hweag-utuk kamuhup.

⁷Famen aren onggo uruk kwit, “An de hwal ahun fug! An oho nasiburu nauk on mel nasum wan-dauk on mel eleg neg. Anggere an nobam hat nenunggul unuk su melal-nenepuk on inamin ulug mingming napuk eleg!” uruk karuhu.

⁸Yerusalem de dik-demdoho nong-hong eheik! Ne, Yehuda re mundoho lobag eheik. Aire iren enele matuk ale mel, duruk ale mel de TUHAN ele sahaleg ale deheg, ne At along wereg on anyo il deg aleroho neg duruk ai fam.

⁹It fam enolok wereg ale anyo re it enobabut winik-wonog uruk on ai fam enameg. Ap homi Sodom on en endam siag duruk katswa hag iren ebenameg siag duruk. Airoho duruk ai fam de it enonggwareg en alemat daukmu re enebe alemat atuk kamag.

¹⁰TUHAN en uruk kwit, “Ap homi An nobam dipdoho neg duruk on etma fam de it de enebe enaheyegdoho wereg lit enahap wendar amuhup ulug hweag-esakiyug. Ne, it de enangge di angge su angge anggolo siagdoho wiroho yatuk on etma nauk kamuhup.

¹¹Famen ap enolok fam neg duruk on de iren ap homi amu on fam debeseruk ale eta it fam oho airoho debesehup angge re enelaheg e.

¹²An nomaliki etma re it ap di angge su angge dopnoroho eke nim hwelauk on mel ap amep nauk on mel en enenggik omamne fam berel esauk kamuhup. An nomaliki re it ap melal-enepuk kamuhup on en enenda nong-hong esaukmu re it de kwe ke laul ulug enenda nong-hong uruk kamuhup,” ulug hweag-esakiyug.

¹³TUHAN en de At omaliki[5] etmano enawene katukdoho bale folug ayo wit-enebeheg, owag loleheg, dikoho fik-fouk deg.

¹⁴Ap homi At omaliki melal-enepuk on inil hanim TUHAN de hakim wene katukdoho bilingguruk on hag aruhu. At airoho aruhureg aren it enobam hekip esahu on de su: “Hiren neg anggur yabuk men anggen yihig omano huhul wauk kahep; airoho hwelauk kahepma hit henobam de ap enenggik eleg on enangge huhul hwelauk kahep on etman hoporeg.

¹⁵Nunggwelug hiren an nomaliki anggin-fanggin feseheg, ap enenggik eleg on henomamne hasimeg enangge deloho hweleheg, duruk kahep? An TUHAN Mun Leho wereg lit Mun nomamne welahi on anyo en nele mundoho ihi,” ulug uhu.

¹⁶TUHAN en uruk kwit, “Homi Yerusalem homi re mun winik-wonog uruk! It de enobabut lahik-lahog deg lit inil hombut deheg, enowag winik-wonog anggeril laheg, duruk on. Eneyog de enapenen wohol hil laukmu re eneyog sehene kwelabeg on etmano ele doleleng uruk.

¹⁷Famen de an den it unggum og-esahuk; it enunggul fene re kilip-kilip angge en hoporeg ma enunggul ahap neg debehup.”

¹⁸Li enam aik waruhu on fam de TUHAN en it hwelani Yerusalem on enalili angge wereg ma enewonog atuk on wahu. It enalili angge etma re: Enggul bug deg angge mel, eneyog sehene mel, siong mel,

¹⁹enenggik sehene mel, sum enorohole hwililip deg on mel,

²⁰enunggul asum mel, enenda wauk angge enenggikmu bug deberuk on mel enobahare fam bug deberuk on mel,

²¹sehene enggik sehelet fam kwelabeg on mel, enambiangmangge mel,

²²sum pesta duruk kwit wan-duruk on fano on mel, sum ebe on dag kwe yanggulduk on mel, dompet mel,

²³sum il maben on mel, sum lenan on mel, enanggolopma het duruk angge mel, sum yanggulduk on yaron mel, wahu.

²⁴Ketia re iren amben-amben angge aro duruk, ne fobik de it enamben siag on deg lamuhup lit deg. It enombahaluk ketia il sako on bug duruk famen iren helep tambang siag on bug duruk kamuhup. It enunggulmu enoruk fanoroho wilibig on etma hwere fohup. It enasum ebe on etma fobik mun sumbulal on wandeg lamuhup, Ketia it inil aluli reg famen fobik de it enebe fam eneg angge cap dag debesehupmu re enobabe nong-hong deg laruhu.

²⁵Ap it enomamne wereg on etma re weim ambiangman waramuhup.

²⁶O kota kwik laukmu sokole humon fene etma re ap homi en oba yako fong watuk kamuhup, ne kota ai ebere homi enebulukohouk debeserukmu kwenangma hwerieg hag deg laruhu.