Read Ninia Yali YESAYA 30 Bible Online

YESAYA 30 - Ninia Yali bible

YESAYA 30

¹TUHAN ele uruk kwit, “Ap homi Yehuda on melal-enepuk on aire An nele sahaloho foruk ale ai fahet de enebe elamet atuk kamag. Iren de An den duhuk ulug berihik alere fug enamu bolug deheg, ne iren An nenda boruk fug ale on nim enele misig seberoho matlug enenggik ahalue feheg, duruk fam de it enesiag de balu-balu angge lahapuk kwit wereg.

²It An den wene kongdoho hweag-esauk eleg kweleg o Mesir lauk. Iren de Mesir fam nenalong baleg lamag ulug de raja Mesir on let-nenebukwag ulug heng ik lauk.

³Famen de raja Mesir on en de it enehummu siag ele debeseheg, ne Mesir on en nenalong bal-nenebukwag ulug duruk on ai suhwi aheg, duhup.

⁴Yehuda en yonggo angge mon-enebuhup on omano kota Zoan mel Hanes mel Mesir fam etma kwik lahup famen,

⁵iren unggul unuk duk fug on fam enenda dip debeswa ma re ap abit angge en enenggali amuhup. It etman hwelahup angge aire fano angge mel, ne let-enepuk on mel de enalitno enepuk on mel neg hahup” isi.

⁶TUHAN en no lobo duruk angge selatan fil wereg on etma fahet de diroho ukwag ulug isi, “Ap yonggo mon-enepuk on etman keledai mel, unta mel fam de enahayegdoho ulug og-esauk angge omano lahaplug walug de o namel-mel deg kwe mel, etma kisu olok wereg on kwe mel, singa mel kisu aeg kamol wereg on mel naga ahwerabul wereg on mel, wereg kwe etma lahup. Lahupdeg de enahayegdoho ulug on etma iren unggul unuk it let-enebuk fug ale on fam og-esa lahup.

⁷Mesir en let-enebuhup alere we alemaroho neg. Ai fahet de Mesir aire An den, Naga namel-mel deg eleg on ulug soale ferihik,” isi.

⁸Allah en an mingming napuk kwit, omaliki en siag duruk ale ai hundig-hundig ebereg wereg ale fahet buku misig fam balin ulug mingming napsi.

⁹It aire unggul unuk Allah ele sahalduk ale enambono on deg ma, enele seiale neg uruk ale enambono deg lit, Allah en hweag-esauk ale furoho holduk fug on.

¹⁰Iren ap nabi enobam uruk kwit, “Henembilik dopno dakiek! Hiren nit nenobam wene demdoho on etma hweag-nesa fug, famen de niren nenambono ale etma neg nit holduk kamul. Niren meneni hesangge ebetuk kamukohon de embeseyek.

¹¹Kwe amu on fene en henemumu lakiek, hiren Allah Israel on amu eneg wereg on ai fam nit nenabusel sahalduk eleg” uruk kamuhup.

¹²Ai fahet de Allah Israel on amu eneg wereg on anyo en de diroho isi, “Hiren An nele domako embeseruk kwit de enenggik omamne fam sebel-enusug wereg ale nim seiale uruk ale fahet nim henenda belabeg welahep.

¹³Ai fam hit siag duruk kahep ai. Hit de obahat yaron wirigmu emberim fam etleman halet dil apma fil wamburukmu hag deg lahep. Hit we fetagdoho etano daloroho yingguruk kahep.

¹⁴Hit de ukwag dangge on erap duruk hag erap duhup, mu re erap deg angge etma fam de indok anggen olog duk ale oho ik yenggelegman olog duk ale oho aruhu fug” isi.

¹⁵TUHAN Mun Along on, Allah Israel on amu eneg on en ele omaliki fam hweag-esauk kwit, “Siag duruk kahep on henenda ahamdoho embeselug hambuk dalug welamuhup halug de An den hit henahap wendat-henebuhuk. Hit henenda fano fam An nobam dip nobahalug welamuhup halug hit An den henomamneap henobaharuk karuhuk,” isi famen de hit henerimdoho duruk kahep!

¹⁶Hit de selei on enenggikmen kuda fam folo-folo heye longgo uhuk ale ulug anyo neg wene melaloho foruk kahep. Fano abi! Hit fobik longgo uruk kwit buroho lahup ano! Hit wenggel-hauk kwit de hit henengge kuda aire folo-folo buroho lauk boruk kahep famen de it mug-heneplug lauk on de mun baleg ahan lauk karuhu.

¹⁷Selei ahun misig en mug-hesauk on fahet ap henebe seribu en heye longgo uruk kamuhup, seleion ap foaben en mug-henesauk on fahet de hit abirangge heye longgo uruk kamuhup. Hit henebe esan lohwaleg anyo sahalimen de e bendera deleg on anyo neg dukmu etma amu welaruhu.

¹⁸Airoho duruk kweleg famen TUHAN en enda hundig henepuk ale anyo hit fam unug-hesahuk ulug nangno hauk kwit wereg. Hit enda hundig henebikoho fik-fouk deg wereg. TUHAN de ebe Allah abit ale dipdoho neg duruk on deg ma, ap At fam ebet-ebet uruk kwit wereg on de enahayegdoho welamag.

¹⁹Yaho hit Yerusalem welahep on de hit hundig oba neg yatuk kamuhup fug. TUHAN de enelaheg esauk on deg ma, hiren folo-folo let nenebin ulug hwiruhup halug de Aren folo-folo let henebuhu.

²⁰TUHAN en de hit mamul henebikoho anggin on fam henebut bal-henepuk katsi. Famen ketia At de hit henesahalimu wereg ma, hit At hinim wereg anyo heneluk atuk.

²¹Hit anyo kobokwe anyo embesehup deg dahandoho wilibik lahup famen, henembol fil en ele hweag-hesauk kwit, “kobokwe re su wereg; kobokwe su mug hakiek” ulug hweag-hesauk karuhu.

²²Henenggembu ilit deg angge emas mel perak mel nim sapli deg angge etma hiren sing angge on hwik-esauk hagdoho hwik-esauk kwit, henele diroho uruk kwit hwik-esauk nu, “An welahimen hangge lakin!” Ulug hwik-esauk nu.

²³Hiren anggen a fole foruk kamuhup halug de feheleheg, anggen hum hamdoho yihikeg, hiren anggen hum hamdoho baleheg dukwag ulug de At TUHAN en osit mon hesa waharuk karuhu. Henowam angge fahet oho enggelangge lei kwe anggweroho etma fouk deberuk karuhu.

²⁴Sapi yohombuk mel, keledai mel heneyabukmu kwenang moholduk on omano nauk on oho it fahet mun ebe on neg eneko fouk debeseruk karuhu.

²⁵Heneselei on en enalehet sohwan-dulug enowarik kulug ap omano warenepukmu re duk-duk etma en mel dom-dom etma en mel ik dot-dot ahaik fululukdoho belap hesa waharuk karuhu.

²⁶Bigalem seleg de mo seleg hagdoho selehap henepuk karuhu, mo re nin salim yatuk on de hareg famen sabirenam eke nim mangnoroho yatuk mu hag aruhu, mo nukoho sabiren fam yatuk on misig mangno esalug nukoho misig fam yatuk on hag deg laruhu. Ai duhu alere TUHAN en omaliki ap enowatswa on eneyebilangge etma het enebeheg, hiling enebeheg, duhu salim ai aruhu.

²⁷TUHAN omamne mel Mun leho ale mel ai yatman enameg wereg. Indok mel, hobu mel de At olok wereg ale fahet unuhuk foruk. At it inim ele matuk mu ele ruruk on en de harep indok en nauk hag nauk karuhu.

²⁸Aren hol dam lauk kamin ulug mingming deberukmu ik fu enanggolop huli di su angge hohouk dil waharuk hag waharuk karuhu. Aren unggul unuk unggul unuk angge elehap debeseheg, iren siag on duhuk ulug wene melaleg wereg ale omano sebele feseheg, duhu.

²⁹Famen hit Allah omaliki on de nukoho humon mot-duruk kwit hup angge suni uruk hagdoho henahayeg duruk kwit suni uruk kamuhup. Hit de ap en ele furil lauk angge fam fu ril laukmu uluk-uluk TUHAN Israel on along bal-henepuk on anyo obam wirigmu etma lauk on en duruk hag henahayeg duruk kamuhup.

³⁰TUHAN en ele mun along on holukwag uhumu ap abirangge en mun nik aleroho hauk kamuhup, olok de indok harep nauk hag waharuk kwit, osit humon nim, osit helep anggen on mel, hol sielu mel, hahup.

³¹Ap homi Asyur on de TUHAN ele hol halug youk lahup, ne it fam unggum anggin on og-esahumu hahup neg.

³²It airoho enowatuk mu anggin hauk kweleg, it TUHAN omaliki on de waruk gendang ele doleleng deheg, kecapi ele ngureheg duruk kwit enahayeg duruk kamuhup. Allah amu en neg ap Asyur on nim dog yabuhu.

³³Raja Asyur on yaluhumu re, endamen angge foukdoho fesimu wereg. Obale aire ilonggo ahauk eleroho healegma e yalduk on ilim waroho kabog-kabog angge lahabeg. TUHAN en At onggwareg sat fam ik il selon belerang on fam hagdoho fisaruhu.