Read Ninia Yali YESAYA 31 Bible Online

YESAYA 31 - Ninia Yali bible

YESAYA 31

¹Ap o Mesir on en let-nenebukwag ulug heng-enebik lauk on aire alemat atuk kamag! It de Mesir on enomamne humon enangge kuda humdoho wereg ai fam nim, ap tentara esan lohwaleg ale ai fam nim, kuda iren on omamne hum deg ma enangge kereta oho humdoho wereg ale ai fahet nim enenda hembisi fousareg duruk. Famen de iren TUHAN Allah Israel on Mun amu eneg wereg on anyo fam dip debouk fug angge wereg lit let nenebin ulug heng duswa fug.

²TUHAN de enda wenggeleg on deg lit Aren nangginig ale dimin ulug oluk deg wereg. Aren de anggin ale unggum it kwasik ale duruk on mel ap it let enepuk on mel etma enobam foukwag ulug at olok en mondorik waharuk.

³Ap homi Mesir on aire we ap homi on it de Allah fug. Kuda iren foroho on etma we wereg ale on nik on boholma angge re fug. Aireg halug de TUHAN en anggin on enobam femin ulug duruk li em de unggul uluk let-enepuk on mel TUHAN en unggul unuk let-enepuk on mel enomamne eleg atlug enebe mundoho eleg amuhup.

⁴TUHAN en an nobam ele uruk kwit, “Singa en nauk angge sebeleg lit, it gembala esan lohwaleg omano at warukoho enele ngai-wai angge duruk on holduk kwit enele fahet akol duruk fug ai hagdoho re An den fobik Duk Sion anyo fahet weim yabuhukdeg sebeloho foroho laruhuk.

⁵Suwe eke en omalik a elma sebeleg lit ahwerabul lambuk-lambuk uruk hag, An TUHAN Mun Di ale su ale mun dihi ha ale neg deg lahi on anyo en o Yerusalem along baloho feheg, ibil aheg, ahap wendareheg, duhuk” ulug hweag-nitsi.

⁶TUHAN ele uruk kwit, “Henunggul unuk Israel on hiren An nele sahale folug, siag An nil hanim duruhup. Famen ketia sombandoho An nakit manik!

⁷Li andigim aik waruhu salim hiren kembu ilit angge emas on mel perak on mel hit henenggik fam mun siag on neg duruk kwit buhun-duruhup angge oma hwik-esahup.

⁸Asyur de fobik weim famen elehap debesehup, famen de ai ap homi enomamne fam de fug. Ap Asyur on dog elman heye longgo uhup deg ap sauwe on de ap enamingming on amuhup.

⁹It ene raja re akol en heye longgo uhu, ap sehen seneg enap perwira aren on de youk hemeg uhupdeg, it enautsi dog yapuk on fahet bendera omano lin-esalug longgo uhup,” ulug TUHAN o Yerusalem fam etman wam enda ahayeg howag ulug waroho yal-ereheg apne weheg, mot-deheg, duruk on anyo en mundoho ele isi.