Read Ninia Yali YESAYA 32 Bible Online

YESAYA 32 - Ninia Yali bible

YESAYA 32

¹Hakiek, li waruhu on fam de ap raja misig eke katukdoho neg melal-enepuk on waruhureg melal-enepukmu, ap enunggul unuk melal-enepuk on omano ohore katukdoho neg duruk kamuhup.

²It hundomog de hol mel sielu mel duruk en herag atuk mu hag aheg, ite ik iliangge fene wirig atuk on mel hag aheg, ite o leimu en helep humon wereg ma enalong bal-atuk mu hag aheg, duhup.

³Ap en fobik inil fu hahup deg inil hubun dahup fug, ne enesanggo hole fohup deg furebehup.

⁴Ap atam de enenda nauk on fam folo-folo duruk katswa on omano fobik enenda hambuk halug enenda wenggeleg fam duruk kamuhup. Ap ele hebu lareg on anyo fobik ele selegdoho matuk karuhu.

⁵Ap morue on de eke nim leho wereg boruk kamuhup fug, seiale uruk on de demdoho neg uruk on bohup fug.

⁶Ap sohou on de ele sohou-sohou ale matuk kwit, kwasik ale melaloho foruk. Mun-man ale uruk kwit mel duruk kwit mel de Allah siahap deberuk kwit hag ale neg uruk kamuhup. Aren ap siburu obok on ik obok on og-esauk karuhu fug.

⁷Ne, ap seiale uruk on ai wenggelduk ale mel duruk ale mel de kwasikdoho on neg duruk. Aren de ap enenggik eleg on omano ele seiale fam it enangge on omano hwela no ulug lal-enepuk.

⁸Famen de fano ale neg wenggelduk on de duhuk ale ulug eberoho foruk kwit nim, duruk kwit nim de fano ale fam neg duruk.

⁹Hit homi anggin-fanggin eleg angge welahep on mel anggolo ha fug angge welahep on mel etma holiek!

¹⁰Ketia hiren nit fano welahe boruk kahep famen, tahun misig fam ane etare anggur anggen dahanuk fug aleroho aheg, kwenang fam en anggen yihig mun eleg aheg, duruk mu hit henenda fituk kamuhup.

¹¹Ketia huli su hit heneluk fanoroho welaheg, anggin angge elegma hit we koloroho welaheg duruk kahep. Famen ketia henakolen henowag eleg duruk kamek! Henasum nonggoloho embeselug, kain karung on belahi sum bahaluk bug dalug welamek.

¹²Heneyabuk yahoma mun hesilig on omano mel, heneyabuk anggur fahet anggen anduhun kwaniroho yihirukmu on omano mel de kwenang an nunggul unuk on en omano re enggelangge mel alog angge mel wilibeheikma re, oba yatuk kamek.

¹³Hit henobam wirigmu ap homi enahayeg duruk kwit wereg ma mel, ne henobam kota ap homi enanggiluk duruk kwit neg wereg ma mel omano fahet oba yatuk kamek!

¹⁴Istana raja obam bumbuk oho lin-esahup, kota indipmu anggiluk deg ma omano re dereng-dereng uruk karuhu. Ap elegma birim uhu. Duk mel ap homi kahal enesugmu leho on omano mel de sebeloho li mundoho-mundoho fahet kwenang nim ambi higit aruhu. Keledai omano maro on mel, domba mel de kwe etma noruk kwit enggelangge nauk kamuhup.

¹⁵Famen de eke nim Allah fobik omamne fam waruhu. Mu re lei kwe etma yabuk hesilig kwe on debehu, ne yabuk yaho kwe etma ohwei kwe hag debehu.

¹⁶O kwenang etma abirangge fam katukdoho duruk on neg mel bekitdoho duruk on mel neg duruk kamuhup.

¹⁷Ap enebe hundomog en de demdoho ale neg durukmu re li mundoho-mundoho etma fam liog-lombukdoho welaheg, enahayegdoho welaheg, duruk kamuhup.

¹⁸Allah omaliki re anggin-fanggin on fam omano en wundet amuhupdeg liog lombukdoho kin-kaindoho neg welamuhup.

¹⁹Aireg ma hit fahet ik yabuk yaho kwe sako duruk on de wereg laruhu. Hit henowam enggela nauk on de ekema-ekema etma hesangge lombukdoho nauk kamuhup. Famen de hit heneselei on de fobik osit helep on en enowaruhu, ne it enobam kota re wendal aruhu.