Read Ninia Yali YESAYA 33 Bible Online

YESAYA 33 - Ninia Yali bible

YESAYA 33

¹Nit neneselei enap etma alemat atuk kamag! Niren it enangge delduhuk fug famen nenengge del dul ulug duruk, hwenaroho duruk fug famen iren hwenaroho duruk. Famen iren deleheg, hwenaroho deheg, dulug de it enonggwareg enebe at ap en del enepuk on aheg, hwenaroho enepuk on aheg, duhup.

²TUHAN nenakni, nit nenelaheg nenebin o. Hat de nit nenenda ebereg on welahen. Di salim su salim etma Haren nenalong bal-neneplug nenenda fit atuk li em nenahap wendat-nenepuk kamin.

³Hat inatlug hele mil duruk on holukwag ulug duruk li em de it enenggul unuk enunggul unuk angge omano heye longgo uruk kwit deg-bog uhup.

⁴It de bulue esan lohwaleg en duruk hagdoho it wereg ma mon halug kulug enangge del-dauk kamuhup.

⁵TUHAN de at mun leho on en, di angge su angge akniroho foroho wereg; Aren de wene melaleg nim katukdoho duruk on nim o Yerusalem fam omamne debehu.

⁶At omaliki on fahet de lioleg on welamag ulug og-nesahu, nit nenangge nenahap wendaruhu anggere enenda wenggeloho deheg, enoluk aheg, TUHAN fam along bolug deheg, duruk on ai.

⁷Ap enambog se on sehen anggen on en let-nenebin o ulug hwiruruk kamuhup; enambong seroho wongdoho welamul ulug enabi fam duruk on omano re enehumu siagdoho oba yaruhup.

⁸Kobokwe humon fenere ap homi mundoho lauk eleg birim deg ma re enamelmel neg aruhu. Sali dahandoho deheg, enele seberoho matuk on omano embeseheg duhup. Ap en etma fahet furebelug duruk on eke welamuhup fug.

⁹O kwenang mundoho embesehupmu re ap eleg laruhu. Dom Libanon ohwei mundoho abiruhu, O Saron fanggong mun hesilig kwe etma re lei kwe hag aruhu. O Basan kwe mel Dom Karmel fene mel de enggelangge loloho wamburuk karuhu.

¹⁰TUHAN en unggul unuk ai fam uruk kwit, “Ketia An in atlug An nalong welahi ale anyo unug-esamin.

¹¹Wene hiren melaleg lahep on de alemaroho ne di ale su ale hiren duruk kahep on de ambiangma eke wereg fug. Hit henolok etma re indok hit henebe han yal-henepuk on hag deg lahep.

¹²Hit de helep dimeng amag ulug iliangge on werako foruk hag deg lahep; alog ahan filigdoho indokma kwelapukmu nauk anyo hag deg lahep.

¹³Ap homi abirangge horogma on et yatma on et An nomamne welahi ale mel an den duruk kahi ale mel fahet fag-duruk kamag” isi.

¹⁴Ap siag duruk on o Sion wereg on etma enakol en enowag elek duruk kamag. It enele uruk kwit, “Allah en wene balduk alere indok ambulbul hundig-hundig ulog duruk hag deg ma re, ap eke en indok ambulbul han werag enepuk on ai famen hambuk hahup on wereg a?” Mun eleg uruk.

¹⁵Hiren lahe henele uruk ale mel duruk ale mel demdoho neg duruk halug de ai fam en hit hambuk hahup. Hiren nit alongdoho hwelaul ulug ap homi enenggik eleg on enangge henomamne fam deloho hwela fug ne uang enenggik apmane hwelauk on wauk kam fug. Ne, ap enolok ale dul ulug wene balduk on mel ap waruhuk ale ulug weim abog uruk on mel ininim duk fug.

¹⁶Airoho duhup fug halug de hit henebe henalong baloho welaheg, henakol eleg angge welaheg, deg lit hiren de o fak lehet omamne on ohoma wereg lit hag deg lamuhup. Henesiburu mel henahaik mel fouk deg wereg laruhu.

¹⁷Fobik higit aik waharuk salim de o kwenang ambiang-ambiang unggut-unggut diahan deg on au fam ap raja misig en mun anggilukdoho melal-enepuk karuhu mu hinil hahup.

¹⁸Ap di angge su angge fahet kwenang onggo wauk on mel ap yabuk lehoma duruk on mel, ap bohon kahal henusug welamuhup on mel fam hiren henakol enepuk kahep on etma re airoho nenepuk katswa anyo ulug ebet hauk kamuhup.

¹⁹Hiren ap bog on enobabut nong-hong deg on enele oho hit henapeleg on uruk on eke enesauk kamuhup fug.

²⁰Kota Sion hiren agama fahet ebetuk kwit pesta esetuk kamuhupmu etma fu hauk kamek. O Yerusalem oho fu hauk kamek! O etma fam wereg lam alere mun hambuk deg. O aire o sabo hihiloho amumu feik lauk fug on hag, bebug enggik sen angge belabeg on de heneruk fug eleg angge melaheg, ne sabu lilig on de kong-duk fug angge welaheg, deg ma etma hinil fu hauk kamek.

²¹Etma nit nenakni TUHAN ebe along wereg ale unug nesaukmu hahuk. Nit ik anggwe on aegma ap selei enap[43] kapal de nit wereg ma walug kwik wam fug alereg ma welamuhuk.

²²Kapal iren on fam duruk angge ilonggoma etmano re duk fug alereg laruhu; sum kapal fam hol fahet lahapuk on anyo re wirili foruk kamuhup fug! Nit nenaselei on enangge etma re niren del dahukmu re mun hum-ham alereg laruhu, ai fam de ap eneyog holu on hag oho it dohon hwelauk kamuhup. TUHAN amu neg nit nenobahet raja welaruhu; Aren de melal-nenebeheg, wene melaleg wereg on omamne debeheg, nit nenebe selei on fam en del nenebeheg, duhu.

²⁴Nit nenobam oman ap misig en oho ouk en ulug nenek duruk karuhu fug, ne siag abirangge re mun apelehapdoho fohu.