Read Ninia Yali YESAYA 34 Bible Online

YESAYA 34 - Ninia Yali bible

YESAYA 34

¹Yaho hit unggul unuk unggul unuk angge etmano watlug holik manik. O kwenangma abirangge nim, ne kwenang fam oluk wereg angge abirangge inim mundoho watlug holik wamag.

²TUHAN en ap unggul unuk abirangge omano nim, ap esan-esan angge omano nim, berenepuk. Aren it unggum og-esalug elehapdoho fesehu.

³Enebe wareg etma sal-enebuhup fug deg we hesangge kwe waroho besehumu filik atuk kwit amben sang uruk kamuhup. It enamep ik fu hag lauk kwit dom-dom etma mundoho mep neg aruhu.

⁴ Mo, bigalem, sohwalanggen mel luluhun-lalahan aruhu. Bohol de enggelangge hulilip esauk hag hulilip aruhu. Sohwalanggen de e enggela owag famen lolheg wambik waharuk hag lolheg wambik waruhu.

⁵ TUHAN en boholma karog foukdoho fesireg wereg, anggere ketia karog ai fam de unggul unuk Edom on fam unggum onggo enobam belabik waruhureg elehapdoho fesehu ai.

⁶Karog TUHAN en on ai fam de wam waroho senggeldukmu hag enamep en het-bet deg ma, enasei dig-dag uruk karuhu. Aire TUHAN en o Bozra fam etma waroho fouk debeheg, ne Edom kwenang fam etma ap enebe humdoho ahum bouag eheg duhumu deg laruhu.

⁷Ap homi fobik enowaruhu alere no lembu il bolog on mel, sapi ket sauwe on mel hag. It enobam sili re enemep nim enesei nim en hopo uhu.

⁸Ai salim neg TUHAN en Sion ili weheg, aselei on fam olok wereg on anyo fahet enowareheg duhu alere etma.

⁹Ik o Edom fam wirig atuk on etma aspal neg debehu, kwenang de il selon neg aruhu mu ambiangma re o abirangge fam ambulbul aspal hal on neg laharuk karuhu.

¹⁰ Ambul bul ai hubanggo nukoho nim nahul atuk karuhu fug, hobure hundig-handig etma laharuk kwit neg wereg laruhu. Kwenang ai di on su on duk fug angge embesehupmu, li mundoho-mundoho etma lei birim deg laruhu.

¹¹Suwe siyomayo mel dabi hag on landak mel, suwe sumusumu mel, suwe gagak mel etma welaruhu. TUHAN en kwenang ai wal-duk fug li deg latfag hag yin-hun debesehu.

¹²Raja en o ai eke melal-enepuk karuhu fug, ne ap melal-enepuk on enebe mundoho elehap[44] debesehu.

¹³O kota sili buhun bahan deg kwe omano mel, kota fak lehet helep fam omamneroho oho kwe omano mel de mulip alog humdoho hopo uhu, ne osuk angge en somun aruhu mu olomene nim suwe huhubi hag on unta nim neg wereg lamuhup.

¹⁴Mene olok on omano etma ebe hesangge noruk kamuhup. Sumusumu enele wurep-wurep uruk kamuhup, sumusumu hupanggo[45] noruk on etma kel wat-daukmu heradauk kamuhup.

¹⁵O etma kisu aeg en bal-enepuk on anyo ena wiri folug sahaun deg lit anggen endereheg, omalik ondoho hwaldeheg duruk kamuhup. Suwe alep alep etma ahun ohwe domog welamuhup.

¹⁶Buku TUHAN en on herarulug bilinggiek: Enoluk oluk angge wereg etma misig oho eke longgo uhu fug, ite ahun amu ohwe amu welamuhup fug. Airoho welamuhup ulug TUHAN en ele melale fesimu re At amu en neg it enebe andogdoho fesehu.

¹⁷TUHAN en o kwenang ai hundomog yohwan esasimu it etma enebe domog it dohon hwelalug, it enebe etma li mundoho-mundoho wereg ma, kwenang aire li lahaik-wambuk etma it enangge atlug welamuhup.