Read Ninia Yali YESAYA 35 Bible Online

YESAYA 35 - Ninia Yali bible

YESAYA 35

¹Dom lekma nim, kwenang iringgig mu nim, fobik enahayeg hahup, o wal kwe etma owil-owil angge owil fehelduk karuhu.

²Lekma etma anggweroho wiriluhumu, enahayeg en suni leg hauk kamuhup. Ilmu buhundeg alere dom Libanon buhundeg hag, ilmu masiban deg alere Karmel fanggong mel Saron fanggong mel, hag. Airoho deg ma ap enebe domog en nit nenakni TUHAN omamne anyo hahup, nit nenakni Allah along wereg ale hahup.

³ Henggik omamne eleg on hambuk dakin, helenggen dalo-falo urukmu wirik dakin.

⁴Enenda dot atlug wereg on fam hweag-esauk kwit, “Henakni Allah en de it selei on unggum og-esaroho waruhu, Aren hit henahap wendat-henebikoho waruhu, anggere henenda hambuk dalug henakol eleg angge welamek” hweag-esauk kamek.

⁵ Eta li em de ap inil hupnig on ohore inil heheg, ap enesanggo dahom on enesanggo holeheg, duhup.

⁶Ik eleruk fulohomdoho o lei kwe waheg, ne ik wirig atuk on wal kwe waheg, duruk en ap homi enawe sahareg on de no rusa en hweik solog duruk hag duhup, ne enele hobu lareg on de enahayeg en duhup.

⁷Iliangge ahanhan on omano iksene yenggel aheg, kwenang kelog deg kwe omano ik eleruk-eleruk angge fulohom deheg, duhu. Atam olomene wereg latsi mu omano re, fobik kilime mel, kemkem mel wilibuhu.

⁸Etma kobokwe humon welaruhu, “Kobokwe enahap wendat atuk on fam lauk kwe” ulug unuk on ai welaruhu. Ap siag duruk on de kwe ai fene lauk kamuhup fug, ap morue on en ap kwe ai fam[46] laukmu kwe nale feseruk kamuhup fug.

⁹Etma re singa oho no mene olok on amu on oho welaruhu fug Ap homi TUHAN en enahap wendat enebuhu on kobokwe ai fam lauk kamuhup.

¹⁰Ap homi TUHAN en enahap wundet enebuhu on de sombandoho o kota Yerusalem enahayegdoho kwik waharuk kamuhup, it enahayeg humon aruhu mu enorohole heaneroho neg wamuhup. Iren enahayeg deheg, enanggiluk deheg, durukmu; Enenda fu en duruk on mel, anggolo-fanggolo hauk on mel mundoho eleg aruhu.