Read Ninia Yali YESAYA 36 Bible Online

YESAYA 36 - Ninia Yali bible

YESAYA 36

¹Hizkia ap homi Yehuda on fahet raja inatfagdeg wereg kweleg tahun empat belas on fam deg li re, Yehuda fam kota- kota fak lehet omamneroho oho on omano Sanherib raja Asyur on anyo bin kwik watfagdeg sebeloho febag.

²Ai mundoho debebagdeg at ebe o Lakhis wereg lit de ap sehen seneg enap perwira leho on autsi tentara esan humdoho nim o Lakhis en, o Yerusalem Raja Hizkia an napma amagdoho hweag-irik lakiek ulug mon-enebik watfag. Watfagdeg de it enebe o Penatu yabukmu, ik sene emberim fil en wambik waharukmu ik kalog hwaleg on horogma etma watfag.

³Watfag ma re Hizkia apma yabuk duruk on pegawai henahan de ap Asyur on sehen senag enap etano enakit lebag. It pegawai henahan eta enebe re, Elyakim hun Hilkia amloho raja obam olma yabuk duruk on fahet kepala welatfag on anyo ha, Sebna negara ai fahet lisu balduk katfag on anyo ha, Yoah hun Asaf amloho raja obam olma fahet lisu balduk on welatfag on anyo ha lebag.

⁴Lebag ma Asyur enap sehen foroho enap etano en uruk kwit, “Hizkia fam de raja Asyur on en eheik ale su hweag-umuk. Raja en uruk kwit de, ‘Nunggwelug haren an nomamnereg lahi boruk kahen?

⁵Haren boruk kwit de enele neg uruk eta fam de ap tentara en duhuk ale ulug wenggele folug duruk on mel tentara enomamne deg ale etma mel higitdeg boruk kahen a? Hat de sa fam henda hembisig lit raja Asyur on nim wal-wal atmin ulug duruk kahen?

⁶ Haren de Mesir en let-nabuhu ulug henda ebereg lit duruk kahen famen, aire ap en domuk fahet walengge on fam domuk duruk hag; deg ma re domuk anyo somboril laukem de hat henggik folog duk alereg. Ai hagdoho re raja Mesir aire ap en at enenda ebereg wereg on fam debesouk alereg,’ eheik ulug hweag-umuk” ebag.

⁷Airoho ebagdeg Asyur enap sehen seneg enap etano en nikangge uruk kwit, “Ite haren de hakni TUHAN Allah fam henda ebereg lit duruk kahen ano? At Hizkia en ap homi Yehuda on mel Yerusalem on mel o Yerusalem mezbah olohotma etmano TUHAN obahet dukwag ulug miming-enepsimu re, elehapdoho fousa on de Mezbah TUHAN amu obahet og-utlug forukmu anyo re fug no a?

⁸Ketia an den raja Asyur on unuk fam nambong se angge wal-wal amul en uruk kahi au. Hit henebe kuda dua ribu en og-hesaman de ap hiron de eta higitdoho kuda walug lauk on am fug alereg.

⁹Ne, ap perwira Asyur on inim wal-wal amul ulug de it horog maben on nim wal-wal aman ohore hit nim de ilit deg fug. Famen de hiren de Mesir en kereta dog yapuk on mel ne ap kuda fam lahalug dog yapuk on mel mondorik wamag ulug ebereg lahep!

¹⁰Hiren boruk kwit de niren hit henanggwenang au henowarik watlug henalong elehapdoho henobahauk ale aire TUHAN en nit let-nenepuk fug boruk kahen a? Nit de TUHAN ebe en at hit henowarik kwik watlug henalong elehapdoho henobahaukwag ulug mingming nenepsimu duruk kahe” ulug ebag.

¹¹Airoho ebag ma it Elyakim mel, Sebna mel, Yoah mel etano en perwira Asyur on etano fam uruk kwit, “Nenowe haren de Aram enele fam hele marin, nit de Aram on enele nenoluk deg ma fureberuk kahe, haren Ibrani enele fam uruk men de ap homi o kota fak lehet emberim kwe wereg on etman fureboukohoreg” ulug hweag-etfag.

¹²Airoho ebag ma perwira Asyur on anyo en onggo uruk kwit, “An raja Asyur on en mon-nabik waharuk kwit wene abirangge oma re hit nim hit henowe raja nim fahet neg hweag-hesowag ulug mon-nabik waha a? An den de ap homi o kota fak lehet fene hwerieg wereg on, hit hinim seberoho henonggwareg henal wiroho nenggeg, henonggwareg henamie siroho nenggeg, duhup on ai fahet nim uruk kahi”.

¹³Airoho ebagdeg perwira leho on anyo inatfagdeg Ibrani enele fam ele hwiroho uruk kwit, “Raja Asyur on en eheik ale su holiek,

¹⁴Hit de Hizkia en lal-henepuk on fahet henambono am fug! Aren hit del henebuk fug alereg!

¹⁵Hit TUHAN fam henenda ebereg welamek ulug henendama kwelapuk on etma fahet holuk fug. Hiren de TUHAN en nit del-nenebeheg, tentara Asyur on en hit henobam kota sebelik kwik wam no ulug kwe bale feseheg, duhu ulug bouk fug.

¹⁶Hiren Raja Hizkia ele holduk eleg! An raja Asyur on en de hit henebe henobam kota famen wilibik watlug de an napma aik manik. Hit airoho duhup halug de fobik hiren henahan anggur anggen henonggwareg heneyabukmu en nenggeg, ne arah anggen henahan fam en nenggeg, henahaik bohwe henonggwareg en on fam en nenggeg duruk kwit weregman neg de

¹⁷an den hit henanggwenang de hiren on nim higit-hagat deg ma etma oko henobahaik lahuk. Etma re anggur hit henobahet yihiruk on mel, gandum yabuk fam en hit henobahet tepung werehap deberukmu hit nauk on fahet wereg.

¹⁸Hiren Hizkia ele holduk eleg! Aren de hit lal-henepuk kwit de TUHAN en nit del-nenebuhu ulug hweag-hesauk ai. An nenggik apman de dewa enunggul unuk amu on en fam enobam del-enepsi ale eke wereg a?

¹⁹Dewa o Hamat on mel Arpad on mel omano re kema wereg? O Sefarwaim on dewa omano kema wereg? It etman o Samaria ahap wendarik wahausa on wereg a?

²⁰An nenggik apman de dewa o ke on en loloho wilibik wahasi? TUHAN en Yerusalem ahap wendaruk alereg ulug a? Eleg” ulug ebag.

²¹Airoho urukmu holfagdeg de ap homi Yerusalem on de Raja Hizkia en henele uk fug ulug hweag-esebag ma re enele onggo uk fug angge bok welatfag.

²²Ma re Elyakim nim, Sebna nim Yoah nim etano enenda hesilduk kwit enegdoho re enesum dilip-dalap esebagdeg, de perwira Asyur on en ebag ale omano raja akit hweag-irik lebag.