Read Ninia Yali YESAYA 37 Bible Online

YESAYA 37 - Ninia Yali bible

YESAYA 37

¹Ap henahan etano en Raja Hizkia olukdoho ulug hweag-irik kwebag on omano esanggo holfagdeg aren asum deneloho hwik-esebagdeg fong watuk kwit ulug eneg aleroho re sum karung on wandoho re o TUHAN Obam wirigmu etmano lebag.

²Lebagdeg de aren hun Elyakim raja obam fahet kepala welatfag on anyo nim, Sebna negara fahet lisu balduk on anyo nim, it imam eneyabuk lehoma wereg on nim de Nabi Yesaya hun Amos amloho anyo akit lowag ulug mingming enepfag ma re it oho sum karung on wan-debagdeg lebag.

³Laukmu re at Hizkia en Yesaya hweag-umuk ulug wene febag on de su, “Yoho sure nit fong waroho welahe salim; nit de unggum og-nesalug al belesim wat-nesehesa. Nit de hwe omalik endetmin duruk famen omamne eleg atuk mu duruk on hag welahe.

⁴Raja Asyur on en de Allah oluk wereg on anyo sebeloho foukwag ulug autsi perwira leho on mon-enebik waha. Ma re iren sebeloho fehesa on aire Allah mundoho esanggo holeheik angge Aren it enele ehesa enap ai unggum og-esa lam a! Deg anggere ap homi niron enoluk wereg on oma enobahet somban Allah fam in” ulug ebag ma re walug lebag.

⁵Lebag ma at Yesaya en de raja en wene mondotfag on anyo webagdeg aren oho onggo raja fam

⁶hweag-irik lakiyug ulug diroho ebag, “TUHAN en uruk kwit, nakni hat de it raja Asyur on amingming angge duhuk ale ulug mel, ne TUHAN en nit fiselaroho nenobahaku fug ulug mel ehesa on etma fahet hakol duk fug.

⁷TUHAN en de wene ulug-walug ale eke raja Asyur on esanggoma kwelabik lil laukem de at ebe obam lahureg duruk men obam etman ebe binggi waruhup eheik” iyug ulug mondotfag.

⁸Asyur on perwira leho on holduk men de owe raja re o Lakhis embeselug de o Libna kota horog eta wereg on nim dog yapuk urukmu holfagdeg aren owe raja nim ambi atmin ulug lebag.

⁹Ne, raja Asyur on esanggo holduk men de ap Mesir on de esan lohwal heheikdeg hun Tirhaka Sudan ahun anyo en lit-eneplug nit ninibil waharuk urukmu holfag. Ai fam de raja Asyur on en surat baloho Hizkia,

¹⁰raja Yehuda on fam mondorik waharuk kwit diroho baleg latfag, “Hat de an nenggikmu aruhuk fug ulug hakni Allah en sali hweag-nitsi ulug seiale hapuk on fahet At fam henda hembisilig lit welam fug.

¹¹O kwenang raja Asyur on en enowarik kuruk on etma re mundoho luluhun deberuk ulug urukmu hat mundoho holduk kahen. Anggere haren boruk kwit an noluk lil aruhuk bouk fug.

¹²An nombasi en kota Gozan mel, Haran mel, Rezef mel luluhun debelug ap homi Eden enap o Telasar wereg on enowatuk li em de dewa iren on en eke del enepsi fug.

¹³Raja kota Hamat mel, Arpad mel, Sefarwaim mel, Hena mel, Iwa mel etma re kema wereg?” ulug baloho mondorik watfag.

¹⁴Ma re Hizkia en surat anyo webagdeg kumurebag. Kumu halug de aren o TUHAN Obam wirigmu lebagdeg surat anyo TUHAN olohotma liminggoho febag,

¹⁵airoho febagdeg aren somban diroho ebag,

¹⁶ TUHAN nakni di ale su ale duk ale neg deg lahen on, Allah ap homi Israel on nakni, “Hat hebere kerub [47] emberimmu hwerieg welahen. Hat hamu neg de Allah kerajaan kwenangma wereg on enemberimmu welahen, nakni. Bohol inim kwenang inim Haren neg wal-dirihin.

¹⁷TUHAN nakni, nit nenobam atuk ale ai fahet fu-nenobahain. Hat Allah holuk mundoho welahen on hobam Sanherib en sebeloho hobaharuk ale ai hesanggo holin.

¹⁸TUHAN nenakni, ap raja Asyur enap en enunggul unuk humdoho nim o kota humdoho nim luluhundoho foruk katswa ale nit mundoho nenoluk deg.

¹⁹Airoho duruk kwit de enanggembu dewa omano en duk ale wereg fug mu re we han yaleheg, luluhun eseheg, duruk katswa. It etma re e on nim helep on nim ap en laloho foruk katswa angge.

²⁰Nenakni TUHAN Allah, ap homi kwenangma enunggul unuk wereg on etman we Hat hamu neg TUHAN welahen ale anyo enoluk amag ulug ap Asyur on ai fam en nit wendare nenobahain” ulug somban ebag.

²¹Ai en at Yesaya en de Raja Hizkia fam aren somban ebag on anyo fahet onggo mondotuk kwit,

²²TUHAN en diroho eheik ulug mondotfag, “Sanherib ao, kota Yerusalem en de hat unda yag-hapuk kwit hahummu het kwelapuk!

²³Haren de ai sa fam hal belesim wareheg, sebeloho feheg, duruk kahi boruk kahen? An de Israel on enakni Allah, Allah nebe namu eneg welahi on anyo.

²⁴Hat hele en werahap hauk kwit, hat hangge kereta dog yapuk on humdoho wereg ai fam de dom-dom o Libanon fam leho on etmano sebeloho foruk kahi ulug yonggo mon-enebik wahen ai. Haren de e wali ebe on mel mun yaron mel mureheg, ne ohwei ahako on fam kweheg, dirihik ulug hawonog atuk kwit uruk kahen.

²⁵Ne, eke haren ik bohwe ele habuleheg, ne ap bohon enahaik it enobam omano en nenggeg, hat hautsi sehen seneg on en de Ik Nil anyo sobit-sabat esausa ma re mun firog atsi ulug leho fahat-dauk kwit uruk kahen.

²⁶Etma aruhu ulug An den o endam et wenggeloho ferihik ale aire hat de hesanggo holduk kahen fug a? Airoho ferihikdeg ketia duruk kahi ai. An den neg haren o kota fak lehet omamneroho oho on etma luluhun debelug meiyaleg neg kabog laharuk kamagdoho debesein ulug halongap hobaharihik.

²⁷Ap homi etma wereg on de iren duk fug ale atuk katswa, ite youk lalug enekol en duruk katswa. It de enggelangge o leimu mel o dummu wilipuk on mel hol ahanhan on timur fil en fu ha waharukmu iring atuk hag atuk katswa.

²⁸Famen de di ale su ale hat fahet de An mundoho noluk deg. Ne, hat lauk kahen kwe mel, duruk kahen ale mel, de An noluk deg. Ne, haren An nobam holok napuk kahen ale oho An noluk deg.

²⁹Haren leho fahat-dauk kwit holok duruk kahen ale etma An mundoho holdihik. Ketia re an den hambiangma kwandi ware feheg, hambilikmu sabu lili feheg, debelug kwe hat waharihin kwe ai en lit haplug hobam lahuk en duruk kahi eheik” ulug mondotfag.

³⁰Eke Yesaya en Hizkia fam wene diroho mondotfag, “Hat hobam eneg ale aruhu on de. Tahun su fam nim tahun fobik on fam nim de ap homi gandum amu wilibig on nauk kamuhup. Famen de eta nalug de ap homi en gandum mel anggur mel yareheg, dulug anggen yihig omano nauk kamuhup.

³¹Ap homi Yehuda on enoluk wereg on etma re a yatuk on omanggen yatdoho wambulug anggen mel yihiruk omano hag it enebe fam sigdoho welamuhup.

³²TUHAN Mun Along on anyo airoho aruhu ulug mundoho eneko fesimu re o Yerusalem fam nim, duk Sion fam nim de ap foma enahap wendat aruhu.

³³Ne, TUHAN en raja Asyur on fahet isi on de su: ‘Aren de o Yerusalem kwik waheg, dog kota ai fam leheik waheg, duhu fug. Ap sehen seneg enap dog bei angge seneko re o kota ai horogma eke aik wamuhup fug, ne o ai maseroho etma re ap en maseroho kwelabehe ulug indip wirig laruhu fug.

³⁴Raja Asyur on aire o kota fam kwik wam fug angge kwe wahasi kwe en obam nikangge lahu, ulug An TUHAN en nele mundoho ihi.

³⁵Kota Yerusalem aire An den namingming angge Daud nim sali wat-wat atuhuk on fahet, ne An nonggwareg nalong welahi ale anyo nalong baloho re An den kota along baleheg, ibil aheg, duhuk.’ Isi” ulug mondotfag.

³⁶Airoho mondotfag ma re hup anyo salim neg malaikat TUHAN ap Asyur on en o sabo salegma etmano watfagdeg ap sehen seneg enap enebe 185.000 en enowatfag. Enowatfag ma re hubet sekandoho re ap wareg omano ilang-bulang uruk katfag.

³⁷Airoho deg latfag ma re raja Asyur on Sanherib anyo hihil atfagdeg sombandoho re o Niniwe lebag.

³⁸Nukoho eke salim at ebe anggembu Dewa Nisrokh indipmu etmano aren obahet ale duruk men de, at ebe hun Adramelekh nim Sarezer nim at omaliki etano en karog fam daloho watfag. Ma re Esarhadon amloho eke amu on at obalma raja inatfag.