Read Ninia Yali YESAYA 38 Bible Online

YESAYA 38 - Ninia Yali bible

YESAYA 38

¹Eta li em de Hizkia ouk humon webagdeg waraikoho durukmu, Nabi Yesaya hun Amos amloho anyo en ha lebagdeg hweag-utuk kwit, “TUHAN en uruk kwit de hun hat hebe fano aruhun fug angge re yabuk haren duruk kahen on etma mundoho hwale fein. Hun hat de anunuroho welam fugmen wararuhun” eheik ulug hweag-etfag.

²Hweag-etfag ma Hizkia alukwe soluk oko atfagdeg somban uruk kwit,

³“TUHAN nakni, an sure mundoho Hat hobahet nasukun kaindoho nenda bekit fam duruk katihik on ebet hakin. An den de Hat henda boruk kahen ale neg duruk katmin ulug nabiroho duruk katihik” ulug somban ebagdeg Hizkia ebe oba siagdoho yatfag.

⁴Yesaya mundoho lebag ma TUHAN en nikangge

⁵Hizkia akit lalug wene diroho hweag-irik lakin ulug hweag-etfag, “An TUHAN Allah, homba Daud en napne wauk katsi on anyo en de haren somban ehen on mel hilue wambeheik on mel nil hihi. Mu re An den hat hebe holuk eke nim welamag ulug lima belas tahun eke dopno-debehi.

⁶Hat nim kota Yerusalem au nim de An den ap raja Asyur on enggikmu angge del henebuhuk. Kota au An den sebeloho foroho laruhuk” eheik ulug hweag-irik lebag. Ai en Yesaya en ap fam de Hizkia fano amagdoho re e ara anggen fam Hizkia ambot fene dag debeheg aro deheg dik lakiek ebag. Airoho debag ma Raja Hizkia en hein og-hauk kwit, “An nebe fano aruhuk ale mel, ne an nikangge TUHAN Obam wirigmu lahuk ale mel etma fahet eneg ale re ke?”[48] Ulug ebag.

⁷Yesaya en onggo uruk kwit de, “TUHAN en hun hat fam eneg ale og-hereheik on de Aren sali watsi ale anyo dip-debehu ai.

⁸Mo unug esauk angge jam Raja Ahas en hilinggisi on ai fam de apumag ai TUHAN en huli num en fam ambol fil hihiloho feik waruhu” ulug ebag ma re ahohwe anyo huli num en hihiloho febag.

⁹Hizkia mundoho fano atfagdeg suni apne wauk kwit balfag on de su:

¹⁰“An den uruk kwit, nebe umur bul deg kweleg lahuk ai, nebe ambiangma noluk wereg on ulug etare ap waratlug laukmu omano en eleg aik lahu.

¹¹An den uruk kwit, o kwenangma suman TUHAN nil hahuk fug, ite ap kwenangma on nil esahuk fug.

¹²Noluk welahi on anyo kongdoho laukmu, an nebe eleg aik lauk on horog aik waharuk, ap domba hwalduk on enobam sabo meiyalduk hag; sum hekel wutuk angge fam en kong-duruk hag; an den boruk kwit noluk[49] welahi on au Allah en fotog-fotogma debeheik behimen.

¹³O hup angge an nebe ouk en ngaruruk kahi, an nowag no singa en erap durukmu hag; an den boruk kwit Allah en noluk welahi on ambiangma debeheik behimen.[50]

¹⁴An nele re obuk-obuk omamne eleg-eleg lauk, suwe muluk en ele hunu ale urukmu hag duruk kahi. An nil bohol fil neg lahabegman de nil ouk napuk, TUHAN nakni anggin on au famen fiselaroho nobahain.

¹⁵An den keroho ihi ha alereg? Su re TUHAN en disimu; nenda hesilduk en de nohouk fug ale napuk.

¹⁶TUHAN nakni, Hat hele fam nim haren duruk kahen fam inim an noluk og-nimin; an de Hat hobahet neg noluk welaruhuk.[51]

¹⁷Asig anggolo hauk kahi on eta ahamdoho re nenda se on aruhu anggin ale fam en Haren del-napuk kahen;[52] An nasiag abirangge haren neg hapeleg-apdoho nobaharuk kahen.

¹⁸Ap waratlug laukmu etman Hat eke mot-hapuk fug, Ap wareg on en de Haren dipdoho neg duruk kahen ale anyo nenebukwag ulug ebereg wereg fug.

¹⁹An den yoho duruk kahi au hag, ap homi enoluk wereg on en neg Hat mot-habuk alereg. TUHAN nakni, Hat dipdoho neg duruk kahen ale anyo fahet, ap enaknisi en enomalik fam dindil esauk.

²⁰TUHAN nakni, Haren neg an hiling napihin; Ai fam de niren nenoluk wereg lamuhuk huli etma fam, binggong kecapi kong-duruk kwit, Hat hobam wirigmu etman motdeg suni uruk kamuhuk” ulug suni felaloho ebag.[53]