Read Ninia Yali YESAYA 39 Bible Online

YESAYA 39 - Ninia Yali bible

YESAYA 39

¹Li eta fam de raja Babel on Merodakh Baladan hun Baladan amloho anyo holduk men de, Raja Hizkia ketia ouk wauk katsi on anyo mundoho fano atsi urukmu holfag. Holfagdeg de aren ap surat mel dangdoho ulug mel walug Hizkia akit og-irik watfag.

²Watfag ma re Hizkia en enda fano fam ap watfag on etmano og-enepfagdeg at angge enggik weregdoho deg angge, emas, perak mel amben-amben angge mel, ahalue amben fano on mel, autsi sehen foroho on en dog yapuk angge enalili angge mel unug esebag. Aren de di angge su angge o at raja ebe wereg ma mel ne aren melal-enepuk katfag ma kwenang ai fam mel welatfag on etmano eke embesouk fug angge abirangge unug esebag.

³Ai en Nabi Yesaya Raja Hizkia wereg ma kwik lebagdeg hein og-hauk kwit, “Ap etma re keman wahesa? Ne, iren de nunggwe ehesa?” Ulug hein og-hebag ma, Hizkia en onggo uruk kwit, “Ite o Babel mun yit-yatma etman wahesa” ulug hweag-etfag.

⁴Ai en Yesaya eke nim hein og-hauk kwit, “Iren de nakni hat hebe welahenma oma re nunggwangge on hehesa?” Ulug hein webag ma, Hizkia en uruk kwit, “Abirangge mundoho inil hehesa, an nobam welahimu oman di angge su angge foroho lahi on etmano hehesa fug on eke wereg fug mundoho inil hehesa neg,” ulug hweag-etfag.

⁵Ai ebag ma Yesaya en raja fam onggo hweag-utuk kwit, “TUHAN Mun Along on anyo ele uruk kwit,

⁶‘Li andigim aik waruhu salim fam hat hebe welahenma di angge su angge henggik wereg welahen angge it hambusi mel hombasi mel en kabog-debag huli en ketia huli kabog-duruk kahen on etma abirangge o Babel hohouk dulug lahup eke embesehup fug.

⁷ Aire hat homaliki endag enebuhup on hombasi on en de raja Babel obahet yabuk ebe wereg ma duruk eke og-enebuhup’ eheik” ulug hweag-etfag.

⁸Ai ebag ma Raja Hizkia en onggo uruk kwit, “TUHAN hweag-umuk eheik ale haren an hweag-nirik wahen on ai oho mun fano neg” ulug ebag. Aren airoho ebag aire aren boruk kwit, “An noluk wereg li em eta kerajaan an den melal-enepuk kahimu au fanoroho enakol eleg welaruhu ai” boruk kwit ebag.