Read Ninia Yali YESAYA 4 Bible Online

YESAYA 4 - Ninia Yali bible

YESAYA 4

¹Nukoho ai salim hwelani enebe ohwan on en ap misig eke sene folug uruk kwit, “Nit nenahunsi hwela fug angge wereg lit nenenggali hauk ale aire fug anggere, niren hat fahet nit nenahun ul en de fano bein. Nenangge nauk on mel nenasum wan-dauk on mel de nenonggwareg en hwale fahat-dauk kamul” ulug hweag-utuk kamuhup.

²Li eke waruhu on fam de TUHAN en o kwenang su fam di angge su angge yaho on fanoap debeheg, e wilibig on de humon wilibi feheg, ebe buhun-debeheg, duhu. Nukoho ai salim de ap homi Israel on enahap wendat aruhu on de enahayeg heheg, enangge anggen yihig baluhup on fahet enawonog aheg, duhup.

³Ap homi o Yerusalem etma embesehupmu welamuhup on, ap homi enahap wendat-enebuhuk ulug Allah en momaloho fesesi on de it aire enebe mun enamu eneg wereg on uruk kamuhup.

⁴TUHAN en At omamne fam omaliki enawene katukdoho baleheg, ap en perak indokma werako ebe on eneko foruk hag debesehu. Aren de o kota Yerusalem fam etman ap enowatswa ma enamep wambisi on etma horuhu.

⁵ Airoho debelug de Duk Sion fam etma ap homi abirangge etma kabog-duhup on mel de TUHAN en o nukoho re henaap debeheg, ne o hupanggo re hobu mel seleg ombagbag duruk on mel debehu. Allah onggwareg amu en neg o kota ai sanggunuroho foroho lit along baloho foroho laruhu.

⁶Aren de o nukoho angge ahanhan famen sambunoho welaheg, ne osit humon mel, sielu mel famen kurukmu fahet aheg, duhu.