Read Ninia Yali YESAYA 40 Bible Online

YESAYA 40 - Ninia Yali bible

YESAYA 40

¹Henakni Allah ele re diroho uruk, “An nunggul unuk on henobam se, henobam se!

²Ap Yerusalem on henenda hambukdoho welamek, sebel-henesug on anyo mudoho ahae fotog atuk iek. Kwasik ale iren duruk on omano An den mundoho napelehap debeserihik,[54] it enesiag etma fahet unggum aldap birenam og-esauihik”

³ Ap eke ele hwiruruk kwit, “Leimu etma kobokwe TUHAN fahet yatuk kamek o, wal kwe etma kobokwe humon nit nenakni Allah fahet bekitdoho yatuk kamek!

⁴Fanggongma etma mundoho abireheg, dom mel dukmu mel, feleroho doaleheg higirap deheg, duhup. Kwenang duk deg kwe etma donggo aheg, ne yaning-hwaning deg kwe etma bekirap debeheg, duhup.

⁵Mu re TUHAN mun along wereg ale anyo ename fohu; ap homi mundoho en inil hahup. Demdoho TUHAN ebe en sali isi!” Ulug ebag.

⁶ Ele eke uruk kwit, “Hweag-esakin o!” Urukmu, an den hein og-hauk kwit, “An wene nunggwe ale on hweag-esamin?” Uruk men de, “Ap homi aire enggelangge hag, owil elamna fahet il buhun deg halon ulug hweag-esakin.

⁷TUHAN en hol ahanhan on fun ha waharukmu re enggelangge bug aheg, owil angge sawet aheg, atuk. Unggul unuk aure demdoho enggelangge hag wereg.

⁸Enggela bug aheg, owil angge sawet aheg duruk, famen nit nenakni Allah ele ai neg de eitog mundoho wereg laruhu” isi iyug ebag.

⁹Dom leho on emberimmu lahaik lamihin deg, wene ebe on Yerusalem fahet ai undurik lahain, hele yatdoho hwiruruk kwit wene fano on ai Sion fahet[55] ai unduhuk fein. Kota it Yehuda on etma fam hweag-esauk kwit, Allah it enakni fobik waruhu iyug!

¹⁰ TUHAN Allah omamne fam along ale dikoho waharuk angge hakiek. At de ap homi Aren[56] fiselaroho fesesi on etmano hondog esalug waharuk.

¹¹ Ap gembala domba hwalduk on en duruk hag, Aren hwal-enepuk on etma airoho debeseruk; At amu en neg kabogdoho feseruk. Domba omalik de hamboko enggikmu walug, obabut sako fam Aren domba isinga walug lauk.

¹²Ap sa en laut yahamag deg on ai enggik endangge fam ilit duk alereg? Ite koloma bul oma enggik si misig fam wal-ha alereg? Ap sa en kwenang oma anggin wal-hauk angge fam wal ha alereg? ite dom mel duk mel abut balduk angge fam kumu ha alereg?

¹³ Ap sa en TUHAN melaleheg, ite At komo-duruk on atlug At mamuleheg, disi?

¹⁴Enoluk atuk on mel furebelug duruk on mel hwelowag ulug de ap sa fam TUHAN en hein og-hasi? Mun higit-hagatdoho dukwag ulug, ap sa en diroho dimihin ulug kwe hweag-itsi?

¹⁵TUHAN en de enunggul unuk wereg on de ik hwenangguruk angge elma ik misig depdoho wamburuk on hag deg, ite ul dem misig ilit angge fam hag deg; ik alo anggen deg on etma re ul ahe mun ining angge hag deg.

¹⁶Di on su on o Libanon fam oluk wereg angge etma re, TUHAN enda ahayeg howag ulug waroho yaluk ale higit deg fug; e yalduk on fahet wuruk alere e wilibig on eta nim ilit deg fug.

¹⁷Enunggul unuk abirangge etma re Aren ebe angge hag deg fug Aren de olohotma etma ap homi eleg on hag deg.

¹⁸ Airoho deg ma re haren Allah aire sa nim ilit duruk kahen? Ap sa Allah nim higit deg ulug uruk kahen?

¹⁹At de ap e ahut hilingguruk on nim ilit deg fug, ahut ilitdeg emas on mel perak [57] on mel fam sapliroho hilingguruk on etma nim higitdeg fug.

²⁰Ap enenggik eleg on hag en de emas, perak [58] mel hun da fug alereg en de e folo-folo fubut duk fug hag on momalduk. Momalug aren ap ahut ilit deg wutuk mu folo-folo daloruk fug ale deg on etmano hera dulug wurukwag ulug hweag-esauk.

²¹O kwenang keram atfag ale fahet, hat de holuk fug angge hapeleg deg lahen a, o endam en hat hweag-hutswa fug a? Indip debag huli en angge hapelegdoho neg welahen ai ambi?

²²Wal-debag on de kwenang abung-abung deg on emberimmu hwerieg wereg, ap homi re we dorangge bulue hag deg. Aren de bohol sum kain hag doale febagdeg, o sabo welamukoho wutuk hag wiri febag.

²³Ap enalong wereg on de iren duk fug aleroho debebag, ne ap log enap de it enomamne eleg amag ulug debebag.

²⁴It aire a ket yaho foruk on omanggen ket belapuk on hag deg. TUHAN en hol fu ha waman de it enebe iring atlug enggelangge hag firoho la alereg.

²⁵Allah Mun Amu eneg wereg on ai nim de sanim higitdeg bolug duruk kahen? Ap sa nim haren At nim higirap dimin ulug duruk kahen?

²⁶Hil boholma lahap halug furoho kumu hakin, ap san sohwalanggen etma wal-disi? Aren de ap tentara esan eratuk hagdoho hwale feseruk, Aren it enebe abirangge re di en wereg ulug oluk deg, Aren it enunuk domog wol-enepuk. TUHAN Omamne humon deg ma re misig oho eke longgo uruk fug.

²⁷Anggere hat Israel on henda sebeleg welahen ale ai TUHAN Allah hiren on anyo en hauk eleg en hagdoho etma re nunggwelug hwerani mireg ale uruk kahep? Hiren uruk kahep on etma re Aren hit henangge on fahet mel, hit henebe amuhup ale fahet mel hwale-henobaharuk fug en hag duruk kahep a?

²⁸TUHAN Allah eitog neg wereg on ai en kwenang abirangge wal-debag ulug urukmu, hat hapelegdoho holuk fug angge welahen a? At de obam songgo aheg, lilipna aheg duruk fug; Aren wenggelduk alere yatdoho wenggeldukmu furebouk fug alereg.

²⁹Aren de ap homi enobam lilipna uruk on enomamne og-eseheg, enonggwareg en da fug alereg on fam enahayeg og-eseheg, duruk.

³⁰Ap sauwe on de enobam songgo aheg, lilipna aheg, duruk omalik sauwe on dungdoho wat-dauk.

³¹Famen ap TUHAN fam enenda hembisig lit duruk on de, enomamne keron hwelauk kamuhup. It enebe re suwe ikwesahop ahwerabul omamne on fam daroho yit-yatma laharuk hag deg lamuhup. It buroho lauk kamuhupmen lilipna enepuk karuhu fug, it kwe lauk men songgo enepuk karuhu fug.