Read Ninia Yali YESAYA 41 Bible Online

YESAYA 41 - Ninia Yali bible

YESAYA 41

¹Allah en uruk kwit, “Ap homi o kwenang yat-yat kwe welahep on etma bik-bok atlug An nele henesanggo holiek. Wene katukdoho kong-durukmu omano watlug, henawene lahabik manik. Ap sa siag disi sa siag disi fug ulug wene kong-dul en de nit nenebe seberoho wene bilinggukohon manik.

²Ap sa en timur fil along wereg on[59] anyo leberukwag ulug debeheg, hundig-hundig along welamag ulug debeheg, duruk? Ap sa en disi fam aren enunggul unuk omano enalong eleho feheg, ne at onggwareg fahet raja apma feseheg, duruk? At enggarog fam en de ap de ul hagdoho deg-bog uruk, at andog fam en de it enebe enggelangge iringgig on hol en fu esaukmu duruk hag del-fol esauk.

³Aren de hundig-handig mug-eneplug laheg, koloroho laheg duruk; eyog de folo-folo laukmu re kobokwe sen hauk fug on hag deg.

⁴Abirangge etma re san duruk? Ap sa en indip men atil watfag ale etma fahet eneko foruk? An TUHAN en neg. An de keram on, ne airoho weregman neg de fotogdoho on oho An neg welaruhuk.

⁵Ap homi enobam indip yatma on en de An den duruk kahi ale etma inil hauk. It de youk lalug enakol en enowag elek duruk kwit, enebe misig kabog-dulug waharuk.

⁶It enebe abirangge re eke en eke let hauk men, eke en eke enda aho ware foruk men duruk.

⁷It e on fam wutuk ale enoluk on en de emas on fam wutuk ale enoluk on aho ware feseruk, matilo fam bosimanggen sahalduk on en de, ap eangge folug sahalduk on etmano mot-enepuk. Iren uruk kwit, ‘Haren duruk kahen ale etma re mun fano’ uruk. Airoho dulug de elek-felek uk no ulug de paku ware foruk.

⁸ Famen, hat Israel An namingming angge on, nomaliki An den momal-henepihik on, hat de An nare Abraham ai ambiangma on.

⁹Hat hebe re o kwenang ambiangma etman og-hapihik on, An den o mun yit-yatma etman wol-hapihik on. An den uruk kwit, ‘Hat de An namingming angge; An den momaldihik on ai nerim ulug domako embesehuk fug’ irihik.

¹⁰An hinim welaruhuk anggere hakol duk fug, An de hat hakni Allah anggere henda fit am fug. Hat de An den wirikap hobahakeg, ne let-habeheg, duruk karuhuk. An nenggik fam halongdoho og-haplug lauk karuhuk.

¹¹Furin, ap homi hat fam bet-hapuk on etma re, enalong elehapdoho fesehukmu nik-neng uhup. Ap hat nim dog yapul ulug duruk on etma re enebe mundoho eleg amuhupdeg fundoho lahup.

¹²Haren de ap hat nim wal-wal amul ulug duruk on etmano hera enebuhun, famen de haren it hweag-enebuhun fug. Ap hat nim dog yapuk on de ketia eleg ahesareg longgo ehesa.

¹³An hakni TUHAN Allah, en henggik bekit fil sen-husug lahimu; An den uruk kwit, ‘Hakol duk fug, An den let-habuhuk’ isi” ebag.

¹⁴TUHAN en uruk kwit, “Israel ao, hat de hebe dot deg lit homamne eleg famen de hakol duk fug. An TUHAN en hat let-hapuk karuhuk, Allah Israel on Mun Amu eneg wereg on aire hat hahap wendatuk on.

¹⁵Furin, hat de gandum berelduk angge, mun keron, werelegma, aeg erareg on hag. Haren de dom-dom etma bereldil lalug luluhun esauk karuhun; duk de haren asinahap hag deberuk karuhun.

¹⁶Haren de it enebe gandum anggen hag en-enepuk mu re, it enebe asinahap hag hol en firulug laheg, sielu en darulug laheg, duruk karuhu. Hat de An TUHAN nobahet hahayeg aheg, An ap homi Israel on enakni deg en hawonog aheg, duhun.

¹⁷An nunggul unuk on enenda kolo kwe yareg on etman ik herareheg, ne ik ahe en enanggolobag iring aheg, durukmu re An TUHAN en iren somban uruk on holduk karuhuk; Allah Israel on ai en de At omaliki etma embeselug lahu fug.

¹⁸An den duk unggul ahap neg deg kwe etma ik waharuk kamag ulug debehuk; donggo bulmu etman ik eleruk fulohomdoho wilipuk karuhu. Iliangge lei etma re ik sene yenggelegma debehuk; kwenang iringgig kwe en de ik eleruk wilibik waharuk karuhu.

¹⁹O lei kwe etma An den e wali a mel, zaitun mel, e murad [60] mel, akasia mel yaruhuk. Lei wereg on etma re An den e eru mel, berangan mel, lak ohwei mel debehuk.

²⁰Airoho debehukmu re ap homi abirangge en inil halug de, ‘At TUHAN en disi’ ulug enoluk atuk kamuhup. Allah Israel on amu eneg wereg on anyo en disi fam atsi ulug, inil heheg, furebeheg, duhup,” isi ebag.

²¹Ap homi Israel on enakni TUHAN, en dewa fam uruk kwit, “Hiren henawene lahabik manik, ne indip di fahet atsi ulug indip bilinggik manik!

²²Nit ambiangma aruhu ale etma nenoluk amag ulug de hit watlug, fobik diroho aruhu ulug husumbi ik manik. O endam atfag ale etmano nit hweag-nesa manik. Nit furebehuk en de ai ebe diroho fahet atsi ulug enegdoho hweag-nesakiek.

²³Hit de mundoho nik angge Allah hag on welahep ulug nit nenoluk amuhuk en de, fobik aruhu ale diroho aruhu ulug iek. Nit nenobam fogdoho yanderuruk kamuhuk en de, ambiangma fano atuk ale mel, siahap enepuk ale mel diek.

²⁴Ebe demdoho re hit henebe mel hiren duruk kahep on mel mundoho eleg, ne it ap homi hit mot-henepuk on etma re me napereg.

²⁵An den de ap misig eke timur fil en mondorik waruhuk, aren utara fil en kwik wamag ulug An den wol-dirihik. Ap enalong wereg on de sabelep hagdoho, kwenang dangge on fam waruk hilingguruk on en duruk hagdoho sobit-sabat esahu.

²⁶Hit henesahalimu etman ap san aruhu ale ulug wene husumbi isimu, niren demdoho isi uhuk? Ai famen hit henesahalimu en de airoho aruhu ulug hweag-nesausa fug, ne hiren henele urukmu ap en eke holswa fug.

²⁷We An TUHAN neg de kirim-keram Sion fam hweag-esauihik on; An den de ap wene fano on walug Yerusalem lowag ulug yonggo mon-enepihik.

²⁸Kembu dewa etma sahalimu en An den hera dirihik famen de, diroho aruhu ulug uk on misig eke welatsi fug, ne onggo uk on eke wereg fug.

²⁹Demdoho kembu dewa etma re siag angge, it de ap en ahut ilitdoho forukmu di ale su ale duk fug angge, iren di on su on duk fug alereg,” isi ebag.