Read Ninia Yali YESAYA 42 Bible Online

YESAYA 42 - Ninia Yali bible

YESAYA 42

¹ TUHAN ele uruk kwit, “Sure An namingming angge, An den kasombalduk kahi on, Ap An den momaldihik on aren An nendama nahayeg ale neg duruk. Aren ap homi enunggul unuk domog fam katukdoho neg duruk on walug lowag ulug An nalong anyo At og-itihik.

²Aren ele hum fam hwireheg, hum deheg, duruk karuhu fug, ne at ele uruk on de kobokweman oho holduk kamuhup fug.

³Findayo owag kwasikdeg halug, aren somboroho hwik-esahu fug, esahe ambogbag hobun-haban uruk halug nahuli feheg, duhu fug. Aren holoho neg duruk kwit,

⁴ape nong-hong uk fug angge, obam si uk fug angge duruk men neg o kwenangma suma dipdoho duruk ale anyo omamne debehu,” isi ebag.

⁵ TUHAN en bohol wal-debebag obalma diahan debebag; Aren de kwenang mel kwenang emberim fam wilipuk angge mel wal-debag; Aren de ap homi fam sat mel enoluk mel og-nesasi, Aren amingming angge fam wene su hweag-itsi,

⁶ “Haren katukdoho neg dukwag ulug An TUHAN en hayonggo folug heyabuk og-hitihik. Hat fene en ap homi humdoho nit sali wareheg, enunggul unuk mundoho enobahet o seleg aheg,

⁷ap homi inil bug on fenggene feseheg, ap homi mum apma sabu hetdoho weregman fiselaroho wilibi feseheg, dukwag ulug An den melal-habeheg, hwal-habeheg, duruk karuhuk.

⁸An nebere TUHAN, An nunuk de ai; An nalong welahi ale aire ap sa fam ulug oho og-irihi ha fug alereg; ne An nandung-dang welahi ale aire ahut ilitdeg fam ulug oho og-irihi ha fug alereg.

⁹Ketia An den aruhu ulug irihik on mundoho eneg atuk; An den de wene keron eke hat hweag-hutuk kahi; ai am fug kweleg An den mundoho hweag-hitihik” ulug ebag.

¹⁰Suni keron TUHAN fahet iyek, hit kwenangma on abirangge en At mot-diek! Laut [61] mel ilonggoma wereg angge mel, o kwenang yatma on etma mel ap homi o etma wereg on mel kabog-dik manik!

¹¹Iliangge lei mel kota mel en TUHAN mot-duruk kamag, ap homi Kedar on en At neg mot-duruk kamag! Ap homi o Sela on en enahayeg deheg, duk funureg kwe en amit-mit deheg, duruk kamag!

¹²O bumbuk yat kwe etman TUHAN leho foruk kamag, iren At unuk along boruk kamag.

¹³TUHAN de ap weim amururu doho yapuk on hag, ap sehen seneg on hag anggiluk fam weim yabukoho waharuk, Aren de weim yabikoho amit-mit duruk kwit At along wereg ale anyo it aselei on fam unug esauk.

¹⁴Allah en uruk kwit, “Li anunuroho An nape wong debelug welatihik; An nele eleg angge wereg lit aho waroho welatihik. Ketia re An den duruk li em aik waha, An den homi enomalik enderukoho ngaruruk hag, ngarikoho lahi.

¹⁵Dom inim duk inim de An den unggul ahap neg debehuk, ne etma wilibig angge mundoho halorebehuk, fanggong-fanggong ik wirig atuk kwe omano ahamdoho An den iliangge lei[62] debehuk, ne ik amu yenggeleg on de mundoho iringgi fohuk.

¹⁶An nunggul unuk on en inil hupnig on etma re An den kobokwe it enapeleg kwe en melal-eneplug lahuk; An den kobokwe iren fubireg fug kwe hondog-eneplug lahuk. Mum deg on etma it fahet An den selehap debehuk, ne kwe wilip am kuk deg on de donggo debeil lahuk. An den it fahet duhuk alere airoho, ne An den dik-demdoho duhuk.

¹⁷Ap homi kembu ahut ilitdeg fam dip debeheg, ne iren aure ilah ulug fag-deheg, duruk on de sebeloho enenggaliap debehuk” ulug ebag.

¹⁸TUHAN en uruk kwit, “Yaho hit henesanggo dahom etma holiek! Ne, hinil hupnig on etma hakiek!

¹⁹Sa alongdoho il hupnig boruk kahep, we Israel neg, sa esanggo mun dahom deg boruk kahep? We Anden yonggo mondotihik on ai.

²⁰Israel ao, haren hum ale hil hauihin famen de fureberuk kahen fug; hesanggo re husig famen de holduk kahen fug” isi ebag.

²¹TUHAN en de enahap wendat-enebuhuk ulug enda ahayeg boruk; Aren de Awene melaleg anyo along bolug leho foruk kalep boruk.

²²Famen de unggul unuk anyo re mundoho sen enepswa, it enebe re kwenang apma ambe balegma etma hetdoho feseheg, sabu hetdoho feserukmu kwelabe feseheg, duswa. It enebe re ap en sen enepswa ma re ap en eke it let-enepswa fug.

²³Hit henesahalimu etman de ap sa en wene esanggo holug, fobik fahet oho fureberuk katmisi?

²⁴Israel senerukwag ulug de ap san og-esasi? TUHAN amu en de fug no a? Niren de At il hanim neg siag duruhuk, niren At awene melaleg higitdoho duruk katuhuk fug, ne Aren mamul-nenepuk on anyo muko duruk katuhuk fug.

²⁵Ai fam de Aren olok mun anggolo on ai nit howag ulug nenobahasi, ne weim mun ilmu siag on ai fam ouk-bouk howag ulug debesi. At olok de Israel on wereg ma etma indok en hagdoho han weratuk katsi; famen de niren fureberuhuk fug, ne nit fam hauhuk ale ai famen wauhuk fug.