Read Ninia Yali YESAYA 43 Bible Online

YESAYA 43 - Ninia Yali bible

YESAYA 43

¹Israel on yei, TUHAN elere diroho uruk, “An den hat wal-hapihik deg ename hobaharihik, An den hahap wendat-habuhuk anggere hakol bouk fug! An den endam hat hunuk yiko wol-hapihik mu, hat de An nangge on welahen.

²Hat ik fene baloho laukmu re An hinim welaruhuk, Hat ikma obuk uhun fug anggin anggolo degman oho let-habuhuk. Ne, hat indok fene lauk men oho hat han nahun fug, anggin-anggin ale fam habut baluhu famen oho hat alema re hobahaku fug.

³An de TUHAN Allah hakni deg lahimu, Israel on enakni Allah namu eneg welahi on aire hat hahap wendatuk on welahi. Enahap wendatuk on. Mesir honggo baloho og-hitihik, Sudan nim Syeba nim ai hat hobalma angge atsi.

⁴An nil hanim hat de along angge deg lahen, An den hat nenda hundig deg ma halong boruk kahi; ai fam de An den ap homi hat hobalma angge og-esauk kahi, unggul unuk-unuk angge etma hat hobalma it amuhup alereg.

⁵An den hat napma fahat-husug lahi mu anggere, hakol duk fug. Barat fil en nim, timur fil en nim, An den hat hombasi kabok dik wamag ulug hweag-esahuk.

⁶It folo-folo lol-enebuk kwag ulug, An den utara fil on mel selatan fil on mel mingming enebuhuk, Henomaliki ap angge yatman sombandoho wamuhup fano, henahwelani angge kwenang ambiang ambiang etman somban dik wamuhup.

⁷It An leho nobaharuk kamag ulug wal-enepihik mu anggere, ai fahet de it abirangge An nunuk fam wol-enepihik” isi ebag.

⁸Allah en uruk kwit, “An nunggul unuk on etma inil wereg famen de inil bug deg on ne enesanggo wereg famen dem enesanggo dahom deg on etma, An nalukwema hopdoho wamag ulug hweag-esakin,

⁹Unggul unuk abirangge kabog-dukwag ulug hweag-esakin unggul unuk abirangge baluruhup. It enanggembu dewa etma sahalimu en de ketia atuk ale oma fahet hweag-esausa? San fobik aruhu ale fahet diroho aruhu ulug isi? It ai holeheg, eseheg, duswa on de iren demdoho uswa ulug eheg, duruk fam it holuhup on en uruk kwit etman demdoho atsi ulug ukwagdoho re inaik wamag!

¹⁰Yaho hit An nomaliki on su, hit neg de An den duruk ale hinil heheg, holeheg, duruhup on welahep, An den hit en henepihik aire An namingming on welamuhup ulug en henepihik, Ai fam hiren An heneluk atlug An nobam dip nobaharuk kaheg, An de Allah welahi ale heneluk aheg, duhup. An eleg kweleg oho wereg kweleg oho amu on eke welatsi fug. An neg de Allah misik-misig neg namu welahi.

¹¹An namu TUHAN welahi, An elegma ap amu on en henahap wendat-henebuk fug alereg.

¹²An de mundoho hit hweag-hesauk kwit, An den hit henahap wendat-henepihik. Kembu bohon henesahalimu wereg on etman henahap wendat-henepswa fug; Aire hit henemu en An den duruk ale hinil hauhup. Ne, An aure Allah welahi,

¹³li mundoho-mundoho fahet de Allah An neg wereg lahi. An nomamne famen eke foldongdoho wambuk fug alereg, An den melale foruk alere ap eke en kwe baluk ale oho deg fug.”

¹⁴TUHAN hit henehap wendatuk on Israel on en Mun eneg wereg on en uruk kwit, “Hit henobahet de An den tentara o Babel mon-enepihik, An den o hetdoho kwelabe feseruk kwe sokole kelog deg on etma langgo heg hwik-esauihik; ap Kasdim on enahayeg duruk katswa on anyo An den ahamdoho oba yarukwag ulug debeserihik.

¹⁵An de hit henakni TUHAN Allah namu eneg welahi on, Israel yei, An de hit henowe Raja hat wal-hapsi on anyo!”

¹⁶TUHAN en kobokwe eke laut fene yaho fesi, ik funalduk on fene yaho fesi.

¹⁷Aren tentara mel perwira mel mingming enepuk mu dok yabuk kwit, Iren kereta kuda fam lit halug yabil lauk kamuhup. Famen it bule wamburuk kwit de eke inatuk kamuhup fug, it eral nahul atuk on hag waratuk kamuhup.

¹⁸TUHAN en uruk kwit, “Endam ale ebetuk kahep etma alemaroho ebetuk kahep, alemaroho ilik-eleg atfag ale ebetuk kahep.

¹⁹An den di ale su ale keron duruk kahi ale etma fu deberuk kamek; Ketiare indip disi famen hil hauk kahen fug a? An den kobokwe lei kwe etma yaho fohuk, ik eleruk-eleruk angge lek kwe etman wilibi fohuk.

²⁰Mun-man angge maro on en An leho nobahakup; no serigala mel, suwe unta mel en An mot-napuk kamuhup An den ik lekman wilibi fesehuk on etma mel, ik-ik eleruk lei kwe etma mel de it An nomaliki an den momal-enepihik on fahet nauk kamag ulug og-esahuk.

²¹It enenggul unuk aire iren An nobahet suni motdeg ale suni yiko fag-duruk kamag ulug, nonggwareg fahet wal-deberihik.”

²²TUHAN ele uruk kwit, “Hat de Israel famen de, An napne wauk kahen fug, An nakit kabok dik waharuk kahen fug.

²³Hat en domba An nenda nahayeg howag ulug fahet waroho yalduk on walug waharuk kahen fug, hangge og-nutuk kahen angge ai fam An nalong bolug leho nobaharuk kahen fug. An den hat hobam airoho feik ma ulug hobam anggin apdoho hobaharuk kahi fug famen, it de amben fano angge kemenyan og-nirik ma ulug habusel sahalduk kahi fugmen.

²⁴Hat en An nobahet amben angge dupa hundutuk kahen fug, haren waroho yal-nutuk kahen angge ahalue fam An nenda fano atuk fug liren, ite ahamdoho hat hasiag duruk kahen on fam de An nobam angginap kwelapuk kahen. Kwasik-kwasik ale duruk kahen on fam An nabusel sahalduk kahen ai.

²⁵Famen, An Allah deg lahimu hasiag mundoho ho habuhuk, An nabut airoho duruk on deg lahi ai fam de hat hasiag de an den horuhuk; An den hat hasiag fahet ebet-ebet neg uruk karuhuk fug.

²⁶An noluge nobahain, nit de katukdoho baldukmu etma laul deg hat demdoho deg lahen ale ai enam amagdoho re hawene ai walug kwik ma.

²⁷Hambu-hombasi keram on[63] de mundoho siag debag, ne it howesi melal-henepuk katswa on de An nele sahale folug duruk katswa,

²⁸imam en mundoho An nobam etma emere[64] fousa. Ai fam de it Israel on sebele fesoukwag ulug og-esauihik, ne Yakub ambiangma on de enowarukwag ulug nil ferihik.”