Read Ninia Yali YESAYA 44 Bible Online

YESAYA 44 - Ninia Yali bible

YESAYA 44

¹TUHAN ele uruk kwit, “Yakub An namingming angge sure hesanggo holin, Yaho hit An nomaliki Israel An den en-henepihik on etma henesanggo holiek!

²An TUHAN en at hat de waldoho hobaharihik, hat hisinga ahummu An den buhundoho hobaharihikdeg, hat let hapihik. Hat de An namingming angge deg lahen anggere hakol bouk fug, Nomaliki An den en-enesug lit nenda hundig husug lahi on.

³An den kwenang iringgig mu etma ik hilili fohuk anggere, ne kwenang iringgig kwe etma ik hwaloho wirik atuk kamag ulug debehuk. An den Nomamne re hombasi on og-esahuk, Hombasi on fanoap debesehuk.

⁴It enggelangge ik elerukmu wilibig on hag hesiloho wilipuk kamuhup, E wilo ik aegma wilibig on hag amuhup.

⁵Ap misig heg enemu hundomog en it An nangge wereg ale fahet fag-duhup, ne it enebe wamuhup deg Yakub ombasi nim misig seberuhup. It hundomog enenggik fam: TUHAN Angge ulug baleg welaruhu, enonggwareg en uruk kwit nit de Allah omaliki on welahe uruk kamuhup” isi ebag.

⁶ TUHAN Mun Along on, Raja wereg lit Israel enalong baloho fahat-enesuk on anyo en ele isi alere su: “An de Allah we misig namu welahi, Indip met, onggombi met An neg welahi.

⁷Ap sa eke An hag on wereg? At ele fam ‘an airoho welahi’ ulug ukwagdoho hweag-emek! Aren hweag-nereheg eneg ale An nobam unug-neeheg dukwag! Fobik duhu ale diroho duhu ulug keram indip debag li en ahae fotog huli[65] etma fahet de san isi?

⁸An nunggul unuk on, hit de henekol deheg youk laheg, duk fug; Endamet ketiat anggere an den diroho aruhu ulug nele irihik fug a? Irihik neg. Airoho irihik ale ai fahet hit urukmu neahup on henebe welahep ai. Hit henalong baloho fahat henesug on amu on de mun eleg, ne ap di ulug An noluk deg fug” isi ebag.

⁹It ap homi kembu ilit angge wutuk on etma re ahilig eleg ale fahet duruk fug, ne kembu dewa iren leho foruk on etma re oluk wereg fug on fahet duruk. Ap en kembu ilit angge mot-duruk on etma il hupnigmu di angge su angge oluk deg fug mu, fobik enenggali aruhu angge fahet duruk.

¹⁰Ilit angge wuri folug mot-duruk on etma alemaroho duruk!

¹¹Dik-demdoho ap homi kembu ilit angge mot-duruk on etma enenggali aruhu. Ap ilit angge ai buhun-duruk on aire ebe ap homi on deg ma, it enebe misig seberoho enam aik wamag, it enakol atlug enenggali amuhup.

¹²It besi wutuk enap omano en logam misig eke walug indokma werako ebe hilinggi folug matilo fam sahaloho aren omamne at obam wereg anyo fam yabuk duruk kweleg, at ik obok deheg, siburu obok deheg, ebe lilipna deheg, duruk.

¹³E fam wutuk ale oluk on en de ilit halug, e ilit hauk on anyo dimeng fam obale hilinggi folug hwesesengge wauk angge fam hwesesengge oko re ap homi ebe on ilit deberuk, ilit debelug de aren obam olma feik lauk.

¹⁴E ap ai en ilit duruk on aire e wali fam duruk ane e lak ane, ite e batie ane anggenma murik lalug duruk. Ite eke aren e ibin a yaho folug nangno hauk kwit weregman osit en wilibi forukmu duruk.

¹⁵E foma re e yaloho indok yit-dauk on mel, roti weratuk on mel, ino angge iringguruk on mel fahet folug at obam homoroho wereg. Airoho wereg lit de, “yehei u, indok su re mun fanoroho ahanhan deg! Indok su re mun nenda nahayeg alereg!” uruk. Ne, e anyo ando foma fam de kembu ahut ilitdeg anyo hilingguruk. Hilinggi folug de aren orohole belabeg kwenangma sahaun uruk kwit apne weheg, obam somban eheg, duruk kwit diroho uruk, “Hat de an nakni ilah welahen, haren an nahap wendat-nabin” uruk.

¹⁸Ap ai hag on de mun morue on wereg! It inil hupnig lit enenda mel sok lareg ma re iren fureberuk fug.

¹⁹Ahut ilit deg wutuk on anyo en de, “E su foma re e wiroho yalihimu re indok anggen fam de roti werareheg, ino angge an nauk on fahet iringgeheg, dihi. Ai en foma re an den kembu ahut ilitdeg hilinggihi au. Anggere an de e kong baleg apne wauk kahi oma re” ulug wenggel-hauk fug.

²⁰Airoho duruk ale aire no ul nauk ale hagdoho duruk. Ap aire onggwareg siagdoho wenggelduk ai fam nale forukmu re at let-duk fug ale atuk. Aren de e ahut ilitdeg enggikmu wereg on aire lal-napuk angge wereg boruk ulug fureberuk fug.

²¹TUHAN ele uruk kwit, “Israel yei, hat de An namingming on deg lahenma re, abirangge su ebetuk kamin, Hat An namingming angge welamag ulug wal-hapihik, Israel ao, hat fahet An napeleg aruhuk fug!

²²Kwasikdoho duruk kahen on de An den hena hagdoho baloho hwik-esauk kahi, hasiag ale duruk kahen on de An den anggulog hadoho baloho eleho foruk kahi. An den hat mundoho wundetdoho hobaharihik mu anggere, sombandoho An nakit ma” isi ebag.

²³Hat bohol yei, hahayeg hambono duruk kamin, it foma kwenang ilonggoma wereg on oho enahayeg dukwag o! Hit dom-dom etma henahayeg neg diek! it e abirangge mel ohwei mel en oho henahayeg diek! Israel At omalikisi anyo onggo bal-enepsi ai fam de TUHAN along on wereg ale anyo unug-hasi ai.

²⁴TUHAN henahap wendat-henepuk on, hesinga ahummu wereg kweleg buhun hapsi on anyo en uruk kwit, “An TUHAN Allah anyo en di angge su angge etma wal-dirihik, Namu en neg bohol diahan debeheg, ne eke let-napuk eleg kweleg kwenang wal-deberihik.

²⁵ It ap fobik diroho aruhu ulug uruk on en husumbi uruk on de An den neg suhwi deberuk katihik, hwal ale duruk on etmano An den neg ying-fing esauk katihik. Ap enenda wenggeleg on en uruk ale etma re An den nolok enepuk katihik, it enggat deg on omano an den morueap debeseruk katihik.

²⁶An den de Namingming angge en wene uruk katswa on omamneap debeheg, duhuk ale ulug wereg on An nayonggo en enamoho uruk on etmano deheg, duruk katihik. An den uruk kwit, o Yerusalem fobik nikangge ap wereg lamuhup, Kota-kota Yehuda fam etma An den nikangge wuruhuk; meiyal heg wambisi on etma nikangge obale kwe wiruhuk.

²⁷An den nele laut indip erahauk no fam uruk kwit iring amin! An den ik wirig atuk on omano oho firitog deberuk kahi.

²⁸ An nele Kores fam uruk kwit, ‘Haren An nomaliki su melal-enepuk kaheg, An nenda boruk kahi ale etma deheg, duhun. O Yerusalem nikangge wurukwagdoho ulug hweag-eseheg, ne o TUHAN Obam anyo oboule foukwag ulug melal-enebeheg, duhun’ ulug hweag-itihik” ebag.