Read Ninia Yali YESAYA 45 Bible Online

YESAYA 45 - Ninia Yali bible

YESAYA 45

¹TUHAN en Kores raja amag ulug momalsi; Aren unggul unuk unggul unuk angge omano sebeleho feseheg, raja enomamne wereg on omano siroho feheg dukwag ulug ene fesi. TUHAN en at obahet kota sokole-sokole omano sok husuhu, dem misig ulug eke laroho welaruhu fug. At fam TUHAN ele uruk kwit,

²“An den hat fahet kobokwe yaho fohuk; dom nim duk nim An den ambi higit apdebehuk. Sok-sok angge tembaga fam hilinggig on etma re An den lilibug-lalabag debesehuk, bosie on sobang-fobang deg on etma An den simbi-sombo debesehuk.

³Ai fam de An den enangge dungdoho herako foroho on omano hat og-huruhukmu, Haren An TUHAN Allah, ap homi Israel on enakni hat hunuk yiko wol-hapihik on anyo holuk amag ulug duhuk.

⁴Haren An nebe hapeleg deg lahen famen, hat An den wol-hapihik hunggul unuk de on hobaharihik. Haren An namingming angge Israel on ai An den momaldihik on deg ma let enebukwag ulug yabuk og-hitihik.

⁵TUHAN de An namu neg, eke amu on wereg fug, Allah we misig neg angge re An. Haren An hapeleg deg kweleg famen hat sehen dog lik-louk hobaharihik.

⁶Abirale etma An den neg duhuk, aire mo indip men onggombimu huli etma ap abirangge en ilah on eke wereg fug, we An namu TUHAN wereg ulug eneluk amuhup en duhuk.

⁷An den neg seleg mum nim wal-dirihik, An den neg anggin ale nim, fano angge nim, mondorik waharuk kahi, An TUHAN en neg abirangge etma duruk kahi.

⁸Boholman enalong amag ulug An den osit hagdoho belabik waharuk kahi, mu re kwenang de hwelaroho amu en husi fahat dalug wereg, airoho dulug ai fam en enahap wendatuk ale mel, hesanggeap debeseruk ale mel, enam atuk. An TUHAN en neg duruk kahimu etma atuk” isi ebag. Waruk dangge on ap buhun-duruk on enggikmu wereg su

⁹ Ap en Wal-disi on ele sahaloho duruk kwit wereg on de enamelmeldoho welamag; at aire waruk dangge on en ap buhun duruk on anyo fam ele siag on uruk hag deg. Kwenang dangge on omano en ap waruk wutuk on fam uruk kwit, “hat nangginduk kahen?” Uruk a? Ite waruk en ap buhun duruk on fam fanoroho buhun duruk eleg ulug ngururuk a?

¹⁰Ap en akni fam uruk kwit, “Nunggwe ulug an diroho endag napihin?” Uruk on ai alemat atuk kamag.

¹¹TUHAN Allah Israel on enakni amu eneg wereg on anyo en uruk kwit, “Fobik aruhu ale fahet An hein og-neakiek. Famen An nomalikisi enobahet mel, An den amu ale eke dukwag ulug mel de hein og-nea fug.

¹²An de TUHAN kwenang wal-dirihik deg, ap homi welamag ulug oho wal-enepihik on. An nomamne fam bohol diahan deberihik, ne mo mel bigalem sohwalanggen mel, melal-enepuk kahi.

¹³An nenda boruk ale higitdoho deheg, katukdoho duruk ale neg omamne debeheg, dukwag ulug, An den Kores mingming dirihik. An den kobokwe at lauk kwe abirangge bekirap debehuk. Aren onggo hwela fug angge, ne enenggik apmane og-esauk on hwela fug angge, An nobam kota Yerusalem anyo nikangge wuruhureg, An nomaliki hele waregman loloho wundet-debesehu” isi ebag. Ulug TUHAN Mun Along on anyo ele mundoho matsi.

¹⁴TUHAN ele Israel fam hweag-esauk kwit, “Mesir on en anggen yihig mel, Sudan[66] on en ambiangma alongdoho wauk on mel etma hit henengge amuhup en hwelakiek. Ap homi Syeba enambong se on omano hit henangge amuhup; It de hit henombolim bosimanggen fam het deg ma waharuk kamuhup. Iren demdoho sebele fahat-dauk kwit, ‘Allah dik-demdoho hit henenggelegma wereg, At neg wereg ilah amu on de eke wereg fug!

¹⁵Allah ap homi Israel enahap wendat-enepsi on aire, Allah heraho lit wereg on.

¹⁶Ap abirangge en kembu ilit angge neg wutuk on de; Fobik it enenggali waroho enelitno enepuk kamuhup.

¹⁷Famen de Israel ai TUHAN en enahap wendat-enebuhu; enahap wendat-enebuhu on aire mundoho welaruhu. Hit li mundoho-mundoho etma fam henenggali aheg enelitno henebeheg duhup eleg’ uruk kamuhup” isi ebag.

¹⁸TUHAN en neg bohol wal-debag, At ebe re Allah! Aren neg kwenang waldoho febegdeg kwenangma orohole hilinggi febag, deberuk kwit hambuk lele waroho unduhuk febag ma unduhuk wereg. Aren obale we koloreg welamag ulug wal-debag fug, famen obale etma fam welamag ulug neg wal-debag. At ele uruk kwit de, “An de TUHAN An namu neg welahi, eke amu on wereg fug.

¹⁹An nele herako re uruk kahi fug, ite nendama heraho lahi fug. An den nomaliki Israel on hweag-esauk kwit, An alemaroho heranabil lahup uruk kahi fug. An, TUHAN en de demdoho neg uruk kahi, ne furoho neg hweag-esauk kahi” isi ebag.

²⁰TUHAN ele diroho isi, “Hit ap homi enunggul unuk enap sahalimu en lil atuhup on etma henebe kabog-debeluhup deg seberoho kabog-dik manik, Ap en kembu ahut ilitdeg angge e on bearulug lalug, kembu enahap wendat-enepuk fug on fam somban uruk etma re mun morue.

²¹Wene hiren etma ename feyek, ebe enamegdoho iyek, iren enele seberoho matlusa ai fano. San wene ai saharulug laheg, endamet hweag-eseheg disi e? An TUHAN en de fug a? Ila amu on An hag on de eke wereg fug. An de Allah katukdoho deheg enahap wendareheg, duruk welahi. An wereg kweleg amu on de eke wereg fug!

²²Ap homi kwenangma abirangge welahep on yei, Allah re An namu neg welahi amu on eke wereg fug anggere, hit henahap wendat-amuhup en An nakit sombandoho manik!

²³ An den mundoho sali watihik mu An nele sali dahan am fug alereg: ulug An nonggwareg nunuk fam yeng baldihik: Ap homi hundomog en An nalukwema enelenggen dimi ulug sahaun-duhup, airoho dulug it enele hundomog fam, An fam neg dipdeg lamuhuk ulug sali waruhup.

²⁴Ap homi enele uruk kwit, ‘Katukdoho duruk on mel enomamne wereg on mel de TUHAN en neg og-esauk uhup!’ Ap abirangge en An enerim napuk on en fobik An nakit waharuk kwit enenggaliroho wamuhup.

²⁵Famen de Yakub ombawi on neg de enahap wendat-enebuhuk, ne iren An TUHAN mot-napuk kamuhup.