Read Ninia Yali YESAYA 46 Bible Online

YESAYA 46 - Ninia Yali bible

YESAYA 46

¹Dewa Babel on eleg aik lahup li ketia aik waha; endam Bel ahut ilitdeg mel, Nebo mel apne wauk katswa; famen ketia wam emberimmu harulug laukmu, wam omamne eleg on fam anggin obam forukmu wereg.

²Kembu etman de ap harulug lauk on etma let-enebuk fug alereg, It famen oho re we hele wareg hagdoho og-eneplug lauk. Mu re it eleg atuk alere ai.

³Hit Yakub ombasi yei, An nele holiek, Hit An nomaliki on en alinlan welahep on etman holiek. Hit endag-atuhup huli en angge An den hwal-henepuk katihik.

⁴An de hit henebe sobal amuhup huli en angge hit henakni Allah neg welaruhuk; airoho wereg lit hwal-henepuk men neg henoruk huplu aruhu. An den hit hwal-henepihik mu re hwal-henepuk men neg welaruhuk, An den mundoho let-henebeheg henahap wendat-henebeheg duruk karuhuk.

⁵Hiren de An de sa nim ilit nesauk kahep? An nim higit nesa on eke wereg en duruk kahep a?

⁶Ap en uang yohwatuk angge husoho emas omano uang apdoho folug, perak de ilit duruk angge fam anggin wal-hauk. Airoho debelug aren ap emas wutuk on en il muninoho kembu ilit angge wiri foukwag ulug ap onggo bal-enepuk. Ai debelug at onggwareg en buhun-dauk angge anyo mot-duruk.

⁷Kembu ilit angge anyo paku waroho obalma folug, at etma unduhuk kweleg ekema oko lauk fug. Ap en somban at fam uruk halug de aren onggo uruk fug, At obam anggin deg ma eke aren let-heheg at ebe eleg aik la ale duruk men ahap wendareheg duruk fug.

⁸Ap homi siag duruk on suma u, ebereheg wal-heheg diek o!

⁹O Atam atil lauk katfag ale omano henenda wenggel-hauk kamek; An Allah wereg lahimu Allah amu on eke wereg eleg ale omano demdoho beiyek. An de Allah amu on eke An hag on wereg fug.

¹⁰An den keram wene fobik aruhu ale hweag-hesauihik, Atam en de An den fobik diroho aruhu o ulug abug irihik. An den uruk kwit: An nele kongdoho irihik ale anyo re fobik higitdoho aruhu. An nenda boruk kahi alere demdoho duhuk.

¹¹An den ap along wereg on[67] timur fil on eke wol-duhukmu, at waruhu aire suwe senggelni en waharuk hagdoho waruhureg An den katukdoho irihik ale omano higitdoho dikoho lit waruhu. Wene nunggwe on An den irihik ale etma re An den yabuk higitdoho duhuk. An den melaldihik ale etma dipdoho duhuk.

¹²Ap winik-wonog uruk kahep on doma u, An nele holiek, hit en boruk kwit along atuk on de yatma wereg boruk kahep on en holiek.

¹³Hit lole henobaruk salim aire An den horogma debeik waruhuk, henahap wendatuk on An den og-hesahuk on ai hihildil lahuk fug. An den Yerusalem ili deleheg, Israel fam alongap debeseruk on og-eseheg duhuk” isi ebag.