Read Ninia Yali YESAYA 47 Bible Online

YESAYA 47 - Ninia Yali bible

YESAYA 47

¹ TUHAN ele uruk kwit, “Babel yei, takhta leho on fam welahenma ai en wambik watlug de kwenang ololoma suma hwerieg lamin. Hat de endam deg latihin hagdoho ilil-mulildoho buhundeg lahen fug.

²Tepung de helep fam luluhun dalug; hunggul sambunig angge og-halug, hasum yaron lahabeg lahen on ai leko wamihin mu re hahain anggen enam-enam ik dahaldil[68] nindig-amin.

³Ap en hat habulukwe kohouk deg ma healug de, enalitno en henggali wat-hapuk kamuhup. An den hat fahet nolok hapuk kahi ale anyo fahet onggo ai duhuk ai, ap misig ulug oho eke An den ahap wendaruhuk fug” isi ebag.

⁴Allah Amu eneg on Israel enakni anyo en nit wundetdoho nenobahaku, unuk de, TUHAN Mun Along on ai.

⁵TUHAN en Babel fam uruk kwit, “Bik-bok atlug o mum deg ma etma kulug welamin. Hat fahet de ‘kerajaan wereg on enesinga ratu wereg’ de uhup fug.

⁶Atam An den nomaliki bet-enepuk katihik, It fahet An nangge wereg fug boruk katihik. Airoho boruk kwit it anyo An den hat henggikmu horoho ferihik famen haren it fahet enelaheg boruk katihin fug, ap kaindeg-kaindeg etmano holok en al berel enepuk katihin.

⁷Haren boruk kwit de an ratu neg hundig-hundig welaruhuk boruk katihin, mun aruhu ale anyo fahet wenggel-hauk katihin fug.

⁸ Ai fahet de An nele holin, hat hahayeg boruk ale neg mutlug lauk kahen on su u! Haren boruk kwit de noluk su lioleg welaruhuk boruk kahen, hat halon eke wereg fug boruk kahen. Haren boruk kwit hat de fobik sohwe aruhuk fug boruk kahen, Hombasire fobik eleg amuhup fug boruk kahen.

⁹Famen de we il misiham neg, we nukoho misig fam neg, indip birenet ambine aruhu, Haren hwal ale mel, hwal ale duruk enap en wene uruk on mel ai fam duhunmen ohore hahun mel homaliki mel oho oko wahuk.

¹⁰Haren boruk kwit de haren kwasik ale duru kahen ma etma liloho welahi boruk kahen, Haren boruk kwit duruk kahen alere fureberuk fug boruk kahen. Enggatdoho holuk deg lahen ale mel, holuk humdeg lahen ale mel, ai fahet de an namu neg noluk deg ma ap amu on de eleg boruk kahen.

¹¹Famen de hat fobik anggin on hobam fohu, hohwal indip foroho on ai en eke misig oho sebele fohu boruk kahen. Unggum hobam waruhu halug haren hohwal fam duk ale hapeleg deg laruhun, elehap hapuk on folo-folo fetagdoho, haren owanam etma henda wenggel-hauk katihin fug on waruhu.

¹²Hohwal mel hilingguruk kahen ale mel, hebe dotman angge habusel, sahalduk kweleg duruk katihin etma fahet habiroho duruk kamin. Ai duruk fam haren it haselei on enekol amag ulug duruk ale fahet anggoloreg lam a?

¹³Hat anggin humdeg lahen aire komo ale humdoho wereg ai en, hat hahap wendat habukwag ulug fobik aruhu ale ulug hweag-hutuk on mel, bohol unggut-unggut etma inil oloatswa on mel, sohwalanggen deg ale fahet furoho bilinggusa enap mel, bigalem keron fam de hat fam nunggwe ale,[69] aruhu ulug husumbi hag uruk katswa enap mel etma fam hweag-esakin.

¹⁴Furin, it de enggelangge bug on indok en harep nauk hag; it enemu en eke enahap wendat dahup fug! Indok ambul bul aire it fahet ahanhan humon deg, indok ambul bul aire it ahanhandoho iring enebukwag ulug de fug.

¹⁵Aire it ap hat hobam fobik aruhu ale ulug hweag-hutuk on hat dot deg li en angge habusel sahalduk on etma enobahet; enemu hundomog hat lin healug lauk kwit; hat eke let habukwag ulug wamuhup fug” isi ebag.