Read Ninia Yali YESAYA 48 Bible Online

YESAYA 48 - Ninia Yali bible

YESAYA 48

¹Hit Yakub ombasi on suma ye holiek o, Yehuda ombasi on en henenuk Israel uruk etman holiek, Hele en de hat Allah Israel on demdoho ulug uruk kahen, TUHAN unuk fam yeng balduk kahen. Famen de hat hele uruk kahen on etma re bekitdoho fug.

²Airoho duruk kwit en de, hat de ap homi o kota eneg on anyo fam welahi on ulug hawonog atuk kahen, Haren an de Allah Israel on, TUHAN Di ale su ale duk ale neg on anyo fam, nenda hembisig welahi on ulug uruk kahen.

³TUHAN ele uruk kwit, “Israel on holiek! Wene endam atsi ale etma An den mudoho atam hweag-hitihik an den nunggwe ale hweag-hitihik on omano An fetagdoho neg duruk kahi, An den ename foruk kahi ai.

⁴Hat henda omamne deg lit hunggul owag arik deg lit helep hag haro deg lahen ale An noluk.

⁵Ai fam o endamet angge An den airoho aruhu ulug irihik, owan atuk eleg kweleg, An den mundoho hweag-hitihik, aire hat hele uruk kwit, Aire kembu ahut ilit angge omano en disi ehep ha no ulug dirihik.

⁶An den husumbi irihik on de abirangge atsi neg; Haren de An den wene uruk kahi on etma re demdoho neg uruk kamin. Ketiare An den wene keron, Heraho lahi ale hat mundoho hapeleg on hweag-hitmin.

⁷Horog ketia ia neg An den fouk deberuk kahi, endam de fug, wene au hat owan holduk kahen fug on. Hat hele uruk kwit, an di ale su ale mundoho noluk deg ehen ha no ulug deberuk kahi.

⁸Ap en hat fam demdoho bouk alereg aire An noluk deg, endamet angge wene melaleg sahalduk on ulug ap homi en enoluk deg neg. Ai fam de hat holuk deg lahen fug ai, dem misig ulug oho eke hesanggoma kuruk fug.

⁹An den nolok sebeloho foroho lahi, ai An nunuk hum omag ulug sebeloho foroho lahi. Hat hobahet An den sebeloho foroho lahi, ai hat elehap hobahauk no ulug deg lit welahi.

¹⁰Indok nonggwalegman perak abut balduk anyo hag, An den hat di anggin su anggin fam habut bal hapuk kahi.

¹¹Ai An nonggwareg nunuk fam An den duruk kahi, Aire An nunuk ap en siahap deboukwag ulug embeselug welahi fug mu; ne An naseleg anyo oho ap eke sa hag fam oho eke minggit irihi ha fug deg ma duruk kahi” isi ebag.

¹² TUHAN ele uruk kwit, “Israel nomaliki An den wol-henepihik on henesanggo holiek o, An de henakni Allah femdoho welahi. An de keram welatihik on, An neg fobik oho welaruhuk on.

¹³An nenggik en kwenang oboule ferihik, An den neg helahe baloho huli deberihik. Airoho deberihik mu An den enenuk yiko wol-enepuk halug, it folo-folo nakit wam alereg.

¹⁴Hit abirangge kabog-debelug An nele holiek, it kembu dewa etma enesahalimu en de An nomaliki momal-enepihik on en fobik o Babel bin kuhup ulug uswa on eke wereg fug; Aren de An nenda wenggel duk aleroho neg higitdoho duhu.

¹⁵An den neg nele eheg, at ebe wol-deheg, melaloho feheg, duruk fam at ebe ambiangma fano atuk.

¹⁶An nakit horogma watlug An nele holiek, o endamen angge An nele matuk kwit de enameg bekaroho neg matuk kahi; An nele uruk ale etano An den dipdoho neg higitap duruk kahi” isi ebag. Ketia TUHAN Allah en an mon-napuk kwit, At onggwareg omamne anyo an og-nitsi.

¹⁷Allah Israel on enakni amu eneg wereg lit henahap wendat-henepuk on anyo ele diroho uruk, “An de TUHAN Allah hit henakni, hit fam fano aruhu ale fahet hweag-heseheg, hat kwe wilibik lauk kwe hondog haplug laheg, duruk kahi on.

¹⁸An den nawene melaleg uruk kahi on etma haren fureberuk kahen ha man de, fanoap husug ale etma re ik eleruk ahaik firig atuk eleg hag firig am fug angge welam alereg; ne hat hambiangma atuk kahen ha on etma re ik laut ahum bal am fug angge funag-lenggag angge welam alereg.

¹⁹Hombawire ik inggi hag eleg am fug aleroho saha uhup, An den enobahet durukmu it fobik eleg amuhup fug” isi ebag.

²⁰ O Babel etman buroho lakiyug, wene au di kwe su kwe etma saharil hweag-esa lakiyug. “TUHAN en de At amingming angge Israel anyo mundoho ahap wendareheik ulug mun henahayegdoho anggiluk fam sahariyug!

²¹Aren it hondog eneplug lei bug deg kwe etma lauk li em, it ik ahe anggolo hebag fug. TUHAN en helep dom on foroho ik wilip-esebag, helep famen ik it enobahet suldoho belap-esebag.

²² Ap kwasik ale duruk on fahet enahap wendatuk on eke wereg fug,” ulug TUHAN ele airoho ebag.