Read Ninia Yali YESAYA 49 Bible Online

YESAYA 49 - Ninia Yali bible

YESAYA 49

¹ Hit o sili yat kwe hwelahep on omano An nele holiek o, An nele uruk kahi on fu debeyek. An owan endag-am fug mu TUHAN en an wol-napsi. An nisinga ahummu wereg kweleg Aren an momal-napsi.

² Aren an nele uruk kahi on etma karog olok on hagdoho ukwag ulug nobahasi, At onggwareg enggik en[70] de an nalong bal-nusug wereg. Aren an de dog enggarkar on hag apdoho nobahasi reg, dog yapuk ale fahet ulug herap elma kwelap-napsi.

³At ele an hweag-nutuk kwit, “Hat de An namingming angge; haren duruk fam de An nunuk leho foruk kamuhup” isi.

⁴Famen de An ele uruk kwit, “An den duruk kahi ale ambiangma etma alemaroho neg deg; an nomamne alemaroho eleg ap deberuk kahi!” irihik. Famen TUHAN en an nangge on hwelowag ulug nibil atuk, Allah en an duruk kahi ale ilitdoho onggo og-nuruhu ai an noluk deg.

⁵An owan endag-atuk eleg kweleg TUHAN en an At amingming angge welamag ulug wol-napsi. Omaliki Israel kabok enebukwag ulug, ne it anyo sombandoho At akit lowag ulug nayonggo fesi. TUHAN en de an ap nalong ondoho nobahasi, Allah re an nomamneap napuk on wereg.

⁶ At TUHAN ele an hweag-nutuk kwit, “Namingming angge yei, yabuk humon eke haren duhun en nangno hapuk; haren de Yakub ombasi on ando eta neg nikangge og-eneplug enobam feseik waruhu fug, ite Israel on enunggul unuk domog leho welatsi ale anyo obalma hwale fohun ale neg de fug, famen ap homi o kwenangma abirangge enahap wendat enebukwag ulug, An den hat fam unggul unuk unggul unuk angge omano seleg ap enepuk on apdoho hobahakuk” isi.

⁷Allah amu eneg on Israel enahap wendatuk on anyo en, ap enalitno enesug on mel, it unggul unuk angge en enerim duruk on mel, it ap enalong wereg enap fahet enamingming angge atlug wereg on mel fam ele diroho isi, “Raja en de An den duruk ale neahup; it enebe inatlug An mot-napuk kamuhup. Enalong wereg enap en oho inil nealug, enerohole belabeg sahaun uruk kwit napne wahup” ulug hweag-nitsi. Airoho duhu aire TUHAN en Amingming angge mundoho momaloho unduhuk fesimu atlug; Allah eneg on Israel enakni, Aren sali isi ale fam dipdoho neg duruk on anyo en deberukmu atlug duhu.

⁸ TUHAN ele omaliki hweag-esauk kwit, “An nendama nahayeg hauk li em eta An den onggo hweag-hesauk karuhuk; Nukoho An den henahap wendat-henebuhuk salim ai An den hit let henebuhuk. Hit de An den napma fahat henesug lit kahal henesug laruhuk, An den hit fene en ap unggul unuk unggul unuk angge omano nim sali waruhuk, O bumbuk mun ap elegma diring-dereng isimu omano An den buhun-debehuk, Kwenang etma it akni hiling atlug wereg ma aruhu.

⁹Ap hele waroho wereg on An den wilip amin ulug hweag-utuk mu wilip aheg, it mum deg ma wereg on An den seleg fam og-eneplug laheg duhuk. Duk kwe lei birim deg kwe famen oho it enangge elegdoho deg lamuhup fug, kobokwe yaron fene nauk angge fouk debeseruk karuhuk.

¹⁰ It de ik obok siburu obok de enebuhu fug leimu etma it fahet hobi fululung on lahaku fug An it enelaheg enepuk kahimu re, An den it melal-eneplug laheg, it hondog-eneplug ik eleruk fano on fam feseik laheg duruk karuhuk.

¹¹An den kobokwe dom kwe yaruhuk, An Nanggobokwe humon omano An den higitap duhuk.

¹²Nomaliki yatman waharuk neg kamuhup utara fil en, barat fil en, Simin[71] selatan fil en waharuk kamuhup” isi.

¹³Hat bohol su suni wilibin, hat kwenang su hahayeg din, hit dom-dom yei henahayeg en anggiluk duruk kamek o! TUHAN en omaliki onggon enebik waha ma anggere, Aren omaliki hondoroho fahat-enesug on anyo enda hundig enepsi.

¹⁴Famen de ap homi Yerusalem wereg on en uruk kwit de, “TUHAN en nit mundoho fotog nesasi, TUHAN nit nenakni anyo en nit apeleg atsi” uruk.

¹⁵TUHAN en onggo hweag-esauk kwit, “Hwe isingan omalik apeleg atuk a, omalik onggwareg en endag dasi on elaheg boruk eleg a? Aren apeleg am alereg ane famen de, An den de hat fahet napeleg aruhuk fug!

¹⁶Yerusalem, An hat hobam hundig ebet-hapuk kahi; Hat hunuk An nenggik endangge emberimmu bale ferihik.

¹⁷Ap hat unduhuk hobaharuk on de folo-folo wamuhup, ap hat bereloho hobahausa on de folo-folo lahup.

¹⁸Hebe hombandu foma-foma etma fu heheg kumu heheg din, Ap homi haren on wahesareg haluluk kabog-dik wahesa etma mundoho kabogdeg wereg ai. An Allah noluk welahi on nunuk fam An nele uruk kahi, Hwele duhum ahun hwelarohoma ebene alili angge lahapuk on fahet ambono hauk hag, demdoho ap homi haren on wereg ale en hat de hawonok aruhun.

¹⁹O bumbuk haren on de ap elegma mundoho lei birim atsi mu, Ketia ap homi en hopo uruk kwit, ap amu on welam ale hoporeg. Ap homi hat elehapdoho hobahaul ulug duruk on omano, hat wereg lahenman lausareg o yatma lausa.

²⁰Omalik ap bog on enobam en endag-atswa on de, hat hobam enele uruk kwit de, ‘O bumbuk su re nit welam ale mun onggok deg ma, haren obale ekema welaruhuk en og-nimin’ ulug hweag-humuhup.

²¹Ai fam fobik hat hendaman uruk kwit, ‘Omalik etma re san an nobahet endag-enepsi on ahi? An nomaliki omano longgo uswa fug men a, eke nim endag enebuk fug alereg fug no a? An de hele wareg og-naplug hekipdoho nobahaik lausareg namu neg fotog neausa. Anggere omalik etma re kema on, ap san kul enepsi on e?’ uruk karuhun” isi.

²²TUHAN Mun Leho wereg on en omaliki fam hweag-esauk kwit, “An den eneg ale unggul unuk unggul unuk angge fam unug esahuk, mu iren hit henomaliki ap angge re mako bug eneplug neg hwelani angge omano kasombal eneplug wamuhup.

²³Raja etma re hit henaknisi on hag amuhup, it enohwesi ratu etma hit henesingasi hag amuhup. Iren hat hapma enorohole belabeg sahaun ulug hat mot-hapuk kamuhup, hat hil hanim sebele fahat-dauk kamuhup. Ai fam de haren An TUHAN Allah anyo mundoho holuk aruhun; ap An nobam enenda ebereg lit wereg on de enahumu siag ale debesehuk fug” isi.

²⁴Hiren hein og-napuk kwit, “Ap sehen anggen on enenggikmen hele waroho foroho angge lol-enebuk alereg a, ite ap enomamne on enenggikmu en ap sabu hetdoho wereg on deloho wilip enebuk alereg a?” ulug hein og-neauk kahep.

²⁵TUHAN en onggo uruk kwit, “Etaroho aruhu en deg. Ap sehen anggen on en hele waroho foroho on lol-enebuhuk, ne ap enolok on enenggikmu en sabu hetdoho wereg on deloho wilip enebuhuk. An namu en heneselei on nim dog yabuhuk anggere; An den hit henomalikisi enahap wendat-enebuhuk.

²⁶An den heneselei on enemep nalug siomo duruk kamag ulug enebuhukmu, iren wat-wat atuk kamuhup. Ai fam ap homi abirangge eneluk atuk kwit, An de TUHAN Allah deg lit, henahap wendat henepuk kahi on de An neg; Nomamne humon, Yakub akni Allah hit henonggo bal-henepihik anyo enoluk amuhup” isi ebag.