Read Ninia Yali YESAYA 5 Bible Online

YESAYA 5 - Ninia Yali bible

YESAYA 5

¹ An nare eke eyabuk fahet suni felaloho imin on ai, hit eke henesanggo holiyug. An nare ninim hundig on at eyabuk de, duk alduk kwe kwenang mun hesilig on wereg.

²Aren eyabuk ebe wutuk kwit helep anggen ohol-heheg witsi. Airoho debesireg anggur ebe on a yatsi, yatsireg kwelabo wereg ma fahet o koloma witsi. Anggur ahaik bereloho belapukmu fahet kwenang bohwe habulsireg, aren anggen fano on yihiku ulug nangno hauk kwit welatsi, famen anggur anggen asig on yihisi.

³Anggere ketia an nare en uruk kwit, “hit ap homi Yerusalem on mel Yehuda on mel an neyabuk ai fahet wene katukdoho wut-numluhup.

⁴An neyabuk anggur yabuk ai fahet eke duk ale on de, duk fug angge welahi no a? Anggur ebe on anggen yihiku ulug duruk men de, nunggwelug anggen asig on yihisi e?

⁵An neyabuk anggur yabuk ai fahet de diroho debehuk: Elehet hukdoho oho on aire meiyaloho embesehuk, ne fak lehet along baloho ulug oho on aire saharoho embesehuk. Airoho debelug wam maro on siaho feheg, eneyog en sobit-sabat esowag ulug embesehuk.

⁶Di enggela su enggela siag on wilibukwag ulug embesehuk. Airoho embeselug de anggur ebe on ai enggik deg duk fug angge embesehuk neg, ne selehe fouk fug angge embesehuk, Airoho debehukdeg de enggelangge mel alog-alog angge mel en kundoho saleg lamag ulug embesehuk, ne hena en oho at fam osit belabik wam no ulug ili uhuk” ulug ebag.

⁷Airoho duhu aire at TUHAN Mun Along wereg on anyo eyabuk anggur yabuk aire, At omaliki Israel on etma deg ma, ne Aren anggur onggwareg en yag dasi on de, it ap homi Yehuda on ai deg ma. At TUHAN en de it fam en katukdoho neg duruk kamuhup ulug enda ebereg wereg, famen de iren kwasikdoho neg duruk, iren wene bekitdoho duruk on ai neg omamne deboukwag ulug boruk famen, we ap homi siahapdoho feserukmu let-nenebukwag ulug hum-ngai uruk on neg wereg.

⁸Hit ap homi enobam wirig onggo bal-deheg, ap homi eneyabuk omano hit henangge on amag ulug dolulu hwelag laheg, duruk kahep on etma re alemat atuk kamek! Horog il misig neg welatlug ap homi amu wereg ma enobaleg eleg atil lauk em o kwenang ai fam de hit neg welamuhup.

⁹An nesanggo hol-hauk men TUHAN Mun Along wereg on anyo en hombuk balduk kwit, “O humon wirig oma mel, eberoho wirig on abirangge oma mel de mundoho foluk atil lahu.

¹⁰Kwenang fam en anggen yihig balduk on etma ambiangma welaruhu fug, ne anggur yabuk yaho on yabuk esan log hulu re sepuluh hektar en fam yaho laruhu famen, de iren anggen yihig de we sepuluh liter en neg hwenangguruk kamuhup. Ne, anggen a folduk on de seratus liter en famen de gandum anggen we sepuluh liter en neg balduk kamuhup” uruk katsi.

¹¹Hit o hubet en indip duruk angge o hup atuk huli etma hit heneyabuk de ik ahalue omamne on nenggeg, ne nalug siomo deheg, duruk kahep on etma re henebe alemat atuk kamek.

¹²Hiren pesta dalug de henambinggong kecapi, gambus, rebana, suling mel ele kong-duruk kahep, ne henahaik anggur ahaik mel nauk kahep. Famen, hiren de at TUHAN di ale su ale wal-disi on mel, ne aren duruk ale mel anyo fahet fureberuk kahep fug.

¹³Airoho duruk kahep ai fam An nomaliki wong-bongdoho wereg on etma ap sabu het-eneplug lauk on hagdoho og-eneplug lahup ai. Ne, it ap melal-enepuk on mel, ap homi we on mel de enasiburu mel enahaik mel obok en waramuhup.

¹⁴Ap homi o Yerusalem fam enowesi kaindeg mel, iren melal-enepuk on mel seberoho pesta duruk kwit enahayeg duruk on etma bil-esaroho waratuk on anyo re ambiang ele foroho lahabeg.

¹⁵Ap homi enebe domog de enenggaliap debesehu, ne ap homi winik-wonog uruk on de sebele fesehu.

¹⁶Famen TUHAN at Mun Along neg wereg on aire Aren demdoho on neg duruk fam de At ebe humon wereg ale anyo ename fohu. Ne, aren di ap su ap at unggul unuk on enawene katukdoho bal-enepuk ai fam de At mun amu eneg wereg ale anyo unug-esauk karuhu.

¹⁷O kota meiyaleg olun deg kwe etma kambing omalik mel domba omalik mel enggelangge seberoho naukmu re it nauk angge obokdoho welamuhup fug.[6]

¹⁸Hit ap homi siag neg duruk-wauk kwit welahep on etma re alemat atuk kamek!

¹⁹Hiren uruk kwit de, “It Israel on enakni TUHAN Allah mun amu eneg on ai en folo-folo ale neg dukwag! Ne, aren duhuk ulug besi ale etma duhumu niren ninil heheg neneluk aheg, duhuk” uruk kahep.

²⁰Hit ap homi wene demdoho on mel kwasik on mel aham-faham eseheg, mum on mel seleg on mel aham faham eseheg, asig on mel mit on mel aham faham-faham eseheg, duruk kahep on etma re mun alemat atuk kamek!

²¹Ne, hit henonggwareg en nit mundoho enggat deg lahe, ne mundoho nenoluk deg neg boruk kahep on etma alemat atuk kamek!

²²Hit ik siomo enepuk on anyo nauk ale fahet bogdeg lahep on etma alemat atuk kamek! Ne, ik omamne on siomo enepuk on ai eke on nim eke on nim misigmu hwenangguruk kahep on aire mun nik aleroho henambong sereg lahep.

²³Famen de hit henenggik apmane saburoho hwelaul ulug de ap siag duruk on etmano loloho feseheg, ne ap siag duruk fug on it enawene katukdoho bal-esa on kwe bal-enebeheg, duruk kahep.

²⁴Hit de henakni TUHAN Mun Omamne wereg on anyo wene hweag-hesasi on etmano nenerim ulug embeseruk kahep, ne hiren ap homi Israel on enakni Allah mun ame eneg on anyo sebeloho foruk kahep. Ai fam de, siag-siag angge mel, enggelangge mel bug on indok harep mundoho nauk anyo hag de hiroho re henomanggen mun filik aheg, henowil bug aheg, hol en mundoho fi eseheg, duhu.

²⁵TUHAN en de at omaliki unggul unuk on anyo fam olok enepsireg, it enobam unggum feseikoho fik-fouk deg wereg. Dom-dom mundoho elek-felek uhu; it enebe wareg de enggelangge singon koboke fene hwik-esaukmu wereg hag waroho lin-lan uruk kamuhup. Famen de TUHAN en olok enepuk kwit de aren unggum enobam foruk ale aire fohu neg.

²⁶TUHAN en ap enunggul unuk yatma[7] on wol-enebuhumu it enebe folo-foloroho neg wamuhup!

²⁷It enebere weim yapuk ale fahet lik-louk deg enap, ne ko mel enepuk fug enap. Ite nohoruk eleg ne noho inil enepuk eleg on.

²⁸Enandog de mun ambiang werelegma re enasehen enggela fam kwelabeg lit wereg. Enangge kuda eyog ahap de helep yihig hag deg, ne enangge kereta eyog de hol sielu en maseruruk hag duruk.

²⁹Iren on ap tentara re no singa en at nauk angge ket senggel dalug kouwa duruk hag dulug de mundoho buroho hwelalug laukmu re ap en oho seneruk fug alereg.

³⁰Nukoho ai salim ap homi Israel on wereg kwe abirangge etma re weim yabukoho enap durukmu re iren duruk on aire ik laut u uruk hag deg. Furiek, o kwenang ai fam abirangge etma mundoho heik deg lit hopo dik deg angge. Seleg anyo re mundoho heik koruag aha.