Read Ninia Yali YESAYA 50 Bible Online

YESAYA 50 - Ninia Yali bible

YESAYA 50

¹TUHAN ele Israel fam uruk kwit, “An nomaliki yei, hiren boruk kwit de, ap en enohwesi muko wilibi feseruk anyo hag, An den muko wilip nenepuk boruk kahep a? Aireg halug de minggituk on ai fahet surat baloho foruk on de kema wereg? Hiren boruk kwit de An den hat onggo hun napuk boruk kahen, Ap akni eke en amloho ap baleg angge heng-enepuk on fam onggo hundutuk hag disi boruk kahen? Eleg airoho re fug! Hat hetdoho hwik habik lausa aire, we honggwareg hasiag nim kwasik ale nim duruk katihin ai fam!

²An den it nomaliki wol-enebik waharuk li em, nunggwe ulug it An nomaliki on en ap misig en ulug oho eke onggo uruk fug? Iren boruk kwit An den it enahap wendareheg lole feseheg duk fug alereg en ulug, it bik-bok wereg a? Dik demdoho anggere, An de melal-enepuk fam de ik laut firitog atuk katsi, ik lauk on omano kwenang iringgigmu deberukmu, ikan mundoho wat heg lauk kwit filik amben sang uruk katsi.

³An den bohol de sing on mum-mum angge debehuk, An den kain belahi sum halon hulilip debehuk” isi.

⁴TUHAN Mun Leho wereg on anyo en an nele uruk fam, ap enobam lilipma deg on enomamne debesoukwag ulug, an nele matuk ale mamul-napsi. Hubet hundig-handig etma fam, Aren an hweag-nutuk ale omano holukwag ulug, an nendama duruk kam ale neg nabukwag ulug nomamne kwelabe nobaharuk.

⁵TUHAN en an wenggelduk on og-nutuk mu; ele sahale folug At wereg man nambol han sombandoho laheg dihi ha fug alereg.

⁶ Ap an yeik nowatuk on ai nambol og-ereheg; nelahaunde re ap nombanisong lit hauk on anyo og-ereheg, duruk kahi. Ap en enalitno nabeheg, an wasubag sup nabeheg durukmu, An nalukwe hebeloho fu esauk kahi fug.

⁷TUHAN Allah en an let napukmu atlug de, an nenggali watuk fug. An nenda sebel howag ulug, omamneap napuk; an fobik nenggali aruhu fug ulug nolukdeg.

⁸ Nakni Allah horogma wereg ma atlug de, hat siag duruk kahen fug ulug hweag-nutuk. San akol eleg nabut baluk alereg? Nit nambieg wene walug lakohon. Sa hal angge en an sebele nobahauk alereg? At an horogma wamag ulug hweag-emek.

⁹Dik demdoho an den TUHAN Mun Leho wereg on anyo en an nibil atuk, mu re ap sa hal angge en ambong seroho an nobam siag duruk kahen uk alereg Ap an nobam dopno neauk on de sum mining on lobulong aeg en balduk hag eleg amuhup.

¹⁰Yaho hit TUHAN leho foruk kahep on suma mel, At Amingming angge ele ai holduk kahep on mel suma, kobokwe hit lauk kahep on de mum deg lit deg, seleg hit henobahet ombagbag henepuk fug lit deg; famen de TUHAN fam neg henenda demdoho boruk kwit; Allah fam neg dipdeg lit wereg lamek.

¹¹Yaho hit ap amu on alema re fesoukoho neg duruk kahep on suma, hit henonggwareg en wene melaloho fahat dauhup on ai fam henebe elehap dobahat dahup. TUHAN en neg etma durukmu re, hit de anggin-fanggin anggoloroho hahup.