Read Ninia Yali YESAYA 51 Bible Online

YESAYA 51 - Ninia Yali bible

YESAYA 51

¹TUHAN ele diroho isi, “Hit nenahap wendat neneplep ahi boruk kahep on mel let henebukwag ulug An nakit heng nabik waharuk kahep on nim en An nele uruk kahi on holiek. Hiren helep dom kema on fam en fele henepswa, helep habuldukmu re keman habul henepswa ale etma eberiek.

²Henembu henamulik Abraham nim Sara nim hit endag-henepfag on etano ebet hakiek, An den Abraham wol-dirihik li at omalik welatfag fug; aireg latfagma An den at fanoap deberihikdeg at ambiangma on hum-hamdoho sahareberihik.

³Yerusalem, An den hat onggone hobaharuk karuhuk, meiyal heg wambisi kwe welahep on mundoho onggone henobahakuk. Lei-lei birim uruk kwe etma re An neyabuk Eden mun hesilig latsi on anyo hag debehuk. Etma ap yinggig lit enahayeg duruk kamuhup suni wiliboho uruk kwit dang duruk kamuhup.

⁴Yaho hit An nunggul unuk on su re An nele fureberuk kamek o, yaho hit An nomaliki on su An den uruk kahi ale etma furoho holduk kamek o. An den ap enunggul unuk angge fam mamul-enepuk kahi, An nawene melaleg en it selehap debeseruk karuhu.

⁵An den enahap wendaruk salim anyo mundoho horog aha, An along aruhuk alere horog hop aik waharuk. An namu en neg unggul unuk-unuk angge etma melal-enepuk karuhuk. O bumbuk yat kwe en An nangno nabeheg, An den mun fulu laleg ale duruk kahi on omano fahet enenda ebet nusug lit welaheg, duruk.

⁶Bohol lahap halug kwenang belap hakiek; bohol de hobu hag mun eleg aruhu kwenang de sum dilip atuk on hag dilip aruhu, ap homi ilonggoma wereg on abirangge re kolun waratuk hag waramuhup. Famen de enahap wendatuk on An den og-esahuk on aire mundoho welaruhu on og-esahuk. Ne, An nalong wereg lahi ale aire fotog aik lahu fug.

⁷Yaho hit An nunggul unuk on omano, An nele uruk kahi on holiek, hit de demdoho on de ke no ulug de henoluk deg; An den wene hweag-hesauk kahi on de hit henendama wereg. Ap en bulip henepuk halug henakol duk fug iren enalitno henepuk halug henenda fit am fug.

⁸It mundoho re sum lobulong en balduk hag, kain domba oruk on belbel en balduk hag, mundoho eleg amuhup. Famen de enahap wendatuk on An den og-esahuk on aire mundoho welamuhup, ne An den enalong on og-esahuk on aire bekit hindik-hundig welaruhu.”

⁹TUHAN nenakni, hebe inatlug nit let-nenebin, Hat Homamne fam ninili og-nenebin. Endam Haren Rahab[72] bereloho ferihin li em, ne kisu naga laut ai daloho ware ferihin li em, dirihin hagdoho hebe holuk in amin.

¹⁰Haren neg ik laut firigdoho iringgi ferihin, ik laut ahum mun ilonggo yat deg on etma Haren neg iringgi ferihin. It homaliki enahap wendat-enepihin on etmano nindig-amag ulug, Ik ai fene Haren kobokwe yaho ferihin,

¹¹Ai fam ap homi TUHAN en wundetdoho fesehu on de sombandoho watlug, it o Yerusalem kuruk kwit enahayeg en ngaiknggog duruk kamuhup, enahayeg hum aruhu mu it enorohole unda healoho neg welamuhup. Fong watuk on mel, anggolo-fanggolo hauk on mel omano mundoho eleg aha ulug, iren enahayeg deheg, enanggiluk deheg, duruk kamuhup.

¹²TUHAN ele uruk kwit diroho isi, “An den hat onggon habuhuk. Nunggwe ulug hat ap homi eleg amuhup on fahet hakol enepuk kahen, ap homi enggela angge hagdoho hwik-esahup etma fam nunggwelug hakol enepuk kahen?

¹³Haren de TUHAN wal-hapsi on, bohol diahan debeheg, kwenang indip oboule feheg, disi on anyo hapeleg atihin deg duruk kahen a? Nunggwe ulug hat nukoho hunduko howag eleg duruk kwit ap bereloho fahat-enesug on olok fam-fam duruk on anyo fam hakol duruk kahen? Dik demdoho anggere, iren enolok atlug hat hobam duhup on aire omamnereg fug.

¹⁴Hele wareg wereg on folo-folo wundet debesehu; It nauk on anggolo deg lamuhup fug, waramuhupmu eke sal-enebuhup fug.

¹⁵An TUHAN Allah deg lahimu, An den neg ik laut yenden-fenden esaukmu funag-lenggag angge duruk, nunuk de di ale su ale duk ale neg deg on ai.

¹⁶An den bohol diahan[73] deberihik deg, Kwenang indip nim doale ferihik. An den nele Sion fam uruk kwit, hit de An nomaliki; An den hat hobam wene hweag-hutuk karuhuk, ne An nomamne fam de hat napma fahat-husug laruhuk” isi ebag.

¹⁷ Yerusalem yei, inamin o, holuk inamin. Unggum humon TUHAN olok en belabik wahasimu hauk kwit welahen on anyo mun eleg aha.

¹⁸Ap homi hat heyog indip kwe on en de eke melal-henepuk karuhu fug, ap homi hat hobam wereg on en de hat eke kwe hweag-hutuk kamuhup fug.

¹⁹Hat de unggum de indip biren on hobam waruhu: Dog ambiangman de hobam bumbuk luluhundoho eleg aruhu, ne homaliki holduk on de siburu obok en mundoho waramuhup. Ap en eke hat helaheg en let habeheg, henda aho ware feheg, duruk on eke welaruhu fug.

²⁰Kwe hundomog ambiang-ambiang etma, ap hat on enomamne eleg atlug, no rusa sum yihig elma kelog ik kuruk hag, warail lauk kamuhup. It de TUHAN olok enobam fesehu, Henakni Allah ahummu het deg on ai henobam aruhu.

²¹Ap bereloho fahat henesugmu welahep on suma holiek, ap siomo duruk on hag dal-dal angge duruk kahep suma holiek!

²²Henakni TUHAN elere diroho uruk, hit henakni TUHAN Allah hit ili og-henepuk on en diroho isi, “Anggin-fanggin An den og-hesauk kwit An nasuahal fam og-hesauk kahi on aire, fobik hit famen An den lisoho wahuk. Nasuahal de fobik eleg aruhu, hit eke nim anggolo hahup fug.

²³Anggin-fanggin aire hit sebeloho fahat henesug on enobam fesehuk, iren hit fam kwenangma ying-amek ulug hweag-hesalug, sobit-sabat henepuk katswa. Iren de hit fahet de kobokwe ap lauk kwe on hag debelug airoho henobaharuk katswa on fam fesehuk,” isi ebag.