Read Ninia Yali YESAYA 52 Bible Online

YESAYA 52 - Ninia Yali bible

YESAYA 52

¹ Hat Yerusalem su, inamin o! hebe holuk amin! Henda omamne dakin! Hasum halong wereg on wan-dakin! Yerusalem kota amu eneg on yei, hat hasokole ai fam ap emereg on eke kwik wamuhup fug.

²Yerusalem yei ololoma yinggig lahenma etman inamin o, ololo hahap fam atsi on etma kwel-esakin abi. Ap homi Sion on hele wareg welahep on doma u! Hanggolopma bosie omanggen sabu het deg on ai lol-esakin,

³TUHAN ele omaliki hweag-esauk kwit, “Hit onggo eleg angge we hesangge og-henepswa ma re, ketia lole henobaharuk ale ohore we onggoleg lol-amek.

⁴Atam hit o Mesir etma lauhupdeg etma ap bohondoho welatuhup. Airoho wereg ma Asyur en indip eleg kweleg luluhun henepswa.

⁵ Ketia An den nunggwe ale dimin e? Ap Babel on en oho higit ale hele wat henepswa. Iren hit sebel henesug lit enawonog atuk kwit An enal belesim wat-hesauk katswa.

⁶Ai fahet de hiren An Allah wereg lahi anyo demdoho boruk kwit, ai salim hit heneluk amuhup, An Allah en nele hit fam maruhuk ale ai heneluk amuhup,” ulug hweag-esebag.

⁷ Ap yonggo mondotuk on waharukmu inil eberoho hahup; At waruhu alere dom unggul etma yaning-hwaning waruhu. Aren de wene fano on lioleg wene walug waruhu, Wene o Sion ahap wendaruhu on fahet walug waruhu reg, aren uruk kwit, “Hit henakni Allah aire Raja wereg!” Uhu.

⁸Ap kota along baloho kahaleg on en weim yabukoho amitmit duruk angge holin, it ambine enahayeg en duruk ai! Aire it inil anggen en, TUHAN sombandoho o Sion waharuk en duruk.

⁹Yerusalem meiyaleg angge omano en henahayeg en duruk kamek TUHAN en omaliki enenda onggone feseheg, fiselaroho feseheg, duhu.

¹⁰TUHAN en omamne wereg ale anyo it enunggul unuk mundoho fam unug hahumu, Ap homi kwenangma wereg on abirangge en de Allah niren on fam enahap wendatuk on anyo hahup.

¹¹ Yaho hit Allah obam ilonggoma duruk angge walug lahup on de, hit kota Babel ai embeselug wilibik lakiek! Di on su on emereg on[74] etma re bal-ha fug, hit la fug angge henebe dag eneko fahat da kiek.

¹²TUHAN en hit melal-henepuk karuhu; ne Israel on enakni Allah anyo en foma-foman hit along baloho wereg ma re, hit fobik fetag-fetag lahup fug, ap enemu en heye longgo uruk on hag lahup fug.

¹³TUHAN ele uruk kwit, “An namingming angge en ambiangma fano duhu; At mit-motdoho leho fohup.[75]

¹⁴Atam ap humdoho en At inil hahupdeg youk lahup, orohole mundoho siahap aruhu mu, ap homi enorohole hag eke deg laruhu fug.

¹⁵ Famen de Aren duruk fam ap enunggul unuk abirangge omano en yande-fouk duhup, raja enobam fog uhumu re enambilik dopnoroho welamuhup. Atam it enapelegdoho welatswa on etmano, it inil halug furebehup” ebag.