Read Ninia Yali YESAYA 53 Bible Online

YESAYA 53 - Ninia Yali bible

YESAYA 53

¹ Airoho ebag ma it enunggul unuk anyo en onggo uruk kwit, “Niren holduhuk on etma fahet san demdoho bohu? Sa fam TUHAN omamne aire ename fesi e?

²TUHAN enda boruk kwit At amingming angge ai asimit kwenang bug deg ma wilipuk hag wilibuhu boruk, Niren at fam buhun alereg ma eke fu ha on wereg fug, nit nenambono dehe ha on de mun eleg.

³Niren nenelitno debelug at ahaye deberuhuk on, ap anggin-fanggin haruruk on aire, ouk inim anggoloroho hasi on anyo. Ap misig en ulug oho at fu hauk ale fahet enendareg fug, niren ohore at embeseruhuk deg welahe.

⁴ Niren boruk kwit de, nenek duruk ale aire unggum Allah en at og-itsi mu boruk kahe, famen, ebe demdoho re ouk niren on omano aren harisimen, nit anggolog ngogdoho hauk kahe ale omano at anggin hasimen.

⁵ Famen de at ahap yebil atsi etma re nit nenesiag fahet, dilip-dalap esausa aire nit kwasik ale duruk kahe on fahet. Nit nenahap wendaroho at unggum og-utswa, ahap forisi kwe omano en nit hiling nenebukwag ulug disi.

⁶ Nit abirangge re domba longgo uruk on hag longgoreg lit welatuhuk, nenemu hundomog en kobokwe heradauk katuhuk. Nit abirangge nenolok siag ale duruk kahe on etma TUHAN en at emberimmu sahali-burebesi.

⁷ At ebe it enolokdoho watswa famen de, at obabut lombukdoho wauk katsi. Domba omalik waroho senggeldukmu walug laukmu hag, ite domba isinga oruk balukoho walug laukmu duruk hag walug lausa, famen at ele isi fug.

⁸At ebe hetdoho folug ayo wutswareg, at ebe lisulug lalug unggum waratuk on obam fousa. At ebe keroho atmisi ulug eke fu debousa fug; nit nenunggul unuk on nenesiag fahet at waratsi.

⁹ Aren kwasik ale eke disi fug famen, aren ap seiale lal-enepsi fug famen, at ebe re ap siag ale duruk on nim misigmu sal-enepswa; ap dung enap enesahalimu sale fousa,” ulug uswa.

¹⁰TUHAN en at anggin howag ulug enda besi, ne nenebe abirangge nenesiag horukwag ulug, wam waroho yalduk hag ebe og-omag besi. Airoho disi ai fam at umur yatdoho wereg lit at ambiangma on il esahu, at fene en TUHAN enda boruk ale higit atsi.

¹¹Ai fahet de TUHAN en uruk kwit, “Mundoho anggin-fanggin ai nenek debelug, at mun ahayegdoho obam homo debesi. An Namingming angge aire an nendama nahayeg boruk kahi ale disi, ap humdoho unggum hwela on anyo aren wasi; at alahasikdoho An den it enesiag napelehapdoho embeseruk karuhuk.

¹² At enda fano fam ebe oluk anyo og-esasi, ne at ebere ap enolok on enesahalimu wenag aik lasi. Aren ap homi humdoho enesiag harisireg, enesiag elehapdoho[76] fesoukwag ulug enobahet somban uruk. Ai fam at disi onggo re An den ap homi humdoho og-itihik, at ebe re ap homi demdoho on nim obale hwelasi,” isi ebag.