Read Ninia Yali YESAYA 54 Bible Online

YESAYA 54 - Ninia Yali bible

YESAYA 54

¹ Yerusalem, endam hat de hwe ibili on hag, omalik enderuk fug on hag deg latihin. Famen ketia re homaliki hum-hamdoho wereg ma, homi enehunsi en embeseruk on enomalik dot deg kweleg, hat homalikisi neg alongdoho deg ma, hanggiluk duruk kwit, hahayegdoho suni uruk kamin.

²Hat hebe welahenma kemah wirig on etma wiril hakin; sabu lilduk on de yatdoho lit hakin ne bebug deleg on de omamne debein!

³Hat hebe re saha uruk kwit bekit fil aik laheg, hware fil aik laheg, duhun. Ap homi haron de it enunggul unuk amu on en enanggwenang fam etma welamuhup, ne kota ketia ap wereg fug kwe etma welamuhup.

⁴Hat henggaliap hobahakup fug anggere hakol duk fug; ne enalitno habeheg, dug-dag eheg, duhun fug. Haren de hebe sauwe deg lit dipdoho duruk katihin fug on omano hapeleg aheg, hebe sohwe wereg lit hilmu siag-siag uruk katihin on etmano hapeleg aheg duhun.

⁵Hat wal-hapsi on aire hahun hag aruhu, Israel enakni Allah amu eneg on aire hahap wendat hapuk on aruhu. TUHAN Mun Along on ulug unuk de ai, At de Allah o kwenangma along wereg on.

⁶Israel, hat de ap en ohwe ket duhum angge embeserukmu, enda wat-dauk kwit wereg anyo hag deg lahen. Famen de Allah en hat nikangge wol-hapuk kwit, ele diroho uruk,

⁷“We il misig famen An den hat hobahalug welahi; nenda mun hundig fam An den hat nikangge og-habuhuk.

⁸An nolok hum ale hapihikdeg, we horog elamna fahet hat hobaharihik. Famen An nenda hundig mundoho aham duk fug on anyo fam nenda hundig hapuk kahi.” Airoho ulug Allah hit henahap wendat-henepuk on anyo en isi.

⁹ Eke uruk kwit, “Nuh wereg lit An den sali watuk kwit, ik fu waharuk kwit kwenangma yenggelik waruhu fug ulug irihik hag, ketia oho An den hit fam nolok henebeheg, henowaruhuk ulug henakolap kwelabeheg, duhuk fug.

¹⁰Dom-dom mel duk-duk mel elek duhu famen, An den hit nenda hundig henepuk ale bale fohuk fug. Henenda seap henobahakuk ulug sali irihik on aire An den hundig seneg lit neg welaruhuk” ulug TUHAN hat enda hundig-hapuk on anyo en isi.

¹¹ TUHAN ele uruk kwit, “Hat Yerusalem kota sebeleg on hag deg lit, ap homi hendama onggon hapuk on wereg fug mu hobabe elegdoho welahen on su. Hat hoboule re An den helep onggo humon famen neg nikangge doale hobahakuk.

¹²Fak lehet omamne on de hele unuk delima fam wuruhuk, sokole humon kuruk on de helep permata fam wuruhuk, fak lehet haren on etma re helep mutu manikam ratna fam wahuk.

¹³ Ap homi o etma wereg on abirangge re An den mamul-enepuk on amuhup, It de enangge sigdoho mun eberoho amuhup.

¹⁴Hat de katukdoho duruk on emberimmu wiri hobakuk, hamelmel ale mel, sebeloho fahet-enusug ale mel etma yatma debehuk.

¹⁵Hat bin howarik kwik waharuk halug de, An den mingming-enebuhukmu re fug, ap sa en henowarik kwik waharuk famen oho re hat sebel neg atuk karuhun.

¹⁶An den neg ap sehen wutul ulug indokma weratuk kwit, indok fisatuk on etma An den neg wal-enepihik. Ap senjata fam enowatul ulug sehen seneko duruk enap tentara etma re An den neg debeserihik.

¹⁷Famen de sehen etma abirangge hat howatuk on fahet wuruhup on ambiangma higit atuk karuhu fug. Ne, wene katukdoho kong-duruk obam en hobam hekip heahup on de haren an siag dirihik fug ulug fekaroho uruk karuhun. An namingming angge fam de enalong atuk kwit wereg on onggo og-esahuk” ulug TUHAN ele airoho isi ebag.