Read Ninia Yali YESAYA 55 Bible Online

YESAYA 55 - Ninia Yali bible

YESAYA 55

¹ TUHAN en uruk kwit, “Hit abirangge henenda ahe henepuk on etma, ik foukdeg wereg angge na manik. Hit hene uang eleg on waharuk kamek, gandum we onggoleg hwelalug nakiek! Anggur mel ahowe mel fouk deg wereg, anggere we hwelakiek.

²Henobam homo henobahauk fug angge fahet hundutuk ale etma nunggwe fahet, henehummu homo henebuk fug angge fahet etma nunggwelug yabuk duruk kahep? An den diek ulug melale-henobaharuk kahi ale ai duruk halug, hit fano angge nahup, ne unduk mun ibik-ebe angge nauk kamuhup.

³ Hit An nunggul unuk on etman henesanggo holiek, An den henoluk mundoho welamuhup on og-hesahuk anggere, An nakit waharuk kamek. An den Nenda hundig deheg, dipdoho duruk kwit welaheg, duruk karuhuk ulug Daud fam sali wat-itihik anyo fam anggere, An den hit hininim sali mundoho welaruhu on watuk kahi.

⁴Ebe demdoho re at ai An den melal-enepuk on mel sehen foroho enowe panglima mel welamag ulug deberihik, An nalong on welahi ale anyo it enunggul unuk amu on wereg kwe fag-duruk kamag ulug deberihik.

⁵Hiren de it enunggul unuk amu on enayonggo fesehupmu, iren folo-folo hit henakit wamuhup, An TUHAN Allah, Israel on enakni Allah mun eneg welahi on en hit henunuk leho ferihik mu re nonggwareg nunuk fam ihi” isi.

⁶Duk alereg li em eta sombandoho TUHAN akit waharuk kamek; At ebe horogma wereg li em eta obam wol-duruk kamek.

⁷Ap kwasikdoho neg duruk on etma re enebe wereg ale hwale fahat-dauk kamag, ne iren wenggelduk ale etma aham duruk kamag. TUHAN en enda hundig duruk ale anyo hwelowag ulug, at ebe TUHAN akit sombandoho waharuk kamag. TUHAN en de enda fano fam enesiag apelehapdoho foruk anggere, aren Allah nit nenakni anyo fam hebeloho waharuk kamag.

⁸TUHAN en uruk kwit, “An den wenggelduk kahi on aire haren wenggelduk kahen on nim higitdeg fug, ne An den duruk kahi ale aire haren duruk kahen on nim higitdeg fug.

⁹Kwenang fam en bohol yatdeg wereg ai hag, haren wenggelduk kahen on emberimmu An den wenggelduk kahi alere airoho, ne haren duruk kahen on emberimmu en An den duruk kahi on emberimmu nim de airoho deg.

¹⁰ Osit bohol fam en wambik watlug, sombandoho laharuk eleg, ite kwenangma oweruruk kwit, a yaho angge wilibi feheg, hesili feheg, ne anggen yiko a foleheg, yareheg, dukwag ulug debeheg, duruk.

¹¹Ai hagdoho An nele uruk kahi on etma re, we alemaroho sombandoho An nakit waharuk fug, ite An nenda boruk kahi ale anyo ambiangma higitdoho deberuk, ne An den airoho amag boruk ale anyo higit aik lauk.

¹²Hit de henenda henahayeg fam o Babel embeselug wilibuhup, henahap wendaroho hondog-heneplug wilibuhup. Dom inim duk inim de enahayeg en holog duruk kamuhup, ne e yabukmu wilibig on de enenggik dag duruk kamuhup.

¹³Alog-alog angge obalma re e wali aruhu, ne enggelangge obalma re owil angge wilibuhu. Ai aruhu ale re An leho nobaharuk kamag ulug aruhu; aire eneg ale mundoho wereg laruhu fahet aruhu” isi ebag.