Read Ninia Yali YESAYA 56 Bible Online

YESAYA 56 - Ninia Yali bible

YESAYA 56

¹TUHAN en omaliki enobam ele uruk kwit, “An den nawene melal henepuk kahi ale higitdoho katukdoho neg duruk kamek. Il misig welatlug An watlug henahap wendat henebik waruhuk anggere An den katukdoho duruk kahi ale mel ename feik waruhuk anggere bekitdoho neg duruk kamuk.

²Ap nukoho Sabat salim higitdoho duruk on mel, nukoho ai emere foruk eleg on mel de An den fanoap enepuk karuhuk. Ap kwasik ale duruk eleg on de, An den fanoroho neg debeseruk karuhuk” isi.

³Ap bog on TUHAN omaliki nim seberuhup on de “Iren uruk kwit, TUHAN en an At omaliki nim seberoho mot-duruk kamag ulug isi fug,” ulug uhup hayog. Ap eke ouwali oho on en halug enenda yatdoho wenggel-hauk kwit, “An de TUHAN omaliki nim kabog-duruk kahi ha fug alereg, an nomaliki endag enebuhuk fug mu anggere,” uhu hayog.

⁴TUHAN ele it hweag-esauk kwit, “Hiren nukoho Sabat ai fano ap deberuk kamuhup, hiren lahe An nele sali hweag-hesauihik ale dipdoho deheg, ne An nendama nahayeg boruk ale deheg,

⁵duruk kamuhup halug, hit henenuk de An Nobam wirig ilonggoma etman mel, An nunggul unuk on enesahalimen mel ebet henepuk karuhuk. Enomaliki ap angge hwelani angge humdoho wereg ale re ha famen de ebet henepuk karuhuk ale aire along deg, hit An den henenuk fano on fobik napeleg aruhu fug on og-hesahuk” isi.

⁶TUHAN en ap bog on TUHAN omaliki nim sapliroho wenag atswa on etma fam uruk, TUHAN henenda hundig duruk kwit At fam neg kabog-duruk kahep on, nukoho Sabat alongap deberuk kahep on mel, ne Aren sali wene isi ale neg higitdoho duruk kahep on fam uruk kwit,

⁷ “Hit An den og-heneplug Sion An nanduk eneg[77] on anyo fam waruhuk. An nobam wirig mu kabog-durukmu etma an den nahayeg og-esauk karuhuk. Hiren foruk angge waroho yaldukmu yaloho og-nutuk mu An den wauk karuhuk, An nobam wirigmu ai unggul unuk-unuk angge en somban uruk obam uruk kamuhup,” isi.

⁸TUHAN Mun Leho wereg on, Israel hwik enepswaman sombandoho og-eneplug wahasi on anyo en uruk kwit, “An den ap homi amu on og-eneplug waruhukdeg, it mundoho kabogdeg wereg on nim seberoho kabog-duruk kamuhup en feseik waruhuk” isi.

⁹TUHAN en At omaliki houmdoho bil-esaroho it enunggul unuk bog on mingming enebuhumu mene olok on hag wamuhup.

¹⁰TUHAN ele uruk kwit, “An nunggul unuk on melal-enepuk on etma re ap inil hupnig on wereg! It de di ale su ale enapeleg deg. It de mene ele hobu lareg on en helak duk fug angge noho fam neg duruk kwit ena wauk on hag deg. It de nohoruk kwit wereg ale fahet mun enahayeg deg!

¹¹It enebe re mene huhuruwe on homorebeseruk ale enapeleg on omano hag wereg. Ap melal-enepuk on etma re fureberuk fug. It enemu domog en de enenda boruk ale hundomog duruk kwit, ambiangma hwelaul on anyo ulug neg hera duruk.

¹²Siomo duruk on etman uruk kwit, ‘Nit anggur humdoho naul deg nenahum firoho nakohon! O yoho re siag famen sono re mun fano deg laruhu!’ uruk” ulug ebag.