Read Ninia Yali YESAYA 57 Bible Online

YESAYA 57 - Ninia Yali bible

YESAYA 57

¹Ap fano on mel bekitdoho neg duruk on mel waratuk mu re ap eke furebeseheg, hwale feseheg, duruk fug. It mundoho waratlug de it anggin on fam en ohwal dalug enobam fanoroho kel wat-dauk kwit wereg.

³Famen hit de henunggul unuk siag neg duruk kahep on, henawene katukdoho balukwagdoho manik! Hit de ap hwal ale duruk on mel, babi duruk on mel, onggo fahet hambena duruk on mel nim de aham deg lahep fug!

⁴Hiren de sa fahet unda yatuk kahep? Sa bulip-duruk kahep? Hit de wene sahale folug deheg, seiale eheg, duruk on ambiangman welahep fug no a?

⁵Hiren kembu dewa hesilduk on apne wauk kwit hit henenda ahe laharuk on anyo en og-heneplug henahan ousa ahan apmane etma lowag ulug embeseruk kahep. Hiren henomaliki ik fanggong kwe mel, helep honggoleg elekwe mel, sale feseruk kahep.

⁶Ai fam de sukaneroho hiren helep beik-beik angge duruk on etman walug kabog-duruk kahep. Hit henangge on de etma! Helep omano fam de hiren anggur ahaik hilili feheg, gandum og-ereheg, duruk kahep. Airoho duruk kahep ale etma fahet, An den fano boruk ulug boruk kwit duruk kahep a?

⁷Hit dom unggul kwe lalug henanggembu enda ahayeg howag ulug waroho og-ereheg, ne ahanhan henepuk on anyo homoroho deheg, duruk kahep.

⁸Hiren de kembu ahut ilitdeg mun nenggali alereg on omano henobam sokole kwe foruk kahep. Hiren An nobaharuhupdeg, hit henesum nonggole folug, nohoruk angge anggwe deberuk on fam lahaik lalug de hiren henenda hundig on, inim nohoul en ulug onggo bale folug de inim nohoruk kwit henebene amolmol henepuk on anyo etmano en homo dobahat-dauk kahep.

⁹Hiren de ahalue mel, amben fano angge mel aro dulug Dewa Molokh wereg ma lauk kahep. Hiren de henayonggo angge o bumbuk yatma on fam mon-enebeheg, ne ap waratlug laukmu etmano famen oho mon-enebeheg, duruk kahep.

¹⁰Hit henobam si uk fug angge dewa omano hera-enebik lauk kahep. Hiren boruk kwit iren henahayeg keron kwelabe henobahail laukem de henebe ko henebuhu fug ulug duruk kahep a?

¹¹TUHAN ele uruk kwit, “San dewa etman henakol kwelapukmu hiren seiale uruk kwit de An nobam henakol napuk kahep fug? An den anunuroho bok welahi ai fam hiren An napne wauk kahep fug a?

¹²Ai famen An den hweag-hesauk kwit; hiren nit buhundeg lahe ulug duruk kahep etare we hwenaroho on, ne hit henobabut duruk kahep on eta fam hit let-henepuk ale eke wereg fug.

¹³Hiren henele hwiruruk halug de dewa etman henahap wendat henebik wamag! It de hol en fi esahumu longgo uhup, ne nele ahe misiham fu esauk on fam eleg amuhup! Famen de ap homi An fam nenalong baleg welamag ulug duruk on de o kwenang ai akniroho wereg lit An nobam wirigmu etmano An napne wauk kamuhup” isi ebag.

¹⁴It eke uruk kwit, “An nomaliki enobahet kobokwe buhun-debelug hilinggi feyek, kwe bal angge wereg on etma amu-amu oko feyek.” Uruk.

¹⁵Allah Mun Leho wereg lit amu eneg wereg on, mundoho-mundoho fahet along wereg on anyo ele diroho uruk anggere, “An de obale mun enegma lehoma etlema welahi, famen de ap enenda sebele fahat dalug duruk on mel, enesiag fahet enenda wat-dauk on mel, enesahalimu wereg lit it etma enahayeg elek atuk on mel enenda ebereg eleg atuk on omano buhun-debesemin ulug welahi.

¹⁶An den nomaliki fam li mundoho-mundoho fahet siahap debeseruk kahi fug; fobik faheret An den nolok enepuk kahi fug, An den it enolukap[78] debeseruk kahimu re, iren enobam si ulug duk no en de.

¹⁷It enesiag de ilil-mulil deg ai fam An nolokap kwelap napuk, ai fam de it unggum og-esauihikdeg lin-esauihik ai. Famen it enenda haro deg lit enonggwareg en kwe lauk ale anyo neg momal-dauk.

¹⁸An den it enobabut duruk ale mundoho esauihik, famen An den it hiling enebuhuk neg. An den it hondog-eneplug laheg, let-enebeheg, ap homi enenda hesiloho wereg on onggone feseheg, duhuk.

¹⁹ An den de ap yatma on nim horogma on nim fam, enenda seroho wereg on ap homi abirangge og-esahuk. An den nomaliki hiling enebuhuk.

²⁰Famen ap enolok on de ik laut ahum, bok am fug angge wereg hag deg. Ik il omamne en de al-alangge mel, sabelep mel harulug waharuk ai hag deg.

²¹ Ap siag duruk on en de enenda seroho wereg fug” ulug TUHAN ele isi ebag.