Read Ninia Yali YESAYA 58 Bible Online

YESAYA 58 - Ninia Yali bible

YESAYA 58

¹TUHAN ele uruk kwit, “Henele omamneroho hwiriek! An nomaliki en enesiag duswa on fahet hweag-esakiek.

²Iren nukoho hundig-hundig An napne weheg, An nenda boruk kahi ale hera deheg, durukmu iren duruk ale etma re fano deheg, An nawene melaleg fam dipdoho durukmu hag deg. Iren uruk kwit, ‘Nit de TUHAN apne wauk ale nenahayeg, At awene melaleg katukdoho duruk on mel nenahayeg’ uruk.”

³Enunggul unuk ai en hein og-neauk kwit, “TUHAN il hauk eleg kweleg etma nunggwelug hweang welamul no? Aren fu nenobaharuk fug kweleg, nunggwelug nit nenenda sebele fahat dalug welamul no?” uruk. Airoho urukmu TUHAN en uruk kwit, “Dik-demdoho anggere, hiren hweang wereg lit en de hit henonggwareg dung atuk on neg hera deheg, ne ap onggo fahet yabuk wutuk on etmano henomamne fam sebele feseheg, duruk kahep.

⁴Hweang wereg lit en de hiren wene sahale feheg, yeik yabeheg, ahako fam deheg, duruk kahep. Hiren boruk kwit de hweang airoho welahe on eya fam de TUHAN enda lebe dimisimu niren somban uruk kahe on holmisi ulug duruk kahep a?

⁵Hiren hweang wereg lit de henonggwareg en wat-dauk kahep; hit de enggelangge hagdoho henunggul wamboreg lahep. Hiren de sum karung on doale folug, ul belabe folug de emberimmu yinggig lahep. Airoho duruk ale eta fahet hweang welahe uruk kahep a? Airoho duruk kahep eta An den nahayegdeg boruk kahep a?

⁶Hweang wereg ale An nenda on de su: Ap anggin-fanggin feserukmu wereg on etma lole feseheg, katukdoho duruk elegma anggolo hauk on lole feheg, ap sebeloho fahat enusug on fiselaroho wilibi feseheg, diek.

⁷ Ap homi obok deg nim hit nauk on yohwandoho og-esakiek, ap enobam eleg on hit henobam og-enebiek, ap homi enebie wereg on hit henesum wan-debeseyek, henori let-enepuk ale fahet hekipdoho embesouk fug.

⁸Airoho duhup halug neg de seleg hit fahet o sekan duruk hag lahaik waruhu, ne henayebil de folo-folo ahumbut aruhu. An den hit henahap wendat-henebikoho hinim welaruhuk. An hinim wereg on ai fam de hit henebe unggut-unggut etman along bal-henusug laruhuk.

⁹Ne, hiren somban uruk halug An den onggo hweag-hesauk karuhuk, ne hiren An fam hwi-napuk halug nele onggo uruk karuhuk. Hit henori fam anggin-fanggin feseruk kam fug, minggirig welahep ale mel, enebug siag uruk kahep ale mel etma bale feyek.

¹⁰Ap enesiburu obok deg on fam nauk en og-esakiek, ap sebeleg wereg on fam let-enebiek. Hiren airoho duhup halug de hit horog kwe mum deg on etma nukoho seleg deg hag aruhu.

¹¹Kwenang bug deg on fam etma An den hit hondog-heneplug laheg, homoroho henobahakeg, duruk karuhuk; hit henebe fano neg wereg lit henomamneroho welamag ulug hwal-henepuk karuhuk. Hit de yabuk yahoma ik higitdoho wereg ma hag, ne ik eleruk firitog atuk fug on mel hag, deg lamuhup.

¹²Kota endam on mundoho meiyaloho wambisi on de hiren oboule keram on emberimmu nikangge wuruhup. Hit de, ‘Enunggul unuk fak lehet nikangge weheg, o moluluk disi on omano hwaloho wireheg, duswa enap’ ulug uruk kamuhup” isi ebag.

¹³TUHAN ele uruk kwit, “Nukoho sabat aire TUHAN anukoho ulug leho foruk kamek. Nukoho ai fam de hit henonggwareg en on fahet duruk kam fug. Nukoho aire nukoho henahayeg on ulug ebetuk kamek; nukoho TUHAN en on ai leho foruk kwit de di kwe su kwe lauk kam fug; ne yabuk deheg, henele we obahare ale mareheg, duruk kam fug.

¹⁴Hiren airoho duruk kamuhup halug, hiren An nobahet durukmu re henahayeg hauk kamuhup. O kwenangma mundoho en de hit de leho on welamag ulug henobahakuk. Hit de henomba Yakub en kwenang henobahasimu etmano en anggen yihig fahet henahayeg hauk kwit welamuhup. Ulug An TUHAN en nele mundoho ihi” isi ebag.