Read Ninia Yali YESAYA 59 Bible Online

YESAYA 59 - Ninia Yali bible

YESAYA 59

¹Hiren boruk kwit TUHAN en nit nenahap wendat-nenebuk ale re omamne eleg bouk fug, ite hiren wol-durukmu holuk ale esanggo dahom deg bouk fug.

²Hit henonggwareg henolok deg lahep ai fam, hiren somban uruk kahep on At esanggo holduk fug. Hit henesiag en hit henebe Allah nim il yatdoho welahep.

³Hiren seiale eheg, hwenaroho on deheg, henomamne hasimeg siag ale debeseheg, ap binggi wareheg, duruk kahep ai fam hit siag duruk kahep.

⁴Hiren wene indip eleg kweleg henele hum atlug katukdoho duk eleg angge ayo wiroho enetuk kahep. Hiren de henele seiale uruk kwit, ebe eleg on omano fam hembisig lahep; hiren de ap amu on nale fesehuk ulug wenggeloho feheg, henolok ale deheg, duruk kahep.

⁵Hiren henolok ale duhuk ulug wenggeloho foruk kahep on en waratuk on ename foruk kahep on etma re kisu aeg kamol wereg on anggen ondoho hag deg. Anggen ai sog haukmu re kisu ebe wilibik waharuk. Hiren duhuk ulug uruk kahep on aire ambiangma hit fahet aruhu ale eke wereg fug, aire sum kimaling ahalesa fam wutuk hag deg!

⁷ Hiren de hundig-hundig kwasikdoho duruk on neg wenggelduk kwit de dul ulug folo-folo duruk kahep. Henenda misig debelug hiren ap siag duruk eleg on enowatuk kahep. Hiren lauk kahep kwe omano re siaho feheg, eleho feheg, duruk ale neg deberuk kahep.

⁸Hiren de henebe misig sebereg wereg ale fahet duruk kahep fug, hiren abirangge duruk kahep on etma re katukdoho duruk kahep fug. Henanggobokwe re yaning-am hwaning-am deg ma re ap kwe ai fam lauk on de enahayeg hahup fug.

⁹Unggul unuk anyo en Allah fam uruk kwit, “Ap en nit sebeloho nenobaharukmu, Haren nunggwe fahet nit nenahap wendat-nenepihin fug ulug anyo re ketia nit nenoluk atuk. Niren de seleg amag ulug nangno hauk katuhuk, famen de we mum neg welatsi.

¹⁰Nit de ap inil hupnig on en hag fag-fag angge duruk katuhuk; o nukoho bul deg kweleg famen de hup andundu hagdoho nit dung duruk katuhuk; ap homi enesahalimu en nit nenoluk de ap wareg on hag welatuhuk.

¹¹Nit nenakol neg atlug noba yatuk katuhuk; niren katukdoho duruk on hera duruk kahe famen wereg fug; nenahap wendat nenepuk on fahet ebereg welahe famen we hesangge hag.

¹²Niren nenolok fam duruk kahe on etma re demdoho Hat holohotma hum-ham alereg; nit nenesiag en nenonggwareg siaho nenobaharuk. Niren de nenolok fam duruhuk on fahet dik-demdoho fu deberuk kahe, ne nit nenesiag mundoho nenoluk deg.

¹³Nenakni, nit de dahandoho duruhukdeg Hat TUHAN hele sahale folug duruk kwit, nit nenakni Allah anyo hombolim lauk katuhuk fug. Niren de ap amu on sebeloho feseruk kwit dahandoho duruhuk; niren wenggelduk on mundoho longgo isimu, nenele oho seiale neg uruk kahe.

¹⁴Wene melaleg katukdoho duruk on anyo re hihili foruhuk, ne katukdoho on de yarap deberuhuk. Ap homi humdoho sahalimu en de bekitdoho duruk ale re seramap deberuk katuhuk, nenenda kain fam duruk ale re ohware deberuk katuhuk.

¹⁵Ap bekitdoho duruk on de wereg fug, ne ap sa en enolok fam duruk on ahaye duruk on de, at anyo oho enolok fam duruk on elma yohwat-atuk katuhuk,” ulug somban ebag. TUHAN en il mundoho hasimu re katukdoho duruk on anyo elegma hasireg at mundoho erim disi.

¹⁶ It eke en in aik watlug inibil aheg, duruk elegma hasireg TUHAN obam fog isi. Ai fam At onggwareg omamne fam de it enahap wendat-enebeheg, enalongap debeheg disi.

¹⁷ Aren de katukdoho duruk on mel enahap wendatuk on mel asum bosie on hag debesi, ne topi re baja on debesi. Aren de it enebe deg ale etma hwale feseheg, katukdoho duruk eleg on etma unggum og-eseheg, duhuk ulug wenggelsi.

¹⁸Aren de aselei on omano iren duruk ale higitdoho unggum og-esasi. Ne, enunggul unuk ik alo anggen yat kwe oho re Aren unggul og-esasi on ai fam en lil atswa fug.

¹⁹At omamne wereg ale mel along wereg ale mel de ap homi abirangge en, timur fam en de barat fam etma huli enakol duruk kamuhup. At ebere ik il omamne on hag, hol omamne en funag-lenggag angge esaukmu hag waruhu.

²⁰ TUHAN en omaliki fam uruk kwit, “An den hit abirangge henesiag fam en henobabut aham duhup on, o Yerusalem fam etma henahap wendat-henebuhuk ulug waruhuk.

²¹An den hit hinim sali waruhukdeg, hit fam de An den nomamne mel, An den hweag-hesauk kahi on mel mundoho-mundoho fahet og-hesahuk. Hiren de henomaliki fam mamul-esauk kamuk, ne iren ohore enomaliki fam hweag-esauk men neg de mundoho-mundoho etma welaruhu” isi ebag.