Read Ninia Yali YESAYA 60 Bible Online

YESAYA 60 - Ninia Yali bible

YESAYA 60

¹Hat Yerusalem su, hebe inatlug selehap din, hat haseleg hahap wendatuk on anyo mundoho waha anggere; Allah en ombagbag fam fisaho hobaharuk.

²Kwenang de heik on obam sahalireg, enunggul unuk enap de mum en sal-enusug; famen de TUHAN aseleg anyo re hit henobam enam aha, ne At watlug fisag henepuk on anyo hit henobam enam aha.

³Ap homi enunggul unuk humdoho re uluk-uluk hat haseleg fam waharuk kamuhup, ombagbag hat hobam enam aruhu on ai fahet ap raja enenda lisuhu.

⁴Furin, hat walinggoho etma nunggwe ale atuk; ap homi hat hakit sombandoho wamukoho kabog-duruk. Hat homaliki ap anggere re yatman wamuhup, hahwelani re hambog-eneplug wamuhup.

⁵Airoho waharuk ale haren esahundeg de yande duruk kwit, horohole heal aruhu; hahummu siag en en hobam log-bog uhun. It enunggul unuk amu on enengge omano re hat hakit walug wamuhup, ik laut foma fil en dungdoho wereg angge omano re hat hobam bulelik waruhu.

⁶O hat hobam kota etma re no unta o Midian mel, Efa mel on en hulilip deg lamuhup. O Syeba en de ap homi en emas, kemenyan mel walug, TUHAN en duruk ale fahet mot-dil wamuhup.

⁷O Kedar en kambing, domba mel etma hat hakit walug wamuhup, o Nebayot en domba yohombuk on etma re haren TUHAN obahet duruk on fahet welaruhu. Waroho og-utuk angge ai en de TUHAN enda ahayeg hauk karuhu At TUHAN en de obam wirig anyo mun alongdoho leho fohu.

⁸Hena hagdoho daruruk angge aire nunggwangge, suwe muluk obam daroho waharukmu hagdoho deg aire nunggwe?

⁹Etma re kapal Allah omaliki o bumbuk yatma etmano en og-eneplug wahareg yarik waha on. Emas, perak mel ohore hiren henakni TUHAN Allah anyo, mot-duruk on fahet walug waha neg; aire Israel on enakni Allah Mun amu eneg wereg on, Aren omaliki enobam enalong boukwag ulug duruk on anyo.

¹⁰TUHAN en Yerusalem fam uruk kwit, “Ap bohon en de haren on fak lehet omano nikangge wahup, ne raja en de hat hobahet duruk kamuhup. Endam de An nolok hasimeg hat unggum og-hitihik, famen ketia re An den hat nenda hundig hapuk ale fahet nahayeg boruk kahi.

¹¹ Nukoho nim hup angge nim de hasokole humon aire husig lit neg welaruhu, it enunggul unuk amu on en enenggik wereg deg on etma hat hakit walug waharuk kamuhup, it enowesi raja re hele wareg ondoho og-eneplug wamuhup.

¹²Enunggul unuk mel, kerajaan mel hat hobahet duruk ale enerim deg on de, enebe eleg atlug longgo uhup.

¹³Libanon ohwei en fam unuk bogdeg angge, e sin mel ibin mel, lak mel, etma harulug hat hakit wamuhup. Aire o An nobam anyo ape eleg on wiri folug, An neyog sobi forukmu buhun-duhupmen airoho duhup.

¹⁴ Ap homi hat sebeloho hobaharuk katswa on enomaliki re watlug sahaun dik waharuk kamuhup, ne it hat fam enalitno hapswa on de wambo ik wamuhup, hat de ‘Kota TUHAN en on’ eheg, ‘Sion, Allah Mun eneg wereg on Israel enakni anyo obam’ eheg, uruk kamuhu.

¹⁵Hat de enerim habeheg, lin heeheg, ne hobahakupmu hilmu siagdoho welaheg, duhun fug. Hat de mundoho-mundoho enambono haukmu, li abirangge enahayeg haukmu doho hobahakuk.

¹⁶Hat de ap enunggul unuk angge en mel, ap raja en mel, homi en enomalik hwal-enepuk hag, hwal-hapuk kamuhup. Ai fam de haren de An TUHAN hahap wendat hapuk on, ne Israel enakni Allah omamne on aire hat fiselaroho hobaharuk ulug holuk aruhu.

¹⁷An den no perunggu obalma re emas walug waruhuk, bosie obalma re perak walug waruhuk. E obalma re perunggu og-huruhuk, ne helep obalma re bosiemanggen og-huruhuk. Hat hobam etma re An den hambukdoho wereg lit lombuk deg welamag ulug debehuk, airoho deg ma re katukdoho neg duruk kwit melal-henepuk kamuhup.

¹⁸Hat hobam kota etma re ap enolok en dehesa ulug uruk on eke holduk kamuhup fug, wilayah hiren on fam etman o moluluk duruk ale mel, luluhun duruk ale mel, dehesa urukmu holduk kamuhup fug. An den de fak lehet hagdoho wereg lit halong bal-husugmu re, hiren An henahap wendat-henepuk on ulug mot-napuk kamuhup.

¹⁹ O nukoho angge re mo yareheg, ne hup angge bigalem yareheg, henepuk karuhu fug. An henakni TUHAN de seleg mundoho on wereg lit seleg duruk karuhukmu re, An nalong wereg lit selehap hapuk karuhuk.

²⁰Hit henobahet de mo obuk uruk eleg on eke welaruhu, bigalem il mum herag atuk eleg on eke welaruhu. An TUHAN mundoho ambogbag hapuk kwit wereg on aruhukmu re, fong-watuk kahep on ai mundoho fotog aruhu.

²¹Ap homi etma welamuhup on de demdoho on neg duruk kamuhup, iren de o kwenang ai mundoho-mundoho fahet hwelalug welamuhup. It de e a kisiloho An nonggwareg nalong welahi ale anyo ename femin ulug yaho ferihik on hag deg lamuhup.

²²Ap enahain elekwe dotdeg ma enalitno esauk on famen oho re, unggul unuk humon atlug omamne on welaruhu. An TUHAN en de lit higit deg li em, duhuk” isi ebag.