Read Ninia Yali YESAYA 61 Bible Online

YESAYA 61 - Ninia Yali bible

YESAYA 61

¹ TUHAN Mun Leho Wereg on anyo omamne re an nobam wereg; Aren an momale nobahasireg, wene ebe on walug ap homi kunggu on wereg ma laheg, ap enenda sebe ulug wereg on hiling-enebeheg; ap sabu hetdeg wereg on fam de, hit folo-folo fiselaroho henobahaik kohoreg ulug hweag-eseheg, ne ap hele wareg on fam de, hit wundet-amuhup ulug hweag-eseheg, dukwag ulug mon-napsi.

² Aren an mon-napuk kwit, TUHAN en henahap wendaruhu salim anyo ketia higit aha ulug hweag-eseheg; ap fong waroho wereg on abirangge onggone feseheg; it eneselei on onggo unggum enobam feseheg,

³ap enenda hesilduk kwit mel, fong watuk kwit mel wereg on fam, enenda seap debeseheg, enahayehap kwelabe feseheg; ne iren oba yako wereg on omano ahamdoho motdeg suni ukwag ulug debeseheg, dukwag ulug mingming napsi. It enebe re e TUHAN onggwareg en yatsi on hag deg lamuhup. Iren de fano ale mel demdoho on mel neg durukmu, TUHAN leho foruk kamuhup.

⁴Iren de kota o endam luluhun disi on omano, nikangge wireheg, ne obale endam et dereng-dereng urukmu omano wireheg, duhup.

⁵Yaho hit An nunggul unuk on suma, ap bog on en de hit henobahet duruk kamuhup, iren de hit henowam omano hwal-enebeheg, hit heneyabuk wireheg, anggur yabuk wireheg, duruk kamuhup.

⁶Hit henobahet de Allah amingming angge ulug eheg, imam nit nenakni TUHAN anyo en on eheg, duhup. Hiren de ap enunggul unuk amu on enenggik wereg angge etma nauk kamuhup, it enangge etma hit nauk kwit de henawonog atuk kamuhup.

⁷Hit aldap birenam hagdoho henenggali hauhupmu, enalitnoroho siag on nim dopno hesausa ma re, o kwenang hit welamuhupmu etman de hit henabinggi angge re aldap birenamdoho hwelahup, henahayegdoho mundoho eleg-am fug on welaruhu.

⁸TUHAN ele uruk kwit, “An den ap sebeloho fahat-enusug on mel, enolok fam debeseruk on mel, etma re nerim boruk kwit katukdoho duruk on neg nendareg lahi. An den de hit duruk onggo dipdoho neg og-hesauk karuhuk, ne sali hit-hinim mundoho-mundoho fahet waruhuk.

⁹Hit henambiangman endag-amuhup on de di kwe su kwe en enoluk deg lamuhup, di enunggul unuk su enunggul unuk sahalimu en de bogdeg lamuhup. Ai fam de ap homi abirangge inil hesauk kamuhup on en de, enunggul unuk su enap de TUHAN en fanoap debeseruk uruk kamuhup” isi ebag.

¹⁰ Yerusalem en uruk kwit, “An de TUHAN en duruk fam nahayeg napuk, Allah wereg ale ai fam nenda nahayeg napuk. Hwele duhum, ap sauwe lombo enepukmu enalili angge buhun on lahapuk hag, TUHAN en an nobam de nahap wendareg on mel, nalong wereg on mel bug-nobahasi.

¹¹A fole forukmu, wiliplug yaho foruk angge atuk hag, TUHAN Allah en nahap wendatuk on anyo wilibi fesi, mu re enunggul unuk mundoho en At mot-duruk kamag” isi ebag.