Read Ninia Yali YESAYA 62 Bible Online

YESAYA 62 - Ninia Yali bible

YESAYA 62

¹Yerusalem unuk fam an nele uruk kwit neg weregman Sion unuk fam an bok welam fug angge neg duruk men, at ahap wendaruhu, ne along aruhu on aire o hup angge esahe ombagbag duruk hag aruhu.

²Yerusalem yei, unggul unuk domog omano en hat along atuk on fu heauk, raja en hat halong welahen ale yet heauk. Hat hunuk keron fam hweag-hutuk kamuhup, TUHAN amu en hunuk ai og-huruhu,

³Hat de TUHAN enggikmu mahkota fano on seneg hag welaruhun, mahkota kerajaan hakni Allah enggikmu seneg laruhu.

⁴Hat hunuk de ‘Lin halug’ uruk kamuhup fug, Hanggwenang de ‘Ap elegma’ uruk kamuhup fug. Hat fahet de ‘Allah en enda duruk on’ uruk kamuhup, Hanggwenang fahet unuk de ‘Ahun hwelasi’ uruk kamuhup. Aire TUHAN en hat fahet enda ahayeg bohumu anggere, At hat hanggwenang ma etma hahun hag deg laruhu.

⁵Ap sauwe on en hwele duhum eke fahet elenggen kuruk hag, Wal-hapsi[79] ahun anyo en hat fahet ohweap habuhu. Ap ahun eke en ohwe hwelauk on anyo il halug ahayeg duruk hag, Allah en hat hobahet ahayeg hauk karuhu.

⁶Elehet fak lehet Yerusalem fam de an den ap kahaleg on bekit unduhuk fohuk; nukoho hup anggo we bok welamuhup hayog, hundig Allah en wat-nesasi on anyo fahet ebet utuk kamuhup.

⁷Iren At bok welamag ulug embeseruk kamuhup aire fug, owan At Yerusalem sombandoho wirik waharuk eleg kweleg o kwenangma abirangge unuk saha uruk fug kweleg de hweag-utuk kwit neg welamuhup.

⁸TUHAN en sali hombuk baloho watuk kwit, ne At omamne fam fobik higitdoho duhuk ulug uruk kwit: “An den heneng gandum selei enap enenggikmu fohuk fug; ap bog on de anggur hiren deg on, hit henenggik ambiangma angge etma nahup fug.

⁹Famen de hiren anggen dahanoho kabog-dulug, nauk kwit, TUHAN mot-duruk kamuhup; Hiren anggur anggen dahanduk kwit, fobik nauk kamuhup ale ohore An nobam enegman olohotma etman nauk kamuhup.”

¹⁰Ap homi Yerusalem on de sok fene en wilipuk kamek, ap homi sombandoho waharuk on omano fahet kobokwe yaho feseruk kamek. Kobokwe humon yatlug de helep oko dag fil embeselug, unggul unuk unggul unuk angge omano enobahet bendera lahabe feyek.

¹¹ TUHAN en wene diroho ap homi kwenang ambiang-ambiang kwe etma hweag-esakiek uruk, “Diroho ap homi Sion wereg on hweag-esahup, ‘TUHAN henahap wendatuk on waharuk ai hakiek! It ap mundoho wundet debesesi[80] on omano At ombolim waharuk’ ulug hweag-esakiek” isi.

¹²It ai enenuk de: ‘Omaliki mun eneg on’ eheg, ‘TUHAN en omaliki enahap wendat enepsi on’ eheg, uruk kamuhup. Ne, Yerusalem fahet unuk de ‘Kota TUHAN en enda wasi on’ eheg, ‘Kota TUHAN en lin-esauk fug on’ eheg, uruk kamuhup.