Read Ninia Yali YESAYA 63 Bible Online

YESAYA 63 - Ninia Yali bible

YESAYA 63

¹ “O Bozra, Edom fam omano waharuk on aire sa waruhuk? ebe sum de mebon wan deg ne asum lahabeg on de obam louk deg; at ebere along-balongdoho waharuk”[81] uruk katfag. “An de TUHAN higitdoho henahap wendaruk alereg lahi on anyo en wene fano on, enalong atuk on walug waharuk kahi” ebag.

²“Nunggwe ulug hasum mebon ap anggur ahaik berelduk on en hag aire?” Ulug ebag ma.

³ “An namu neg anggur ahaik bereldukmu etma kwik lauihikmen de it An nomaliki sahalimu etman eke let neausa fug. Unggul unuk unggul unuk angge re An den biril-bereldoho, anggur anggen berelduk hag deberihik. Mu re it enamep sipuk heg de An nasum fene are isi ai, Nasum abirangge emet atsi ai.

⁴An den wene onggo wut duhuk salim ak deberihik, An nomaliki fiselaroho welamuhup li momale ferihik.

⁵ An den hera-enepihik famen let napuk on eke wereg fug An let-napuk on eke wereg fug ai fahet An de nobam fog uruk. Ai en An nonggwareg nomane fam neg let-dauk kahi An nolok en nonggwareg let napuk.

⁶Anolok de ambulbul ulog-alog hauk kwit An den unggul unuk unggul unuk angge biril-berel esahuk; An den it elehap debesehukmu, it enamep de An den kwenangma hilili fesehuk” isi ebag.

⁷An den de TUHAN enda nenepuk ale omano saharuruk kahi, Aren abit ale duruk on omano fahet mot-duruk kahi. Aren mun sigdoho omaliki fanoap debeseruk, At aire enelaheg enepuk on deg ma, enda hundig enepuk on aire eleg atuk fug on deg.

⁸TUHAN ele uruk kwit, “Demdoho it An nomaliki wereg, it de nomaliki nahummu siahapdoho nobaharuk fug on deg” isi. Ai fam de At de it enahap wendat enepuk on atsi,

⁹it fam[82] anggolo hauk ale anyo At obam atsi. TUHAN en ap yonggo mel, obalmangge mel mon-enebik wahasi fug; At amu en neg it enelaheg esalug enda hundig-enepukmu re wundet debesesi. Endamet angge Aren hundig hwal-enepuk kwit wereg.

¹⁰Famen de it de ele sahalduk kwit TUHAN enda olok ap kwelapuk on wereg. Ai fahet de Aren ahamdoho re it eneselei atsireg, At amu en dog it nim yapuk katsi.

¹¹Airoho durukmu iren[83] o endam, At Musa TUHAN amingming angge wereg li omano ebet hauk kwit, iren de diroho uruk katswa, “TUHAN At omaliki melal-enepuk katswa on, ik laut fene hondog eneplug wahasi on anyo kema wereg? TUHAN Aren omamne og-esauk katsi on anyo re kema wereg e?

¹² TUHAN Musa eraham wereg lit, enggik omamne humon fam At unuk mundoho-mundoho etma motdeg welamag ulug, it enalukwema ik biare foruk katsi on anyo kema wereg e?

¹³TUHAN en ik ahum yaron fene, hondoko og-eneplug lauk katsi on anyo kema wereg e? No kuda en hag it iliangge lei kwe lauk katswa famen it dungdoho wat-dauk katswa fug,” ulug uruk katfag.

¹⁴No domba mel sapi mel enggelangge nowag ulug o leimu og-eneplug feseik lauk hag, TUHAN en de it mundoho kel wat-dauk kwit wereg ma feseik lebag. At unuk neg leho foruk kamag ulug, Aren airoho debag.

¹⁵TUHAN nenakni, Hat hebe welahenma mun eneg on fam seleg ombagbagdeg ma, boholma etman fu nesakin. Haren henda hundig nenepuk kahen on mel, hobam lik-louk deg lahen on mel omano re kema wereg? Henda lebe durukmu duruk kahen on mel enelaheg esauk kahen on mel omano kema wereg? Etma nit fam en alele oko foroho lam fug, nakni.

¹⁶Hat de nit nenakni fug no a? Nenakni at. Abraham mel Yakub mel en de nit de enapaleg deg. Famen de, TUHAN nenakni, Hat de nit nenakni welahen, o indik-endam etman angge nenahap wendat-nenepuk on welahen.

¹⁷TUHAN nenakni, nunggwelug nit longgo ukwag ulug embeseruk kahen? Nunggwelug Haren nit nenenda omamne deberuk kahenma, niren Hat fam nenakol hapuk kahe fug? Nit hamingming angge nenobahet, Hat homaliki, Hat hangge honggwareg on omano fahet ma.

¹⁸Ap selei on en Hat hobam anyo sobit-sabat esowag ulug nunggwelug embeseruk kahen; ne ap en Hat Handuk mun eneg on[84] anyo emere foruk kweleg nunggwelug embeseruk kahen?

¹⁹Haren nit nenobaharuk kahen ale etma re, Hat de nit halong apma fahat nenusug latihin fug on en hag nenepuk kahen;