Read Ninia Yali YESAYA 64 Bible Online

YESAYA 64 - Ninia Yali bible

YESAYA 64

¹TUHAN nenakni, bohol hio esalug hebe wambik ma, dom-dom etma Hat hohotma en elek-felek ukwagdoho debein,

²Indok en e wirig han yalduk hag, ne indok en ik osoho on hulug deberuk hag dini. It enunggul unuk on etma Hat holohotman youk dukwagdoho, it Haselei on fam humamne welahen ale ename fein.

³Eke Haren mun fulu-bolan ale, niren atmisi fug degman dirihin. Hat hebe wambik waharukmu, Hat holohotma etmano en dom-dom lang duruk katsi.

⁴ Ap homi hobam enenda ebereg wereg on en de Hat Allah hamu welahen ai hag de ilah amu on eke wereg ulug urukmu enesanggo holeheg, inil heheg duswa on eke wereg fug.

⁵Ap homi Hat henda boruk kahen ale higit duruk on mel, ap demdoho on neg duruk on mel de Haren enolohotma og-enepuk kahen. Haren nit fam holok nenepuk kweleg de, nit de o endam en angge kwasikdoho[85] duruk katuhukmu atlug de siag neg duruk kahe.

⁶Nit mundoho re ap homi emereg on welahe; niren fano ale duruk kahe on famen ohore mun sing deg ma orohole siag deg. Enggelangge iringgig on hol en fi esaukmu darulug lauk hag, nit de nenonggwareg nenolok en duruk fam eleg amuhuk.

⁷Hat horohole nit fam en heraho ferihin deg, nit nenonggwareg nenesiag fam eleg amag ulug nenobaharihin,[86] Mu re it eke en Hat hobam somban eheg, ne let nenebin ulug hobam heng eheg, duruk fug.

⁸Famen de TUHAN nenakni, Hat de nit nenakni, nit de kwenang dangge on welahe, Haren neg nit wal-nenepihin; nit abirangge re Hat henggik fam en laleg on welahe.

⁹Anggere, TUHAN nenakni, Haren holok mun anggolo ale nenobam fouk fug, nit nenesiag etma ebet hauk kwit neg welam fug; nit su re Hat homaliki on deg ma re fu nesakin.

¹⁰Hat hobam kota amu enegma etmano re leimu hag deg, Yerusalem de lei unggul ahap neg deg ma birim-birim uruk on hag deg.

¹¹Allah hobam mun enegma leho wereg on, nit nenombasi en Hat mot-hapuk katswa ma, anyo re indok en mundoho nasi; obale nit nenambono deg lahe kwe omano mundoho meiyaleg neg kabog lahabeg.

¹²TUHAN nenakni, hat de bok welahen ha alereg a? Haren mundoho etma hil hauk kahen. Nit anggin-anggolo ngogdoho howag ulug Haren nit fotog nesalug welatmihin a?