Read Ninia Yali YESAYA 65 Bible Online

YESAYA 65 - Ninia Yali bible

YESAYA 65

¹ TUHAN ele uruk kwit, “An de nomaliki en hweag-nutuk mu onggo hweag-esamin ulug fouk deg lit welahi famen de iren An nobam somban uruk fug. An de it nim ambi amul ulug foukdoho welahi famen de, it an hera nabil waharuk fug. An den onggo hweag-esauk kwit: Nebe su! Imin ulug fouk deg welahi famen, unggul unuk aire An wol-napuk fug.

² An de hundig-hundig nomaliki og-enepmin ulug fouk deg lit neg welahi, famen de it wene sahalduk ale neg enendareg. Unggul unuk ai kwasik hum ale duruk kwit enendaman bolug melale foruk ale mutlug lauk.

³Iren hindik-hundig kembu dewa enobahet wam waroho yabuk kwe[87] omano en yaleheg, mezbah wirig on fene omano amben fano angge kemenyan yaleheg, duruk ai fam hindik-hundig An nolokap kwelabe nobaharuk.

⁴O hup anggo re iren owik elekwe mel, ap wareg sal-enepuk kwe omano mel ap heime fam wene komo hweag-nesowag ulug heng enebik lauk. Iren de wam ino nenggeg, ne ino emereg on ahalue osoho nenggeg duruk.

⁵Iren uruk kwit, ‘Nit de hit fam en nenemu balohoma eneg on welahe, nit bal-nesa fug, henemumu lakiek’ uruk! It enobabut airoho duruk on etma re An den kumu enusug lam fug ale napuk. Mu re An nolok it fam de indok nahuli fouk fug on hagdoho duruk kahi.

⁶It unggum hwelahup on de An nolohotma mundoho baleg wereg. Dik-demdoho An bik-bok welaruhuk fug, iren enolok ale duruk on etma An den ambiangma debesehuk,

⁷aire it enesiag fahet nim it enombasi enesiag fahet nim ambiangma hwelahup. Iren An enalitno napuk kwit de kemenyan amben fano angge kembu dewa fahet mot-duruk kwe duk fene omano yalik lauk. An den de iren o endam et duruk katswa on omano fahet nim An den unggum enobam fohuk,” ebag.

⁸TUHAN ele uruk kwit, “Anggur anggen ahaik wereg on de hwik-esa fug angge re ahaik hwenangguruk. Ai hagdoho re An nunggul unuk on etma enesahalimu en de it An nobahet duruk on oho wereg angge re, An den abirangge elehap enebuhuk fug.

⁹It enunggul unuk Israel on en it Yehuda ambiangma on fomane re An den fanoap debesehukmu re, it enambiangma on en de kwenang An Nandom fam omano hwelalug welamuhup. Ap homi An den en-enepihik, iren An nobam neg duruk on etma re o etma welamuhup.

¹⁰ An nomaliki en An napne og-napuk kamuhup; domba, sapi mel iren on de Akhor Fanggongman o Saron donggoma etma enggela nauk kamuhup.

¹¹Famen de it An lin nealug lauk kwit, Sion An Nanduk mun eneg on[88] anyo fahet osoko deberuk on, iren dewa ambiangma fano on hwleheg, sabut eseheg, duruk on Gad mel, Meni mel fam weraho angge folug og-esa lauk on on de airoho hahup fug.

¹²Hit mundoho re enolok fam duruk on ambiangman waramuhup. Aire An den wol-henepuk li em hiren onggo uruhup fug, ne An nele uruk kweleg hiren holeg latuhup fug ai fam hahup. Hit de An nele sahaloho folug kwasik on neg duruk ale fahet henambono deg.

¹³Dik-demdoho anggere ap An napne wauk on de enesiburu nauk kamuhup, ne hit de obokdoho welamuhup. It de enahaik nauk kamuhup ne hit de henenda aheroho welamuhup. It de enahayeg en duruk kamuhup, ne hit de henenggali amuhup.

¹⁴Demdoho anggere, it de enahayeg en enanggiluk duruk kamuhup, ne hit de oba anggolo siagdoho yatuk kamuhup.

¹⁵Ap homi An den en-enepihik on en de An nunuk fam hururung-enepuk kwit de diroho uruk kamuhup, “TUHAN Mun Leho wereg on en de hat oho it hag binggi howarukwag” uruk kamuhup! Famen de ap An nele holoho neg duruk on de An den unuk keron og-uruhuk.

¹⁶Ap homi o kwenang ai fam en fanoap nenobahaukwag ulug heng uruk on en de, Allah dipdoho neg duruk on anyo en fanoap debesoukwag ulug heng uruk kamuhup. Ne, ap enebe domog en hombuk baldul ulug de Allah dipdoho neg duruk on anyo unuk fam hombuk balduk kamuhup. Aire ouk-bouk o endam hauk katswa on anyo mundoho eleg aruhureg enapeleg aruhu mu duruk kamuhup” isi ebag.

¹⁷ TUHAN ele uruk kwit, “An den de bohol keron nim kwenang keron nim waldoho fohuk. O endam atuk katsi ale etma re mundoho enapeleg aruhu, mu re ebet hahup fug.

¹⁸An den waldoho fohuk ai fam de, mundoho-mundoho fahet henahayeg duruk kwit henambono duruk kamek. An den de Yerusalem keron mun enahayeg neg deg on wal-duhuk, ne ap homi etma welamuhup on de enambono duruk kamuhup.

¹⁹ An noggwareg oho re Yerusalem fahet nahayeg duhuk, ne ap homi etma welamuhup on fahet nawonog duhuk. Kota ai fam de oba yatuk kamuhup fug, let-nenebiek ulug heng uruk kamuhup fug.

²⁰Enomalik de enebe dot deg kweleg eke waratuk kamuhup fug, ne ap lohon de enebe umur yatdoho welamuhup. Ap umur 100 tahun deg on de sauwereg boruk kamuhup ne ai am fug kweleg waramuhup on de unggum TUHAN en on obam atsi mu waratsi boruk kamuhup.

²¹Ap en enobam wit dalug enonggwareg neg welamuhup; ap amu on welamuhup fug. Iren anggur yabuk wit-dalug, anggur ahaik enonggwareg neg nauk kamuhup; ap amu on de nauk kamuhup fug. An nomaliki re enebe umur e wilibig on wereg hagdoho amuhup, airoho amuhupdeg iren yabuk duruk on anggen yihig nauk kamuhup.

²³Iren duruk ale etma re ambiangma atuk karuhu neg, it enomaliki re obahatman eke waratuk kamuhup fug. It nim iren ondohoma on nim de, An den mundoho-mundoho fanoap debesehuk.

²⁴Iren An owan heng napuk eleg kweleg An den dag onggo hweag- esauk karuhuk; Iren somban uruk on fotogdoho uk eleg kweleg An den onggo fouk deberuk karuhuk.

²⁵ Olomene serigala mel domba omalik mel enggelangge misigmu nauk kamuhup; singa re sapi en nauk hagdoho enggela bug on nauk karuhu, kisu re namelmel deg laruhu fug. An Nanduk mun eneg on fene abirangge etma re, ap en eke enangge nale feheg, kwasikdoho deheg, duruk kamuhup fug” ulug ebag.