Read Ninia Yali YESAYA 66 Bible Online

YESAYA 66 - Ninia Yali bible

YESAYA 66

¹ TUHAN ele uruk kwit “Bohol ai An huratuk kahimu, ne kwenang de neyog sobig lahimu. Degma o nangginig hag on An nobahet de haren wuruhun, ne obale nunggwangge hagma haren An wereg ma ulug buhun-duhun?

²Abit angge mundoho re An nenggik fam wal-dirihik mu re, abit angge etma mundoho atsi angge neg. Famen de An nambono deg lahi alere ap enenda sebeleg on ai, asiag omano fahet enda wat-dauk kwit nambigen aho ulug, An nobam akol boruk kwit nele holoho neg duruk on ai nenda.

³Famen de unggul unuk ai en de it enambono boruk ale neg dil lauk; Iren enenda ale re me naperoho kabog-duruk ale etma enahayeg deg, Iren de sapi yohombuk on wareheg, ap wareheg, duruk ale nim, domba omalik wareheg, mene anggolop somboreheg, duruk ale nim, gandum folug og-nereheg, wam mep feheg, duruk ale nim, amben angge kemenyan yaleheg, kembu mot-deheg, duruk ale nim etma re iren aham deberuk fug.

⁴Airoho duruk en de An den oho An nambono boruk ale neg duhuk it enemberimmu fulu laleg ale it enakol boruk on debesehuk. Aire An den wol-enepuk men, iren onggo enele uruk eleg ale ai fahet, ne An nele uruk kweleg de it holduk eleg ai fahet. It enambono deg alere An nele sahalduk ale ai neg duruk ale ai fahet de An den nolok ale duhuk” isi.

⁵Yaho hit At fahet henakol deheg, ele holoho neg deheg duruk kahep on en suma yei, TUHAN en uruk ale neg holduk kamek. “Hit henenda An nobam neg dipdoho duruk fam, hit henenggul unuk on sahalimu en enerim henepuk kwit, hinim sebereg duruk ale enerim duruk. Iren hit enelitno henepuk kwit diroho uruk kamuhup, ‘Hit henahayeg en duruk ale etma nit ninil haul en de, TUHAN along on wereg ale etma unug-howag’ uruk kamuhup. Famen de it enemu neg enenggali amuhup.

⁶O kota etman ele mil duruk angge holiek! ele eke An Nobam wirigmen uruk on aire naselei on omano onggo unggum enobam feserukmu nele uruk kahi ai!

⁷ Kota An den amu eneg on anyo re hwe misig eke omalik enderikoho ouk en nenek duruk eleg kweleg omalik endat atuk hag; omalik endetuk kwit ouk owan ha fugmen omalik ap anggere endag-atuk hag deg.

⁸Wene ai hag on de san eke holsi? Ai hagdoho atsi on de ap san il hasi? Eleg. Famen Sion omalik enderikoho ouk en duruk hag duruk kweleg, de unggul unuk Israel mundoho endag-atsi.

⁹Hiren boruk kwit An den nomaliki og-eneplug lauk men neg de endag atuk li horog atsi; ite endag-am no ulug embesesi bouk fug.” TUHAN ele airoho isi, ebag.

¹⁰Ketia ap homi Yerusalem henenda hundig duruk kahep on en de, Yerusalem nim seberoho henahayeg diek. Hit at fahet henenda hesilig lahep on de, ketia henahayeg duruk kamek.

¹¹Omalik misig eke isinga ag nauk hagdoho, hit de henangge sigdoho wereg ma nauk kamuhup.

¹²Aire, TUHAN ele uruk kwit, “Hit An den de ik wirig atuk hagdoho henenda seroho welamag ulug og-hesahuk. Ik fu lehelug emberim haroho wirig atuk hag, enunggul unuk amu on en enenggik wereg angge etma hit henekit walug waruhuk. Hit de omalik isinga en walinggig lit ag mondotuk hag, ite isinga ahoma yinggigmu ebene ho hauk kwit wereg hag deg lamuhup.

¹³Omalik eke isinga en onggonduk hag, An den hat Yerusalem airoho onggon bahuhuk.

¹⁴Airoho durukmu hahupdeg hit fobik henahayeg amuhup, enggela ket laharuk on hag hit henebe fano aheg, henomamne aheg, duhup. Ai fam de An namingming angge re An nomamne enepuk karuhuk ale hahup; naselei enap etma An nolok enepuk ale hahup” isi.

¹⁵Demdoho anggere, TUHAN fobik indok nim waruhu; At de angge kereta ai hol sielu en duruk hag, At olok wereg on anyo ap homi enobam feikoho, ne Aren mun haperoho enowarikoho walug waruhu.

¹⁶Aire ap homi mundoho siag durukmu hweag-enebuhu on de, Aren indok mel karog mel fam unggum og-esahu, ne ap homi enebe humdoho unggum og-esahumu waramuhup.

¹⁷TUHAN ele uruk kwit, “Ap homi yabuk kembu dewa [89] enobahet wirigmu omano welamul ulug eneko fahat dalug duruk on mel, ne it enobam di ale su ale duruk on mel de, ap homi wam nauk on mel, bak nauk on mel, nauk on fomane me nape on nauk on mel inim seberoho eleg amuhup.

¹⁸An de iren duruk ale mel wenggelduk ale mel noluk deg[90] An den ap di enunggul unuk su enunggul unuk misigmu kabogdoho fesehuk ulug waruhuk[91] Ne, it kabog-duhupdeg de An nomamne wereg ale inil hahup.

¹⁹An den eneg ale misig it enesahalimu fohuk. Ne, iron en foma dorangge re enahap wendat-enebuhuk. It de An den ap homi di enunggul unuk su enunggul unuk o kwenang yit-yat kwe An den duruk kahi ale holduk eleg on mel, ne leho wereg lit nomamne welahi ale inil hauk fug on mel wereg kwe etma mon-enebuhuk. It lahup kwe etma re: O Spanyol mel, Libia[92] mel, Lidia ap sehen anggen on wereg kwe mel, o Tubal mel, Yunani kwe mel, lahup. Lahupdeg iren de An leho welahi ale anyo di enunggul unuk su enunggul unuk sahali kwe saharik lahup.

²⁰O kwenang etma fam en de it sombandoho waharuk kwit henori hit henunggul unuk on An nahayegdoho ulug og-numukoho walug wamuhup. Iren de ap homi etma og-eneplug de o Yerusalem An nanduk mun amu eneg on[93] fam anyo, ap homi Israel on en eneitogdoho gandum obale fano angge fam doaloho An TUHAN nobam og-nirik waharuk anyo hag, iren kuda mel, keledai mel, unta mel, kereta pedati fam wirig angge mel, fam lahaplug walug wamuhup.

²¹Iron etman fomane re An den imam welamag ulug feseheg, enunggul unuk Lewi on welamag ulug feseheg, duhuk.

²² Bohol keron nim kwenang keron nim An nomamne fam hambuk deg welaruhu ai hag, hit henambiangman ondoho on mel, hit henunuk mel mundoho welaruhu.

²³Bigalem keron mel nukoho sabat fam mel de, ap homi mundoho en de An napne wakoho o Yerusalem waharuk kamuhup.

²⁴ It airoho dulug lauk men de, ap An nele sahale folug duruk on etmano wareg angge wereg ma hauk kamuhup. Kisu ap wareg etmano nahu on de wararuhu fug, ne indok it han werag enebuhu on de nahul atuk karuhu fug; airoho deg ma re ap homi mundoho inil en halug mun enamelmel enepuk on deg laruhu” isi ebag.