Read Ninia Yali YESAYA 7 Bible Online

YESAYA 7 - Ninia Yali bible

YESAYA 7

¹ Raja Ahas hun Yotam amloho Uzia omba aire ap homi Yehuda on fahet raja wereg lit melal-enepuk men weim kahal atfag. Raja Siria on Rezin ai mel raja Israel on hun Remalya amloho Pekah ai mel inim seberebagdeg Yerusalem on enowarik laul ulug ebag. Famen de iren o Yerusalem sebelik kuk fug ale atfag.

²Ap en uruk kwit, ‘Ap Siria on esan lohwaloho ap homi Israel on wereg ma kwik wahesareg inim seberehasa’ urukmu Raja Ahas mel, ap homi abirangge mel, en holfagdeg de enakol humon atfagdeg e wilibig on holen fun ha waharukmu duruk hag enowag elek duruk katfag.

³Airoho debag ma TUHAN en Yesaya fam uruk kwit, “Hat hebe mel, hamloho Syear Yasyub[8] mel de Raja Ahas ebe koboke ik sene yenggeleg hwaloho kwelabegman emberim fil sum omatuk mu eta wereg ma akit lakiyug.

⁴Lalug hweag-utuk kwit: Henda hambukdoho wereg lit de hape hebeloho welamuk. Henda hakol atlug nangginoho dimin ulug nong-hong uk fug. Raja Pekah mel, Rezin mel, enautsi tentara Siria on mel enolok humdeg, famen indok aro biren angge indok ebe elegma hobu neg laharuk ai hag deg anggere hakol am fug.

⁵Ap Siria enap ai en de it Israel on mel enowe raja mel sebe ulug hit nal henebul ulug duruk.

⁶Iren de o Yehuda etma enowatuk ulug kulug enenda enakol amag ulug durukmu re enebe nit ninibil atil lauk em de hun Tabeet amloho ai raja welamag ulug unduhuk foul uruk.

⁷Famen de an henakni TUHAN en diroho ihi: Ap homi Siria on enobam kota indipmu re o Damsyik. Ne, hun Rezin de ap homi Damsyik on fahet raja wereg. Famen 65 tahun welatlug it Israel on enebe naleg-haleg esahukmu it enunggul unuk ai on eke wereg uruk kamuhup fug.

⁹Ap homi Israel on enobam kota indip de Samaria. Ne, hun Pekah re Samaria on fahet raja wereg ai en, iren airoho enebuhuk ulug ehesa on aire demdoho henebuhup fug. Wene an den airoho hweag-hirihi on ai hiren henenda an nobam dip-debouk ulug angge welamuhup fug halug de henebe hambukdoho welamuhup fug ulug nele demdoho hweag-hirihi eheik ulug hweag-umuk” ebag.

¹⁰TUHAN en wene eke su at Ahas hweag-etfag:

¹¹“An hakni TUHAN Allah en de haren fureboukwag ulug eneg angge, o ap homi waratlug laukmu apma etman ane, ite boholma mag etleman ane eke dimin en de heng-nabin” ulug hweag-etfag.

¹²Airoho hweag-etfag ma at Ahas en onggo uruk kwit, “An den nakni TUHAN hobabut bal-hapuk, eneg angge eke nimin ulug heng-hapuk alere nerim” ulug ebag.

¹³Airoho ebag ma at Yesaya en uruk kwit, “Aireg halug de, hun Raja Daud omba su, wene su hesanggo fanoroho holin. Haren de ap homi enobam bokdoho weregman enabut baloho enenda kahaldukmu enerim atuk ai maben behendeg TUHAN mun fetagdoho neg duruk eleg on anyo abut balduk mu erim amag ulug duruk kahen a?

¹⁴ Haren airoho ehen famen de TUHAN amu en hit fureboukwag ulug eneg angge eke duhu. Hwele duhum on[9] eke omalik ahummu atlug omalik ap angge enderuhu. Endag dalug de unuk Imanuel[10] soaluhu.

¹⁵Omalik ai ebe log aheg, enda wereg aheg dulug de aren wene amu kong-duruk karuhu ne o kwenang etma fam de di angge su angge buleloho welaruhu.[11] Famen de airoho wereg ale ai owan aik wam fug kweleg de ap raja biren hakol enepuk kahen on eta o iren melal-enepukmu etma lin-esalug wilibuhupmu re enareng eleg lamuhup.

¹⁷Famen de TUHAN en raja Asyur on ayonggo folug henekit mondorik waruhu mu, di anggin su anggin henobam henobaharukmu hahup. Atam nit ap homi Israel fahet raja misigmu wereg lit wereg latswa famen, fobik de Israel on enemumu, Yehuda on enemumu minggit atswa ai huli en ketia huli anggin-fanggin airoho eke hauk kahe fug on hahup.

¹⁸Airoho henebuhup li em etare TUHAN en tentara Mesir on mel Asyur on mel enayonggo feselug henekit mon-enebik waruhu mu, sobon mel, kin mel, mun humdoho elang lehelug o donggo kwe mel, helep aeg elekwe mel, andog-dik lauk ai hag, it enebe wamuhup deg de alog-alog angge wilibig kwe mel, somun angge kwe mel sebeloho dak debeik wamuhup.

²⁰TUHAN en raja Asyur on ayonggo fohumu, aren de ap enoruk mel, enombanisong mel, hwetuk angge en baloho embeseruk ai hag hit Israel on airoho siahap henobahaukwag ulug duhu.

²¹Eta li em de ap homi eke enowam sapi ket sauwe on misig eke mel, ne kambing biren mel neg endag-dauk halug,

²²ahoe re ap homi ando o etma welamuhup on etma enebe higitdoho nauk kwit welamuhup. It aire demdoho ahoe mel, kin ahalue mel nauk kwit welamuhup.

²³O etma ap homi enebe domog eneyabukmu anggur indip 1.000 en uang perak 1.000 en fam onggo baloho yatswa on wereg famen de, fobik enggela alog-alog angge wilipuk kwit mundoho sebeloho fohu.

²⁴Airoho aruhu ai en de, ap homi eke o suma wamul ulug halug de enasehen enandog angge hwelalug waharuk kamuhup.

²⁵Ne, o dom kwe abirangge etma re yabuk wireheg, di angge su angge a yareheg, duruk kwe famen de enggelangge alog on humdoho wilibuhureg mundoho sebeloho fohu. Airoho debehumu enakol en de o etma waharuk kamuhup fug. O etma sapi, domba mel en enggelangge nauk kwit welamuhup,” ulug ebag.