Read Ninia Yali YESAYA 8 Bible Online

YESAYA 8 - Ninia Yali bible

YESAYA 8

¹TUHAN an hweag-nutuk kwit, “Helep humon lisu baloho foruk on eke walug de lisu obale[12] humdoho diroho bale fein: ‘Sorom folo-folo lalug, di on su on folo-folo delduk on’[13] ulug lisu bale feiyug.

²Airoho bale folug de ap imam enebe biren inil hanim baluhunmu eneluk deg lamag ulug de it enenda wereg on hun Yeberekhnya amloho Zakharia mel, Uria mel eta enayonggo fesein” ulug hweag-nitsi.

³Airoho hweag-nitsimen il eke weregman an nohwe omalik ahummu atsireg omalik ebe endag dasimu re, TUHAN en an nobam uruk kwit de, “Omalik ai unuk de, ‘Sorom folo-folo lalug di on su on fol-folo delduk on’ soaliyug.

⁴Aire omalik ai ebe owan log atlug ‘Nayon, ninga’ uruk eleg kweleg de ap homi Damsyik on enangge di on su on abirangge huhul hwelalug de walug raja Asyur on og-irik lahup ai en airoho diyug” ulug hweag-nitsi.

⁵TUHAN en nikangge an nobam uruk kwit,

⁶“Ap homi suman de Ik Syiloah[14] ahanggen on ele eleg ahum buagdoho lauk on anyo embeseswareg de iren Raja Rezin nim Raja Pekah nim enahayeg duruk.[15]

⁷Ai en de an TUHAN en raja Asyur on mel, autsi tentara mel, en de hit ap homi Yehuda on henowarukwag ulug enayonggo feselug mon-enebik waruhuk. It wamuhup alere Ik Efrat fu lehelug ik elahalet kwe hetag-hetag wirig atuk hagdoho hit sebel-henebik wamuhup.

⁸It wamuhupdeg ik fu hetag-hetag laharuk kwit enanggolop huli laharuk hag wamuhup deg di angge su angge sebelik wamuhup,” ulug isi. Airoho isi aire Allah[16] en de suwe omalik isinga en ahwerabul apma kwelabe feseruk ai hag aren nit nenobam suma ahwerabul apma kwelaboho fahat nenusug lit welamag!

⁹Allah ebe nit nininim wereg lit fahat nenusug wereg ai en de, hit ap homi henunggul unu domog o unggut-unggut welahep on etma henesanggo furoho holiek. Hiren nit nenoatul ulug esan lohwaluhup famen de henakol aheg, henowag elek deheg, duruk kwit welamuk. Nenoatul ulug henesehen lisoho lahup famen de henakol nimnim diyug. Diroho duhuk ulug wene melalug duhup famen de we suhwi neg aruhu. Hiren dul ulug henele katukdoho maruhup famen de we obahareroho neg uhup.

¹¹TUHAN en ele omamneroho an nobam uruk kwit, ap homi enunggul unuk ai on en enobabut duruk ale ai hag, an den it enobabut ilitdoho duruk kam no ulug nendama eberoho hweag-nutuk kwit,

¹² diroho hweag-nitsi, “It ai enebe misig sebe ulug enele maruhuk uruk on ai hiren demdoho ulug bouk fug. Ne, wene airoho atuk mu it enakol atlug duruk ale aire hat hakol aheg, hendama youk laheg duk fug.

¹³An hakni TUHAN namu mun eneg wereg lit di ale su ale mundoho duk ale neg deg lahi on anyo nobam dipdoho wereg lit, we an nobam neg hakoldoho welamuk.

¹⁴ An nebe namu mun eneg welahi ai en de, an nebe it Yehuda on mel Israel on mel eneyog dungdoho wat-dauk kamag ulug atihik, ne ap homi Yerusalem on de sabu yepdeg ma luhut atuk anyo hag ilag uruk kamag ulug atihik.

¹⁵Ap homi enebe humdoho re eneyog dungdoho wat-deheg, enebe yebildoho enowareheg, ne yepdeg ma luhut aik kuruk hag ilag eheg, duhup” ulug hweag-nitsi.

¹⁶Nomaliki mamul-henepuk kahi on henesanggo furoho holiek. Nenakni Allah en, diroho diyug airoho diyug ulug hweag-nesasi on ai eke belabe fouk fug angge furoho foroho lamek.

¹⁷ TUHAN omaliki at Yakub ambiangma en ondoho on famen de mundoho herag atsi famen de, an den de fobik fano aruhu ulug nenda dipdeg lit ebereg welahi.

¹⁸ An nomaliki ninim ap homi Israel on en fubi-nenobahaukwag ulug eneg angge, nenakni TUHAN di ale su ale mundoho duk ale neg deg on Dom Sion fam wereg on anyo en nenayonggo nenobahalug mon-nenebik wahasimu welahe au.

¹⁹Famen de ap homi eke en diroho hweag-hesahup, hit hein og angge enele mul-mul ale uruk kwit enambilik neg lebe-lebe uruk on etma fam enelma og-enebik lakiek. Nenebe nenoluk welahe on fahet hein on angge enekit lalug ap wareg heime fam enelma og-enebik lahe fug ha alereg a? Lahe halereg, ulug hweag-hesahup.

²⁰Famen de hiren onggo hweag-esauk kwit de, “TUHAN en wene hweag-nesasi on ai henesanggo holiek! Ap eke wene hweag-nesasi on ai higitdoho uruk eleg halug de ap homi enenda sug-sagdoho wereg on hag wereg”[17] ulug hweag-esakiyug.

²¹Ap homi eke di anggin su anggin enobam aheg, siburu obok enebeheg, duhup on aire o kwenang etma fam ya laheg, da laheg, duruk kwit welamuhup. It airoho lauk kwit enasiburu obok en de enendama enolok atlug de raja mel it enakni Allah mel hururung enepuk kamuhup. Airoho duruk kwit de inil di kwe su kwe fu heheg,

²²bohol kwe nim kwenang kwe nim fu heheg, duhup famen de amu ale eke hahup fug, we di anggin su anggin mel, siburu obok mel, o heik deg on deg ma enendamat yehelik kuk on mel, neg wereg ma hauk kamuhup. Airoho hauk kwit weregman fobik it enebe o mum deg ma etma hwik-esahu.

²³Famen de ap homi o etma on di anggin su anggin ai hauk kwit neg welamuhup fug. Ap homi enunggul unuk Zebulon on mel, Naftali on mel wereg kwe di o su o etma re atam nenakni TUHAN en sebeleg hag wereg ulug besi. Famen de fobik welamuhuk li em etare o wilayah Laut Tengah etman de mo lahabik waharuk fil en Ik Yordan etlema fil etma huli, ai en o Galilea fam ap homi enunggul unuk amu on wereg ma etma huli re aren along bolug leho fohu.