Read Ninia Yali YESAYA 9 Bible Online

YESAYA 9 - Ninia Yali bible

YESAYA 9

¹ Airoho debehumu re ap homi enunggul unuk o mum fam wereg on etma re, seleg ombagbagdeg on hahup. Ne, it eke waratuk on horogdoho wereg on etma re selehap debesehumu seleg fam welamuhup.

² TUHAN nakni, haren neg it Israel on enendama enahayeg humon[18] howag ulug og-esauk kahen, Ap homi anggen yihig baleg on kabog-duruk kwit enahayeg duruk hag, ne huhul wauk on yohwan duruk kwit enahayeg hauk hag, hat hobabut fano en ap homi Israel on enahayeg humon howag ulug enendama debesehun, it enawonog amag ulug haren neg debesehun.

³Haren neg it enobam anggin on oko feheg, it enomaloma e harulug lauk on oko feheg, dirihin. Haren o atam etma ap tentara Midian on mabenap debeserihin ai hag, it enunggul unuk eke hat homaliki di anggin su anggin enobam feseruk kwit wereg ma, haren enalong elehap debeselug del-enebuhun.

⁴Ap tentara waharukmu eneyog sepatu aplohok dap-dap uruk on mel, it enesum mep en labulig on mel de indok en mun alkandoho nahu.

⁵Nenakni Allah en nit nenobahet amloho og-nesasimu mundoho endag-aha. At ebe re nit melal-nenepuk on welaruhu. At airoho aruhu mu, at unuk de diroho uruk kamuhup: “Enda wenggeleg on[19] wereg lit ap homi komo-enepuk on”, eheg, “Allah omamne humon” eheg, “Nenakni mundoho-mundoho welaruhu on” eheg “Raja liol-nenepuk on” eheg, uruk kamuhup.

⁶At ebere Daud en ondohoma on ebe raja wereg lit melal-enepuk karuhu. At omamne humon welaruhu. O aren melal-nenepuk karuhu mu etma re mundoho lioleg neg wereg ma ap homi enenda seroho welamuhup. Aren melal-enepuk karuhu alere mun katukdoho neg deheg, wene melaleg wereg ale higitdoho neg deheg, duruk kwit ketia huli en mundoho-mundoho welaruhu. Nenakni TUHAN en de di ale su ale mundoho duk ale neg deg ma demdoho airoho duhu.

⁷ TUHAN en de ap homi Israel on enobam unggum mundoho fesi.

⁸Airoho fesi ai fam de it enunggul unuk Israel on mel ap homi Samaria on mel de TUHAN en neg disi ulug enoluk amuhup. Ketia re it enawonog atlug enenda leho fahat-dauk kwit de iren diroho uruk,

⁹“O kwenang dangge werako helep hag debelug wutuk on fam wirig on etmano re mundoho loba isi, famen de niren e fam o keron wuruhuk. Ne, e ara mundoho mutswa, famen niren de e lak hag lak mun fano on o Libanon fam en obalma walug wuruhuk.” Uruk.

¹⁰TUHAN en de it eneselei on[20] lit esalug de it enowarikoho duruk.

¹¹It enunggul Siria on mo lahaik waharuk fil wereg on mel ne enunggul unuk Filistin on mo obuk uruk fil wereg on mel en de Israel on abirangge kululung bil esaul ulug duruk. Famen TUHAN olok enobam foruk kwit wereg ma re unggum enobam demdoho fohu.

¹²At TUHAN Mun Along on anyo en it Israel on fam unggum og-esasi famen de it enenda wat-dauk fug; ne iren enobabut ahamdoho at fam waharuk fug.

¹³Ai fam nukoho misig fam neg de TUHAN it Israel melal-enepuk on mel ap homi holduk on mel unggum og-esahu. Aren de enunggul kong heg, enahae kong heg, debelug hwik-esahu.

¹⁴Enunggul aire ap log-lohon enalong boruk on etma, ne enahae re it nabi wene siag on hweag-esauk on etma.

¹⁵Ap homi etma enowesi melal-enepuk on en de it enunggul unuk ai on enenda nong-hong eseheg, wene siag on hweag-eseheg, duruk.

¹⁶Mu re it enunggul unuk ai on de mundoho TUHAN embeselug laheg, mundoho nong-hong eheg, duswa, ne it enele uruk on etma abirangge re kwasikdoho neg uruk. Ai fam de it ap sauwe on enesahalimu en de TUHAN en misig ulug oho eke lili fohu fug. Ne, aren de it homi sohwe mel omalik wetien on mel enda enebuhu fug. Ite at TUHAN ahummu olok borukmu re demdoho unggum enobam fesehu.

¹⁷It enunggul unuk ai en siag duruk alere enggela alog-alog angge nauk kwit sipuk-delelangdoho mun nauk hag duruk. Indok ambulbul de ohwei harep nauk kwit hobu mondotlug laharuk hag duruk.

¹⁸TUHAN mundoho di ale su ale duk ale neg deg on anyo re mun olok hum deg lit de ap homi enunggul unuk aire indok ilim hag mun obaleroho nauk on hag debelug, at olok anyo re indok ambulbul ulog-alog hauk on hag deg. Airoho deg ma re ap misig en oho it enori on ulug enenda hundig enebuk fug alereg.

¹⁹O kwenang ai fam abirangge etma re ap en di angge su angge hwelalug, nauk angge hag omano re it nauk famen de enobam homo enobaharuk fug. Airoho duruk kwit de it enonggwareg enori on famen oho nauk neg.

²⁰Ap Manasye on mel Efraim on mel de wat-wat atuk kwit, it enebe misig sebe ulug de Yehuda on enowatul ulug duruk. Famen de TUHAN ahummu olok borukmu re demdoho unggum enobam fesehu.