Read Ninia Yali IMAMAT 1 Bible Online

IMAMAT 1 - Ninia Yali bible

IMAMAT 1

¹At TUHAN Obam Sabo sum fam saloho wirigmu etmano en, it ap homi Israel on en wene melaleg fik-fu debelug duruk kamuhup ale ulug Musa wol-debagdeg wene melaleg obam foruk kwit diroho ebag: “Ap misig eke en TUHAN obahet waroho yalduk on obahet feik waharuk kwit halug de, aren wam domba, mel sapi mel, kambing mel walug og-irik waharuk karuhu fano.

³Ne, aren walug og-irik waharuk angge ai ebe wam sapi misig halug de wam aire yohombuk on ne ebene mel ahapmale eleg on halug og-utuk karuhu. Aren walug watlug de TUHAN Obam Sabo salegman sokolma etano feik waharukmu re, TUHAN en ap ai obam enda ahayeg foruk karuhu.

⁴Airoho feik watlug de, at anyo en enggik wam anyo unggulmu sebele forukmu, at TUHAN en de foruk angge aire ap anyo asiag elehapdoho foruk on ulug wauk karuhu.

⁵Ai debelug de sapi anyo re o Sabo sokolma etan watil lauk kwit amep de at Harun ambiangma on en it imam omano en oko TUHAN fahet folug de O Sabo sokolma etano en Mezbah anyo ombandu ohwan ilitdoho etano hilil-esauk kamuhup.

⁶Ai debelug de ap anyo en wam anyo ahap nonggole folug senggeloho linggit-lenggat deberuk karuhu.

⁷Airoho deberukmu imam omano en de mezbah anyo fam indok ambulbul debelug e wirig emberimmu yaldil laharuk kamuhup.

⁸Yale folug wam senggeleg anyo unggul baleg inim asei inim de indok emberimmu yale foruk kamuhup.

⁹Airoho debelug de ap anyo en wam anyo ilonggomangge nim enggik eyog sareg nim ik omaho forukmu re, it imam eta li em yabuk duruk on omano en de abirangge yale foruk kamuhup. Ne, waroho yalduk kamuhup angge en de TUHAN enda ahayeg deberuk kamuhup.

¹⁰Ne, waroho feik waharuk on lahe domba oho kambing oho halug de wam aire yohombuk on neg ahapmale eleg on halug feik waharuk kamuhup.

¹¹Feik watlug ap anyo en wam anyo mezbah emberim utara fil etman ware forukmu, re it imam omano en de amep oko mezbah ombandu ilitdoho etano fene hililduk kamuhup.

¹²Wam ebe anyo mundoho senggele forukmu, it imam en de wam senggeleg anyo unggul baleg mel, asei mel walug de mezbah fam indok emberimmu foruk kamuhup.

¹³Airoho debelug de ap anyo en de ilonggomangge mel, eyog sanog deg mel horuruk karuhu. Airoho debeil lauk em neg de it imam en abirangge TUHAN obahet, mezbah emberimmu yale foruk karuhu. Ne, waroho yalduk angge anyo en de TUHAN enda ahayeg deberuk kamuhup.

¹⁴Ne, waroho walug feik waharuk kamuhup angge ai lahe suwe misig halug de, suwe muluk halug oho, ne suwe yalma kauk on halug neg.

¹⁵Feik waharukmu re it imam en de suwe anyo walug mezbah wereg ma lalug de anggolobag kwaniroho ware folug de unggul neg mezbah emberimmu yale foruk karuhu. Ne, suwe anyo amep de mezbah aluluk kwe etma bete-esauk karuhu.

¹⁶Suwe anyo anggolobag ma ahum humon anyo nim alot nim de abirangge hwilili feselug de ul forukmu en mezbah anyo ambanggowag timur fil etma hwik-esauk kamuhup.

¹⁷Airoho debelug de suwe anyo re ahwerabul sarebouk fug angge re lidi folug de, suwe anyo mezbah emberimmu yalduk kamuhup. Ne, waroho yalduk kamuhup angge ai amben en de TUHAN enda ahayeg deberuk kamuhup,” ulug hweag-etfag.