Read Ninia Yali IMAMAT 10 Bible Online

IMAMAT 10 - Ninia Yali bible

IMAMAT 10

¹Nukoho misig salim it hun Harun omaliki Nadab inim Abihu inim etano en indok anggen olog dulug lauk angge obale enemu-enemu webagdeg indok anggen yohwatfag. Yohware febagdeg iren amben fano angge dupa indok anggen anyo fam TUHAN obahet ulug yalfag, famen de TUHAN en hit airoho diyug ulug hweag-esebag fug mu iren indok yalfag on aire ebe ahaindok yalfag fug.

²Airoho debag ma TUHAN en indok it enebe han werag-enepuk on mondorik watfag ma it etano o TUHAN Obam Sabo salegma en waratfag.

³Waratfag ma at Musa en Harun hweag-utuk kwit, “TUHAN en de, Ap homi An nobahet duruk kamuhup on halug de An nebe eneg horeg welahi ale anyo leho nobaharuk kwit duruk kamuhup, ne An nebe nalong deg lit nanggiluk welahi ale anyo ap homi An nomaliki[3] di inunggul unuk su inunggul unuk wereg on fam unug-esahuk, ulug, TUHAN en isi,” anyo re ebe ai fahet isi ulug Harun hweag-etfag famen de at Harun we ele eleg angge bok welatfag.

⁴Airoho welatfag ma at Musa en at Harun akni aut it hun Uziel omaliki Misael inim Elsafan inim etano wol-esebagdeg hweag-esauk kwit, “Dia wamluhup deg de hit henombalo misig on en ondoho on en wareg dia o TUHAN Obam Sabo salegma en wag-watlug de o Sabo salegman dag fil feik lakiek,” ulug hweag-esebag.

⁵Hweag-esebag ma it etano watfagdeg at Musa en miming-enepfag aleroho it enebe enesum wandoho wareg angge etano Sabo salegman og-eneplug dag fil wilibik lebag.

⁶Airoho debagdeg at Musa en Harun inim at omaliki amu on nimi Eleazar inim Itamar inim enobam hweag-esauk kwit, “Hiren henoruk ulunggun wareheg, henenda fu en ulug henesum belahi sum belaboho fong wareheg duk fug. Hit airoho duluhup halug de hit inim waramluhup ne it ap homi Israel on abirangge oho TUHAN en bet-enebikohoreg. Famen de it ap homi Israel on foma neg de it ai TUHAN ahaindok en enowareheik on ai fahet fong warukwag.

⁷Hit de TUHAN obahet duruk kamag ulug airoho unduhuk feseruk kwit duruk aleroho ahalue hililoho unduhuk henobaharuhukmu hit henebe warahep ha nore TUHAN Obam Sabo salegma suma embeselug wilibik la fug,” ulug hweag-esebag ma, at Musa en hweag-esebag ai higitdoho debag.

⁸TUHAN en Harun hweag-utuk kwit,

⁹“Hat inim hat homaliki inim en ik anggur ahalue nalug inim ite ik asig omamne nalug halug inim de An Nobam Sabo salegma kwik waharuk kamuhup fug. Ne, hiren wene melaleg su sahale fohup halug de hit henebe waramuhup. Wene melaleg sure hat hambiangma en ondoho on en de mundoho dip debelug duruk kamuhup.

¹⁰Ne, hiren Allah fahet eneg wereg on inim hesangge on inim, emereg wereg on inim emereg eleg on inim ai furoho fubi deberuk kamuhup.

¹¹Diroho-suroho duruk kamuhup ulug wene melaloho Musa fene en hweag-hitihik on aire haren it ap homi inunggul unuk Israel on mundoho mamul-esauk karuhun,” ulug hweag-etfag.

¹² Hweag-etfag ma at Musa en Harun inim at omaliki biren Eleazar inim Itamar inim hweag-esauk kwit, “Nauk angge TUHAN fahet foruk on eta en gandum logdoho hag walug de, tepung ai on famen en de roti fituk angge ragi eleg angge fam witlug, werako foruk on aire mun horeg ma mezbah horogma eta en nakiyug.

¹³Roti ai TUHAN obahet foruk on en deg ma re nauk ale ohore obale horeg ma en nakiyug. TUHAN en an wene melale nobaharuk kwit de roti aire hat inim hat homaliki inim henobahet on ulug hweag-nitsi anggere.

¹⁴ Famen de hit inim hit henomaliki inim henahwelani inim de wam amig inim aho inim enele unduhuk folug eneko foruk on etma nauk kamuhup fano. Aire it ap homi Inunggul unuk Israel on en anggerang owam waroho yalduk on en hit imam on henobahet de ai deg ma re hiren we hesanggema obale emereg elegma en nahup halug de fano.

¹⁵Ne, wam aho eneko feik waharuk on inim, abig-fig enenggik dum waroho feik waharuk on inim, wam amug yal angge yalduk on inim walug watlug TUHAN obahet feik waharuk kamuhup. TUHAN en wene melaleg fam isi hagdohore etma on aire hat inim hat homaliki inim henengge mundoho-mundoho atuk kamuhup,” ulug hweag-esebag.

¹⁶Ai en at Musa en kambing enesiag elehapdoho foukwag ulug on anyo fahet hein og-esebag ma, iren hweag-utuk kwit, “Kambing anyo re mundoho waroho yalehesa,” ulug hweag-etfag ma, at Musa olok atfagdeg it Eleazar inim Itamar inim fam betdoho hweag-esauk kwit,

¹⁷ “Waroho yalduk angge aire mun horeg on. Ne, aire it ap homi Israel on enesiag elehapdoho foukwag ulug de TUHAN en hit og-hesasi famen nunggwelug wam enesiag elehapdoho foukwag ulug on ai hit obale horegman nenggep fug?

¹⁸Kambing ai amep de TUHAN obam sabo salegma walug wamag ulug de fug. An den melale henobaharihik hagdoho wareg angge aire hit etma en na angge duruhup,” ulug hweag-esebag.

¹⁹Airoho hein og-esebag ma at Harun en onggo hweag-utuk kwit, “Demdoho, yoho su salim de it ap homi Israel on en it enesiag elehapdoho foukwag ulug inim, TUHAN fahet yal angge yalduk on inim feik wahesa, aireg famen de anggin on su an nobam aik waha. Wam enesiag elehapdoho ulug feik wahesa on ai yoho su salim an den nele halug oho TUHAN en an nobam ahayeg belep a?”

²⁰Ulug hweag-etfag ma at ele onggo airoho hweag-etfag ai fam Musa endama nohobag.